Krótkopowěsće (16.03.16)
„Paradiz“ w pólšćinje wušoł
Budyšin. Wuspěšny roman Křesćana Krawca „Paradiz“ je nětko w pólskej rěči wušoł. Teresinske Wydawnictwo Ojców Franciszkanów Niepokalanów je přełožk knihi, kotraž so žiwjenju a wosudej serbskeje swójby wěnuje, pod titulom „Koniec Raju“ nakładowało. W nadawku Pólsko-serbskeho towarstwa je so dr. Zbigniew Gajewski wo přełožk postarał. Kniha je dalši wažny přinošk k šěrjenju serbskeje literatury w druhich rěčach.
Łobjo dale zašlahane
Drježdźany. Łobjo wostanje za łódźny wobchad dale zašlahane. Po wjacorych podarmotnych pospytach, před Albertowym mostom znjezboženu łódź wućahnyć, dyrbja ju nětko wuprózdnić. Něhdźe 80 metrow dołha a z 800 tonami sele nakładowana łódź „Albis“ leži hižo wot póndźele wječora prěki před stołpomaj mosta.
Rathenow dale społnomócnjeny
Krótkopowěsće (15.03.16)
Mać Terezu swjatopraja
Rom. Albansko-indisku lawreatku Měroweho Nobeloweho myta mać Terezu chcedźa 4. septembra swjatoprajić. Tole su dźensa we Vatikanje po zetkanju bamža Franciskusa z jeho kardinalemi zdźělili. 1997 w starobje 87 lět zemrětu rjadnisku sotru bě bamž Jan Pawoł II. w lěće 2003 zbóžnoprajił. Wona bě so stajnje za chudych a chorych zasadźała.
Mjenje wopytowarjow
Drježdźany. Na statnych hrodach a zahrodach Sakskeje su loni sydom procentow mjenje wopytowarjow zličili. Cyłkownje přińdźe 1,95 milionow hosći, lěta 2014 bě jich 2,1 milion. Wuwiće njeje jeno sćěh powšitkownje woteběraceho turizma w Sakskej, kaž zamołwići informuja. Wina stej tež wupad parnikow niłkeho Łobja dla a mjenje zarjadowanjow.
Rjemjesło: Ćěkancam pomhać
Krótkopowěsće (14.03.16)
Druhe městno Budyšanej
Wojerecy. Na sakskim wurisanju ,,Młodźina hudźi“ we Wojerecach je sej kónc tydźenja serbski hudźbnik 2. městno zawěsćił. W starobnej klasy 4. lětnika zamó Filip Budar z gitarowym trijom jurorow přeswědčić. Skupina předstaji pjeć hudźbnych kruchow. Pjatk z wurisanjom staršich lětnikow pokročuja. Na nim wobdźěli so tež Józef Hantuš z Radworja.
Rubježnistwo wujasnjene
Budyšin/Zhorjelc. Rubježny nadpad na złotnikarja 20. nowembra 2015 w Budyšinje je wujasnjeny. Zastojnicy zhromadneje policajskeje komisije móžachu w Zgorzelecu dweju muži w starobje 23 a 28 lět zajeć. Polakaj staj we wobchodźe na Serbskich hrjebjach drohotne časniki rubiłoj, po tym zo běštaj wobsedźerja a jeho dźowku z płunom zraniłoj.
Dyrbja hišće raz wolić
Krótkopowěsće (11.03.16)
Načolni politikarjo na palnišća
Budyšin. Do wopyta zwjazkoweho prezidenta Joachima Gaucka w Budyšinje su so Serbske Nowiny tydźenja na swojej internetnej stronje prašeli, hač měli načolni politikarjo towaršnostne krizowe palnišća zaměrnišo wopytać. 56 procentow wobdźělnikow hłosowaše za to, stajnje 22 procentow z „ně“ abo „njewěm“. Nowe online-prašenje nańdźeće dźensa pod www.serbske-nowiny.de.
Wysoka komisarka OSZE porěči
Flensburg. Wysoka komisarka za narodne mjeńšiny OSZE Astrid Thors změje zahajensku narěč na lětušim kongresu FUEN wot 18. do 22. meje w europskej kulturnej stolicy Wrócławju, kaž generalna sekretarka FUEN Susann Šenkec zdźěli. FUEN chce z jeje nazhonjenjow nastupajo mjeńšinowy škit wuknyć.
Za zajimcow dźělčkoweje fyziki
Krótkopowěsće (10.03.16)
Modelowy region turizma
Berlin. Hornja Łužica-Delnja Šleska budźe modelowy region kulturneho turizma. Tak maja so runje wjesne regiony při zwičnjenju podpěrać, zdźěla zwjazkowe hospodarske ministerstwo w Berlinje. Nimo Hornjeje Łužicy spěchuje wone tež Wuchodnu Frizisku a region wokoło hory Zugspitze. W přichodnych měsacach maja so wotpowědne koncepty zdźěłać.
Šiman pola čěskich přećelow
Praha. Serbski zapósłanc CDU w Sakskim krajnym semje Marko Šiman přebywaše wčera a zawčerawšim zhromadnje z dalšimi čłonami Dźěłoweho kruha Europa w čěskej stolicy Praze. Hłowny zaměr bě, skrućić mjezy přesahowace zhromadne dźěło Sakskeje a Čěskeje. W Serbskim seminarje zetka so Šiman tež z čłonami Towarstwa přećelow Serbow, kaž wón informuje.
Nowe čisło Naša Domowina
Krótkopowěsće (09.03.16)
Wjac mzdy dźěłaćerjam
Budyšin. Něhdźe 4 920 twarskich dźěłaćerjow Budyskeho wokrjesa ma wjac pjenjez zasłužić. Tole žada sej IG twarstwo-agrar-wobswět. Dźěłarnistwo žada sej wot dźěłodawarjow 5,9 procentow, něhdźe 175 eurow měsačnje, wjac mzdy. Tež wučomnicy maja ze zwyšenja profitować a w kóždym wukubłanskim lěće měsačnje 100 eurow wjac mzdy dóstać.
Předadźa motorowej łódźi
Drježdźany. Sakske parnikowe předewzaće chce po hospodarsce ćežkim lěće 2015 dwě mjeńšej łódźi předać. Pječa hižo dlěje wo tajkej naprawje rozmysluja, rěčnica předewzaća zdźěli. Předać chcedźa parnikaj „Lilienstein“ a „Bad Schandau“. Historiske parniki njejsu porno tomu na předań. Wobě łódźi stej loni niłkeho stawa Łobja dla lědma zasadźenej byłoj. Ze zajimcom tuchwilu jednaja.
Rozkora rjeka Rüdigera dla
Krótkopowěsće (08.03.16)
Gauck za runoprawosć žonow
Berlin. Zwjazkowy prezident Joachim Gauck je sej składnostnje dźensnišeho Mjezynarodneho dnja žonow runoprawosć žonow w powołanskim žiwjenju žadał. Přeco hišće je na dźěle a w čestnohamtskim wobłuku wjace muži we wodźacej poziciji hač žonow, rjekny Gauck wčera w Berlinje. „Žony steja w druhim rynku. Tole měło so změnić!“
Domašcyna čita dwójce
Lipsk. We wobłuku Lipšćanskich knižnych wikow wobdźěli so Róža Domašcyna na zarjadowanju Sakskeje akademije wuměłstwa „Poezija w hibanju“ pjatk, 18. měrca, w antikwariaće „Central W33“ a dźeń pozdźišo, 19. měrca, na čitanju „Gedichte von der Liebe, vom Essen und vom Trinken“ w hosćencu „Lucca-Bar“.
Martina Münch zaso ministerka
Krótkopowěsće (07.03.16)
„Musica sacra“ premjeru měła
Ochranow. Pod hesłom „Musica sacra“ je wčera w Ochranowje hudźbny program Serbskeho ludoweho ansambla w póstnym času swoju premjeru dožiwił. Nimo němskich klasikarjow přednjesechu tež twórby serbskich komponistow Jana Bulanka, Jana Pawoła Nagela a Detlefa Kobjele. Štwórtk koncertuja w Budyskej jastwowej a njedźelu w Baćońskej cyrkwi.
Na spalenje knihow dopominali
Drježdźany. Mjez wuměłcami, kotřiž su wčera w Drježdźanskim kabareće „Breschke & Schuch“ na prěnje spalenje knihow w Němskej na Drježdźanskim Wettinerowym naměsće 8. měrca 1933 dopominali, bě tež Benedikt Dyrlich. Bywša Drježdźanska zapósłanča zwjazkoweho sejma dr. Marlies Volkmer (SPD) je so tohorunja słowa jimała.
Sakska stolica chce so požadać
Krótkopowěsće (04.03.16)
Smoler čitarjam SN pohon
Budyšin. Přemóžacej wjetšinje čitarjow Serbskich Nowin su 200. narodniny Jana Arnošta Smolerja narok, wjace wo wótčincu zhonić. Tole wujewi naprašowanje našeho wječornika w interneće. Jeničce jedyn wužiwar nochce wjac wo prěnim serbskim kniharniku zhonić a jednomu mjeno Smoler ničo njepraji. Nowe naprašowanje namakaće wot dźensnišeho pod www.serbske-nowiny.de.
Wjetšina za koaliciju CDU a SPD
Magdeburg. Dobry tydźeń do wólbow Saksko-anhaltskeho krajneho sejma za tym wupada, zo změje tuchwilna wulka koalicija CDU a SPD wjetšinu wolerjow za sobu. Tole wěšći najnowše woprašowanje sćelaka ZDF mjez ludźimi. Prawicarskopopulistiska AfD by při swojich prěnich wólbach 17 procentow dóstała, CDU 32 procentow, SPD 15 a Lěwica 20.
Čěski prezident namołwjeny
Krótkopowěsće (03.03.16)
Eksport na rekordnym stawje
Kamjenc/Drježdźany. Předewzaća Sakskeje su loni w eksporće nowy rekord nastajili. Cyłkownje předawachu twory w hódnoće 38,38 miliardow eurow do wukraja, Statistiski krajny zarjad w Kamjencu dźensa zdźěli. To je sydom procentow wjace hač 2014. Najwažniši hospodarscy partnerojo běchu China, USA, Šwicarska, Italska a Šwedska.
Masarykowy stólc předali
Praha. Křesło Tomáša G. Masaryka, prěnjeho prezidenta Čěskosłowakskeje, su w awkciji předali. Original, twarjeny wokoło lěta 1925 po namjeće słowjenskeho architekta Jože Plečnika, je njeznaty zajimc za nimale 41 000 eurow kupił. Za čas komunizma bu wjetšina originalnych meblow z Praskeho hrodu chětro tunjo předata; přesadźowany stólc běchu hakle njedawno namakali.
Sokoł w pincy, Pančičenjo na čole
Budyšin. Volleyballisća Sokoła Budyšin su sedmu a wosmu hru sezony 2015/2016 přěhrali a steja dale na poslednim městnje tabulki wokrjesneje klasy muži. ST Wjazońcy podležachu woni 1:2 a SZ Budyšinej-sewjer 0:2. Dotal su jenož jednu hru dobyli. Načolnik tabulki je dale mustwo ST Marijina hwězda.
