Europeada: Poslednje hry wubrankow – prěni raz njeje Južny Tirol mišter

Flensburg (SN/MkWj). Njewšědny wobraz skićeše so wčera wopytowarjam Europeady 2024 w danskim Apenrade: Hnydom pjeć žónskich mustwow steješe na trawniku tamnišeho stadiona. Nimo serbskeje žónskeje wubranki nastupichu mustwa němskeje mjeńšiny w Pólskej, Ladinowki z Italskeje, němska mjeńšina w Danskej a Reteromanki ze Šwicarskeje. Hry rozdźělichu so na dwě hrajnišći. Serbske žony nastupichu spočatnje přećiwo sewjeroschleswigskemu mustwu. Sylny fanowy blok z Łužicy na zwučene wašnje serbske koparki podpěrowaše. Trenar Pětr Bejmak na kromje hrajnišća mustwo dirigowaše. Hra bě wot spočatka wurunana, wobě mustwje měještej šansy na wrota. Wrotarka serbskeho mustwa Vanessa Peschel bě hrajerkam dobra zepěra, na kotruž móžachu so w nuzy spušćeć. Johana Wjeselic pokaza z dobrym přihrawanjom do směra na wrota stajnje zaso swoju klasu. Kónčna faza bě hišće raz bojowniska. Na kóncu wosta při zasłuženym 0:0. Na tribunje Janšojscy hercy serbskich fanow z dujerskej hudźbu podpěrowachu.