Třicety raz wobdźěli so město Budyšin lětsa na cyłoněmskim dnju wotewrjeneho pomnika. Za to zestajichu wobšěrny program, kiž drje njedźelu tysacy wopytowarjow do sprjewineho města wabi.
Budyšin (SN/MWj). 30 twarskich pomnikow budźe 10. septembra na dnju wotewrjeneho pomnika w Budyšinje přistupnych. Tónle dźeń skići składnosć, za kulisy pomnikoškita pohladnyć a stawizny města na wosebite wašnje dožiwić. W Budyšinje je dohromady 1 180 twarjenjow ze statusom twarskeho pomnika.
Woblubowane městna budu tež lětsa wěže stareho města, z kotrychž změja wopytowarjo při připowědźenym rjanym wjedrje wulkotny wuhlad. Dale budu wosebite twarjenja wočinjene, kotrež hewak přistupne njejsu, kaž stukowa žurla na Hrodźe a Weigangec wila. Ze serbskeho wida zajimawy je ansambl sotrownje w Małym Wjelkowje. Tam wotměje so w 11.30 hodź. serbske wodźenje z historikarku Serbskeho instituta dr. Lubinu Malinkowej.
