Krótkopowěsće (04.11.15)
Michael Gromm njeboh
Berlin. Jendźelski spisowaćel a přećel Serbow Michael Gromm je njeboh. Wón zemrě minjenu sobotu 72lětny w jednym z Berlinskich hospicow, kaž jeho najwuši přećeljo zdźěleja. Gromm bě so wjele lět wo zachowanje Rogowa prócował a je samo sudniske procesy přećiwo koncernej Vattenfall wjedł. Stajnje zaso bě wón hósć Berlinskich Serbow.
Namołwjeja k demonstraciji
Drježdźany. Sakscy Zeleni namołwjeja přichodnu póndźelu, 9. nowembra, jasne znamjo za demokratiju a přećiwo hidźe a nječłowjeskosći sadźić. „9. nowember je z powalenjom murje 1989, z pogromowej nocu 1938 a wuwołanjom Weimarskeje republiki 1918 rozsudny datum němskich stawiznow.“ Demonstracija ma hesło „Wutroba město šćuwańcy“.
Templ za mjeńšinu
Cheb. Na terenje aziskeho wikowanišća w zapadočěskim měsće Cheb je tamniša skupina Vietnamjanow buddhistiski templ, financowany ze swójskich srědkow, wotewrěła. Štyri a poł metra wulku postawu Buddhy kaž tež druhe twarske elementy běchu w kontejnerach z Vietnama přiwjezli. Mjez 33 000 wobydlerjemi Cheba je 4 500 z Vietnama.
Kónc w skupinskej fazy
Krótkopowěsće (03.11.15)
Tilich na wopyće w Romje
Drježdźany. Sakski ministerski prezident Stanisław Tilich (CDU) je wot dźensnišeho na třidnjowskim wopyće w Romje, hdźež so tež z bamžom Franciskusom zetka. Kaž statna kenclija zdźěla, chce při tej składnosći jeničce za bamža zestajanu chronologiju duchowneho a wosadneho žiwjenje sakskich katolikow po lěće 1989 přepodać. Je to prěnja jězba Tilicha jako nowy prezident Zwjazkoweje rady.
Nowy nawoda rezerwata
Stróža. Biosferowy rezerwat Hornjołužiska hola a haty dóstanje noweho nawodu. 1. januara 2016 přewozmje Torsten Roch komisariski nawod, kaž Sakski statny lěsniski zawod jako nošer rezerwata informuje. 43lětny diplomowy inženjer za lěsnistwo je minjene lěta w sakskim lěsniskim zarjedźe we wjacorych wodźacych funkcijach skutkował.
Seehofer přijědźe do Sakskeje
Krótkopowěsće (02.11.15)
Angažement počesćił
Drježdźany. Sakski ministerski prezident Stanisław Tilich je dźensa w Drježdźanach komunalnych politikarjow za jich angažement při natwarje demokratije w swobodnym staće hnydom po politiskim přewróće počesćił. To zdźěli statna kenclija. Mjez wuznamjenjenymi bě tež wjelelětny Budyski wyši měšćanosta Christian Schramm (wobaj CDU).
Chwalba čěskim awtotwarcam
Mláda Boleslav. Nowy nawoda awto- twarca Škoda Bernhard Maier je swoje nawjedowace zastojnstwo čěskeje wotnožki VW z chwalbu za awtotwarske tradicije susodneho kraja zwjazał. „Předewzaće reprezentuje wusahowacy wuznam Čěskeje jako kolebki europskeho awtomobilotwarstwa“, rjekny 55lětny dźensa. Přitym pilnosć ludźi wosebje wuzběhny. Tradicija Škody saha hač do 19. lětstotka.
Mašinotwarcy ćerpja Chiny dla
Krótkopowěsće (30.10.15)
Myto serbskej wědomostnicy
St. Louis. Concordia Historical Institute w ameriskim St. Louisu mytuje serbsku wědomostnicu Trudlu Malinkowu za wudawaće knihi „Jan Kilian (1811–1884) – Pastor, Poet, Emigrant“. Předmjet slědźenišća su stawizny Lutherskeje cyrkwje w Sewjernej Americe. 12. nowembra jej w St. Louisu myto spožča.
Nowum w LND
Budyšin. Znaty Towaršny spěwnik předleži nětko jako app. Tak je móžno, teksty spěwow spěšnje na wobrazowce měć. App hodźi so w Google Play Store jako light-wersija darmotnje downloadować, połna wersija płaći 3,99 eurow. Při zwoprawdźenju projekta je LND podpěrało Böhmak it-poradźowanje, technisku realizaciju přewza develAPPers UG.
Nowa čara za lěsnu železnicu
Běła Woda. Ze symboliskim prěnim zarywom zahajichu wčera nowotwar nimale štyri kilometry dołheje čary Mužakowskeje lěsneje železnicy k wěži při Ćežkej horje w Běłej Wodźe. Nowe kolije maja narunać dźěl tych, kotrež dyrbjachu Wochožanskeje brunicoweje jamy dla wotstronić. Šef lěsneje železnicy Friedemann Tischer naprawu wita, dokelž so techniski pomnik tak zachowa.
Krótkopowěsće (29.10.15)
Znowa mjenje bjezdźěłnych
Budyšin. W oktobrje bě we wuchodnej Sakskej 25 041 bjezdźěłnych, 386 mjenje hač měsac do toho. Překwapjace a za oktober skerje njetypiske je, zo bjezdźěłnosć hišće raz woteběra, rjekny dźensa Thomas Berndt, šef Budyskeje agentury za dźěło. Kwota bjezdźěłnosće wučinja 8,6 procentow, w Kamjenskim wobłuku 4,9 a w Zhorjelskim 12,9 procentow.
Wurumuja cyrkej za ćěkancow
Oberhausen. Něhdźe połsta ćěkancow móže přichodny tydźeń do ewangelskeje cyrkwje w sewjerorynsko-westfalskim Oberhausenje zaćahnyć. Tamniša wosada bě tole poskićiła, kaž rěčnik města wobkrući. Do toho dyrbja Boži dom wurumować, ławki runje tak kaž wołtar, klětku a dupu. Sanitarne připrawy budu w kontejnerach zwonka cyrkwje.
Za darmotny wobjed dźěćom
Krótkopowěsće (28.10.15)
Myto za Kamjenski projekt
Torgau. Sakski nutřkowny minister Markus Ulbig (CDU) je dźensa w Torgauwje składnostnje wuhódnoćenja wubědźowanja „Do srjedźa! City-ofensiwa Sakska lěta 2015“ projekt města Kamjenca „Nowe stare město – čerstwy wětřik w starych murjach“ z připóznawanskim mytom 5 000 eurow wuznamjenił. Wubědźowanje bě lětsa dwanaty raz.
Wjace Čechow w „getach“
Praha. Po zdźělenju Radeka Jiráneka, direktora Agentury za socialnu integraciju, je w Čěskej republice wokomiknje dwójce telko „socialnje wuzamknjenych getow“ kaž w lěće 2006. Aktualnje jedna so wo 600 městnow ze 115 000 wobydlerjemi, wosebje romaskeje narodnosće. Najwjace „getow chudoby“ je w sewjernej Čěskej a wokoło Ostravy.
Blatter rozsud wobžaruje
Zürich. Prezident swětoweho koparskeho zwjazka (FIFA) Joseph Blatter wobžaruje, zo njeje po swětowych mišterstwach w lěću 2014 wotstupił. Tole rjekny wón ruskej powěsćerni Tass. Zastupnicy wjacorych kontinentalnych zwjazkow běchu jeho pječa prosyli w zastojnstwje wostać, zo njeby so konstelacija mocy w zwjazku FIFA na jich njedobro změniła.
Krótkopowěsće (27.10.15)
Zetkanišćo nětko wjetše
Budyšin. Dnjowe zetkanišćo Carity w Budyšinje je wot dźensnišeho w nowych rumnosćach. W twarjenju něhdyšeje BHG na Póstowym naměsće móže nětko hač do 15 staršich ludźi wot póndźele hač do pjatka zhromadne hodźinki při zabawnych hrach, čitanju a jědźi dožiwić, zdźěli Manuela Pöpelowa. Hromadźe ze sobudźěłaćerku stara so wona tam tuchwilu wo sydom do wosom seniorow, kotřiž su zdźěla dementni.
Lubin chce přistupić
Lubin. Serbski sydlenski rum na juhu Braniborskeje móhł so přichodnje rozšěrić. Błótowske město Lubin chce zajutřišim, štwórtk, wo tym wuradźować, hač wotpowědnu próstwu wo přistup zapoda. Měšćanosta Lars Kolan (SPD) z toho wuchadźa, zo wjetšina zapósłancow měšćanskeho parlamenta tomu přihłosuje, kaž wón nowinarjam zdźěli.
Muž swoju žonu morił
Krótkopowěsće (26.10.15)
Nalada chětro napjata była
Freiberg. Napjata a chětro agresiwna nalada knježeše wčera w Freibergu, jako tam ćah z ćěkancami dojědźe. Něhdźe 200 policistow měješe něhdźe dwójce telko demonstrantow pod kontrolu dźeržeć. Při tym dóńdźe k raznym werbalnym rozestajenjam z połsta přećiwnymi demonstrantami. Cyłkownje 721 požadarjow azyla dowjezechu wčera hišće do Lipska a Drježdźan.
Po telefonaće pryska woda
Jiřetín pod Jedlovou. Nowu fontanu na naměsće w Jiřetínje nad Jedlovou w čěskich Łužiskich horach móže kóždyžkuli běžeć dać. Dosaha telefonowe čisło, zapisane na tafli při studni, zazwonić a wodomjet započina awtomatisce wodu pryskać. Bórze budźe móžno atrakciju tež na webcamje wobkedźbować. Klětu matej w měsće dalšej tajkej studni nastać.
Dokumentarny festiwal
Lipsk. Mjeztym 58. mjezynarodny festiwal dokumentarnych a animaciskich filmow zahaja dźensa w Lipsku. Na nim pokazaja 300 filmow z 62 krajow, kaž zamołwići zdźěleja. Je to mjeztym sobu najwuznamniše zetkanje tuteje filmoweje branše. Wjeršk budźe swjatočne spožčenje mytow 31. oktobra.
Krótkopowěsće (23.10.15)
Na rěčnym atlasu dźěłali
Łužnica. W chorwatskej Lužnicy njedaloko stolicy Zagreba wotmě tutón tydźeń konferenca komisije za Słowjanski rěčny atlas. Mjezynarodna skupina slawistow zaběraše so ze zwobraznjenjom słowjanskich dialektow w formje rěčnogeografiskich kartow. Njedawno je wušoł w Moskwje dalši zwjazk atlasa, w kotrymž su tež štyri serbske narěče zapřijate.
UNO kritizuje Čěsku
Praha/Genf. Zjednoćene narody wumjetuja Čěskej systematiske ranjenje čłowjeskich prawow migrantow. Knježerstwo w Praze prawdźepodobnje spyta, ćěkancow wottrašić, zo njebychu do kraja přišli, UNO wčera zdźěli. Mjez druhim kritizuja, zo Čěska ćěkancow hač do 90 dnjow pod ponižowacymi wuměnjenjemi interněruje, mjez nimi tež dźěći.
Nowosće wokoło liškow
Krótkopowěsće (22.10.15)
Sakski šef PKK zajaty
Drježdźany. Policija je pozdatneho sakskeho regionalneho šefa zakazaneje kurdiskeje Dźěłaćerskeje strony PKK zajała. 44lětneho dosahnychu jeho wčera při raciji w Drježdźanach, kaž statne rěčnistwo dźensa zdźěli. Jemu wumjetuja čłonstwo we wukrajnej terorowej organizaciji. Dotal bě 44lětny regionalny nawoda w Hannoveru, doniž njepřińdźe do Sakskeje.
„Ostalgija“ tež w Čěskej
Praha. Na teritoriju bywšeje NDR rozšěrjene nastajenje k tradicionalnym produktam z časa do lěta 1990 je tež w Čěskej republice přitomny. Dźeń a wjac předewzaćow spyta tole wužić. Tak je předawarnja Lidl hižo druhi raz wosebity tydźeń ze žiwidłami socialistickeho časa w „originalnym“ zapakowanju přewjedła. Zajim kupcow wočakowanja přetrjechi.
Sakske hospodarstwo robustne
