Kónčny medaljowy špihel 24. olympiskich zymskich hrow:
z s b
1. Norwegska 16 8 13
2. Němska 12 10 5
3. China 9 4 2
4. USA 8 10 7
5. Šwedska 8 8 5
6. Nižozemska 8 5 4
7. Awstriska 7 7 4
8. Šwicarska 7 2 5
9. Ruski OC 6 12 14
10. Francoska 5 7 2
Peking (JBo/SN). Lětuše 24. olympiske zymske hry, kotrež su so předwčerawšim zakónčili, wotměchu so w cyłkownje 15 disciplinach a sydom sportowych družinach. Němscy wobdźělnicy su sej z wuběrnymi wukonami cyłkownje dwanaće złotych, dźesać slěbornych a pjeć bronzowych medaljow wubědźili a tak druhe městno za Norwegskej wobsadźili. Wulki podźěl na tym maja wuslědki w sankowarskim a bobowym sporće. Wot dźesać móžnych złotych medaljow w lodowym kanalu běchu sej Němcy dźewjeć wuwojowali. 23lětna Laura Nolte sta so zdobom z najmłódšej bobowej olympiskej dobyćerku. Nimo mnohich dalšich historiskich wukonow w mjenowanej disciplinje běše tež předstajenje Daniele Maier wosebiteho razu. Wona zamó sej jako prěnja němska atletka scyła medalju w skicrossu zawěsćić.