Krótkopowěsće (14.06.24)
Kruh dźěła zaměrnje dale
Mužakow. Łužica chce so z regionom zeleneje energije stać, kotryž je po cyłej Europje jónkrótny. Wčera su so zastupjerjo Łužiskeho kruha w Mužakowje zešli a so na dalše postupowanje dojednali. Hač do nazymy maja so konkretne namjety zdźěłać. Zdobom je dalše zeńdźenje ze zastupjerjemi EU w Brüsselu předwidźane.
Domowina prosy wo namjety
Budyšin. Zwjazkowe předsydstwo Domowiny namołwja župy, serbske towarstwa, druhe cyłki a jednotliwcow, namjety kandidatow za wólby noweje Rady za serbske naležnosće Sakskeje hač do 15. žnjenca zapodać. Namjety njech pósćelu z wupjelnjenym a podpisanym naprašnikom za kandidatow, kotryž je na internetnej stronje Domowiny přistupny, na .
Wokrjes dyrbi lutować
Krótkopowěsće (13.06.24)
Wićaz nikoho njewumjezuje
Budyšin. Budyski krajny rada Udo Wićaz (CDU) chce ze wšěmi „legitimnje wolenymi wokrjesnymi radźićelemi“ kooperować, tež z tymi, kotřiž su z mandatom AfD abo „Swobodnych Saksow“ woleni. To zdźěli Wićaz w interviewje ze Sakskimi Nowinami. Wuslědki wólbow je wočakował, ludźo so tomu wobaraja, zo spytaja strony a medije jim nanuzować, kak dyrbiš myslić a z kim směš rěčeć.
Prezident wopyta Łužicu
Choćebuz/ Lubnjow. Zwjazkowy prezident Frank-Walter Steinmeier (SPD) wopyta dźensa, štwórtk, Łužicu. Na zetkanju na BTU w Choćebuzu chce so mjezynarodna delegacija, kotraž Steinmeiera přewodźa, wo změnje strukturow we Łužicy informować. Dale stej jězba z čołmikom a přijeće ministerskeho prezidenta Dietmara Woidke planowanej.
Projekty w regionje spěchuja
Rakecy. 15 projektow w regionje dóstanje lětsa spěchowanje přez tak mjenowany LEADER-rum Hornjołužiska hola a haty. Na swojim posedźenju 10. junija je wotpowědny gremij tole rozsudźił, pisa OHTL na swojej internetnej stronje. Dohromady 14 500 eurow woni za projekty nětko nałožuja.
Krótkopowěsće (12.06.24)
Z wěstotu so zaběrali
Choćebuz. W Choćebuzu wotměwaše so dźensa 20. Łužiska konferenca dźěłarniskeho zwjazka DGB Berlin-Braniborska a Sakska. Pod hesłom „Wjace wěstoty w změnje“ diskutowachu něhdźe 150 wobdźělnikow z dźěłarnistwow, zawodow, politiki a wědomosće wo změnje strukturow. Přitomnaj běštaj předsydka DGB Yasmin Fahimi a Choćebuski wyši měšćanosta Tobias Schick (SPD).
Pjenjezy za projekt dóstali
Wojerecy. Němski dźěćacy pomocny skutk spěchuje projekt „Informacije – inscenacija swěta“ ZCOM Konrad Zusoweho muzeja we Wojerecach z 5 000 eurami. Šulerjo 7. lětnika wuwichu w běhu lěta wuměłske instalacije, kotrež so ze zaznawanjom swěta w zwisku z dale a wjac informacijemi zaběraja. Mjez druhim so woni z temami Fake News abo teorijemi zapřisahańcow rozestajachu.
Najwjetši awtowy salon
Krótkopowěsće (11.06.24)
Knježi dwór mjez dobyćerjemi
Moritzburg. Sakske ministerstwo za kulturu a turizm kaž tež sakski krajny turistiski zwjazk stej wčera w Moritzburgu najlěpše přebywanišća Swobodneho stata wuznamjeniłoj. Mjez třomi dobyćerjemi je tež knježi dwór w Dobruši, hdźež su prózdninske bydlenja zaměstnjene. Jako premiju dóstachu dobyćerjo komunikaciski pakćik.
Wuběrk so w Dešnje schadźował
Dešno. Poradźowacy wuběrk za prašenja serbskeho ludu poboku zwjazkoweho ministerstwa za nutřkowne bě wčera w Dešnje, zo by so na swojim posedźenju z połoženjom serbskeho ludu zaběrał. Tučasne financne zrěčenje Załožby za serbski lud běži hač do kónca 2025. Jednanja wo slědowace zrěčenje so hižo wjedu. Nimo toho zeznajomichu so čłonojo wuběrka z projektom „Zorja“, kotryž ma zaměr delnjoserbsku rěč rewitalizować.
Do šule ze šěsć lětami zastupić
Krótkopowěsće (10.06.24)
Myto Worklečanskim šulerjam
Berlin. Šulerjo Serbskeje wyšeje šule we Worklecach su dźensa připołdnju w Berlinje přebywali, zo bychu za swój film „Móšnička w zapadźe, korjenje w serbskej Łužicy“ pjenježne myto přijimali. We wubědźowanju Zwjazkoweje załožby k předźěłanju SED-diktatury pod titulom „Časy přewróta“ běše wón mjez cyłkownje 33 přinoškami prěnje městno zdobył.
Juristiske pruwowanje sej žadali
Lěšće. Předsydstwo župy Delnja Łužica ma hač do přichodneje hłowneje zhromadźizny juristisce přepytować dać, hač smě čłonow wuzamknyć, kotřiž wukonjeja funkciju w Domowinje a dźěłaja w antidemokratiskich a ekstremnych stronach a organizacijach sobu. To je hłowna zhromadźizna župy Delnja Łužica předwčerawšim w Lěšćoch (Hornow) z wjetšinu hłosow wobzamknyła.
Pastoralny koncept přepodaty
Krótkopowěsće (07.06.24)
Pytaja stipendiata
Choćebuz. Město Choćebuz chce w přichodnym semestrje studentow wučerstwa serbšćiny podpěrać a je za to stipendij iniciěrowało. Stipendij we wobjimje 500 eurow chcedźa zajimcej 60 měsacow dołho zapłaćić. Po wuspěšnym zakónčenju studija pak měł so stipendiat zawjazać a pjeć lět šulsku słužbu na dobro serbskeje rěče w Choćebuzu wukonjeć.
Nastaće zakonja tema zetkanja
Budyšin. Wčera, štwórtk, zetkachu so na žurli Serbskeho muzeja šulerki a šulerjo 9. lětnika Serbskeho gymnazija Budyšin ze časowymi swědkami nastaća serbskeho zakonja před 25 lětami. Nimo tehdyšich serbskich zapósłancow w sakskim krajnym sejmje bě tež bywši jednaćel Domowiny Bjarnat Cyž přitomny. Na zarjadowanje běštej Domowina a muzej přeprosyłoj.
Wjele zajimcow za ferialny kurs
Krótkopowěsće (06.06.24)
Zakónčacy koncert młodźiny
Drježdźany. Sakscy, we wobłuku lětušeho wubědźowanja Młodźina hudźi wuznamjenjeni talenty su wčera na Drježdźanskim hrodźe Albrechtsberg koncert mytowanych wuhotowali. Mjez druhim zahra Wotrowčan Adrian Simon na klawěrje, kiž słuša k dohromady 13 wobdźělnikam z wokrjesow Budyšin a Zhorjelc, kotřiž běchu we wurisanju „podestowe“ městna docpěli.
Muzej čěskeho łódźnistwa
Veletov. Najebać połoženja wosrjedź Europy ma Čěska njewočakowano wulku tradiciju mórskeje pławby. We Veletovje pola Kolína chcedźa tohodla w juliju wosebity muzej wotewrić. Ekspozicija měri so na wulku mórsku flotu z časa Čěskosłowakskeje, kotraž bu w 1990tych lětach rozpředata. Přehladka ma samo originalny kapitanski móst zbywaceje łódźe Třinec wopřijimać, kotraž tuchwilu w Rotterdamje na zešrotowanje čaka.
Wjace pjenjez w kapsy
Krótkopowěsće (05.06.24)
Bombu we Wostrowcu namakali
Wostrowc. Wčera, wutoru, popołdnju běchu dźěłaćerjo we Wostrowcu bombu z druheje swětoweje wójny namakali. Bomba ležeše po wuprajenjach krajnoradneho zarjada w Zhorjelcu wosrjedź bydlenskeje štwórće. Tutu ewakuěrowachu. Někak 200 ludźi dyrbješe swoje bydlenja wopušćić. Tež klóšter Marijina hwězda dyrbjachu knježnje wopušćić.
Rozprawu wo Serbach schwalili
Podstupim. Braniborske knježerstwo je wčera popołdnju druhej rozprawje wo połoženju serbskeho luda w braniborskej přihłosowało. Ministerka za kulturu a wědomosć Manja Schüle (SPD) je mjez druhim na to pokazała, zo bu financowanje Załožby za serbski lud wo pjeć milionow eurow zwyšeny a zo bě móžno, digitalne poskitki za přiswojenje a hajenje rěče wutwarić.
Wuslědki ewaluacije předleža
Krótkopowěsće (04.06.24)
Casnik z nowej šefredaktorku
Choćebuz. Katalin Porackojc je z nowej šefredaktorku delnjoserbskeho tydźenika Nowy Casnik. Wona bě tele zastojnstwo wot lońšeho junija komisarisce wukonjała a nastupi regularne nawodnistwo wróćo sahajo lětsa 1. meje. Porackojc je serbsko-madźarskeho pochada a bě dotal mjez druhim w Serbskej tkalčej stwě w Drojwku a za Domowinu dźěłała. Krabat wospjet filozofisce
Budyšin. Ludowe nakładnistwo je powědančko „Čorny młyn“ Jurja Brězana znowa wudało. Serbska wersija wuchadźa w mjeztym 3. a němska z titulom „Die schwarze Mühle“ w mjeztym hižo 5. nakładźe. Knize wěnujetej so z filozofiskim narokom powěsći wo Krabaće. Na předań stej wobě, kruće wjazanej a ilustrowanej wudaći mjez druhim w Smolerjec kniharni.
Lautech spěchowanje dóstał
Wojerecy. We Wojerecach nastanje nowy centrum za twarjenje a bydlenje. Wčera je sakski minister za regionalne wuwiće Thomas Schmidt (CDU) wotpowědnu spěchowansku zdźělenku we wobjimje 5,7 milionow eurow jednaćelce Łužiskeho technologiskeho centruma Lautech tzwr Kathrin Schlesinger přepodał.
Krótkopowěsće (03.06.24)
Dalši zajimc so přizjewił
Wětošow. Za wobhospodarjenje Radušanskeho słowjanskeho hrodźišća staj nětko dwaj zajimcaj. Nimo Załožbje Slavonic Europe je to Choćebuske předewzaće JES tzwr, kotraž je znate pod mjenom „Die Bademeusel“, wobkrući nětko měšćanski zarjad we Wětošowje. Předewzaće z Łužicy chce so předewšěm poskitkam za dźěći wěnować.
Błysk na swjedźenju zadyrił
Liberec. 18 ludźi, mjez nimi dźewjeć dźěći, přebywaše na dźěćacym swjedźenju w parku, jako błysk zadyri. Wjetšina z nich běše nachwilnje bjez wědomja, nichtó pak njeměješe wopalenja – to zdźěli rěčnik chorownje w Liberecu. Jedne dźěćo wuleća helikopter do uniwersitneje kliniki w Praze.
Čěsku Šwicu spřistupnić
