Krótkopowěsće (04.12.24)
Brošurka wo mjeńšinach wušła
Berlin. Nowe wudaće informaciskeje brošurki zwjazkoweho ministerstwa nutřkowneho (BMI) wo připóznatych domoródnych narodnych mjeńšinach je njedawno wušło. Móžeće sej 92stronski zešiwk wo Serbach, Sintach a Romach, Danach, Frizach a delnjoněmčinje na internetnej stronje BM pod „serwis“ a „publikacije“ pak downloadować pak darmotnje skazać.
Wyše wudawki wobzamknyli
Budyšin. Budyski wokrjesny sejmik je na swojim posedźenju zawčerawšim wyše wudawki we wobjimje 700 000 eurow za ponowjenje Kamjenskeje spěchowanskeje šule wobzamknył. W zwisku z přetwarom su fachowcy škódne twarske maćizny zwěsćili. Tuž je nětko wobšěrne ponowjenje kubłanišća trěbne. Šulerjow přechodnje druhdźe wuwučuja.
Sta skóržbow zapodali
Krótkopowěsće (03.12.24)
Dohodowna překwapjenka
Budyšin. Čitarjo Płomjenja dóstachu minjene lěta z decemberskim wudaćom zdobom tež wosebitu dohodownu překwapjenku. Lětsa je to něšto wosebite: prěni serbski Micky-Maus-zešiwk! Comicsy z Donaldom, Mickyjom, Goofyjom a dalšimi wobydlerjemi městačka Entenhausen drje kóžde dźěćo znaje. Přiłoha Płomjenja wobsahuje tři comicsy, žortny hodowny kwis a poprjancowy recept.
Wobaraja so wotbagrowanju
Rowno/Budyšin. Wobsedźerjo ležownosće w lěsu pola Rownoho su na wyšim zarjadniskim sudnistwje skóržbu přećiwo wuswojenju za rozšěrjenje Wochožanskeje wuhloweje jamy zapodali. Zelena liga, kotrejež wobswětowa skupina Choćebuz jako wotnajer poł hektara płoniny wužiwa, skóržbu podpěruje. Planowane wotbagrowanje so přećiwo škitej klimy přeńdźe, kritizuje prawiznik.
Dóstanu pjenjezy za přetwar
Krótkopowěsće (02.12.24)
Woprašowanje wo Europeadźe
Budyšin. Šuler Budyskeho serbskeho gymnazija Milan Jurk w zwisku z fachowym dźěłom woprašowanje wo Europeadźe přewjeduje. Tak chce mjez druhim wuslědźić, hač ludźo wočakuja, zo koparjo serbskeje wubranki serbuja abo znajmjeńša serbsce rozumja. Formular z dźesać prašenjemi je w interneće přistupny pod: https://forms.gle/RC9737 A1wKy8a fgd7
Florian Oest nominowany
Zhorjelc. Šef CDU Zhorjelskeho wokrjesa Florian Oest jako direktny kandidat za wólby zwjazkoweho sejma 23. februara nastupi. Čłonojo CDU su nana dweju dźěsći minjeny pjatk nominowali. Oest chce so předewšěm wo spěšny železniski zwisk wot Berlina do Zhorjelca prócować. Tež hospodarskej a socialnej politice chce so wón wěnować.
Młodostneho ćežko zraniłoj
Krótkopowěsće (29.11.24)
Dale a wjac horceho wina
Langenbernsdorf. Brěčkownje w Sakskej sej dale a wjac pjenjez z produkciju horceho wina zasłužeja. Běše wobrot w lěće 2013 něhdźe 120 000 eurow, su čłonske zawody sakskeho zwjazka za brěčki 2023 wšo dohromady 500 000 eurow dochodow w tutym wobłuku docpěli. Kaž Andreas Mehlhorn, předsyda zwjazki, zdźěli, předawaja hłownje na adwentnych wikach, ale tež na swojim dworje.
Serbšćinu do muzejow zapřijeć
Stróža. Jědnaće zajimcow je so na prěnim dalekubłanju za muzeje a domizniske stwy projekta ZARI pod nawodom Sonje Hrjehorjoweje a Jadwigi Bryckec wobdźěliło. Po wodźenju Marlis Konjechtec po šulskim muzeju su so w Domje tysac hatow na zakładźe přednoška Svena Vogta („Łužiski kraj muzejow“) tež z tym zaběrali, kak móhli hišće bóle serbšćinu do wšědneho dźěła zapřijeć.
Dwójne staćanstwo zběhnyć?
Krótkopowěsće (28.11.24)
Šěsć linkow za serbski lud
Podstupim. Mjez 2 463 linkami koaliciskeho zrěčenja SPD a BSW w Braniborskej je tež šěsć linkow serbskemu ludu wěnowanych. Renate Harcke, rěčnica AG etniskich mjeńšin Lěwicy, kritizuje, zo chcedźa „sorabistiku na BTU Choćebuz-Zły Komorow zesylnić“. Tam pak žana njeje a Serbja sej sorabistiku nježadaja, ale přeja sej wukubłanje wučerjow w předmjeće serbšćina za zakładnu šulu.
Saněruja Körse-termu
Korzym. Ministerski prezident Michael Kretschmer přepoda wčera Körse-termje w Korzymju za saněrowanje spěchowansku zdźělenku we wysokosći 18,9 mio. eurow. Planuja ponowjenje techniki a nowy dźěćacy wobłuk. Runje tak chcedźa sawnu rozšěrić. Cyłkowne kóšty wučinjeja něhdźe 26 milionow eurow.
Čas bjez wuslědka wotběžał
Krótkopowěsće (27.11.24)
Chcedźa wjace ćahow zasadźić
Budyšin. Wobchadny zaměrowy zwjazk (ZVON) je na swojej wčerawšej zhromadźiznje w Budyšinje wobzamknył, zo chce přidatne ćahi zasadźić. Naprašowanjow je mjenujcy dale a wjace, na čož chce ZVON reagować. Tak rozmysluje ZVON wo tym, mjez Biskopicami a Drježdźanami město dweju cyłkownje tři ćahi na hodźinu zasadźować a zwiski sobujěducym tak polěpšić.
Druhi raz „Oscara“ dobył
Motydło. Časnikarja Stefana Kudoke z Motydła (Weifa) su druhi raz z tak mjenowanym Oscar „Petite Aiguille Award“ časnikoweje industrije wuznamjenili. Z modelom „Kudoke 2“ je wón hižo 2019 wubědźowanje dobył. Nětko je wón z „KUDOKE 3 salmon“ druhi raz mjezynarodnu jury přeswědčił. Hižo srjedź nowembra je myto na wikach w Genfje přijał.
Šuli spěchowanje přizwolili
Krótkopowěsće (26.11.24)
Wjace pjenjez hatarjam
Hamor. Swobodny stat spěchowanje za wobhospodarjenje hatow, kotrež je přirodźe bliske, w přichodźe jasnje powyši, zdźěli wčera sakski minister za ratarstwo Wolfram Günther (Zeleni) w Klětnom. Tam bě hatarstwo wopytał. Sakska chce přidatnje 4,4 miliony eurow spěchowanskich srědkow k dispoziciji stajić.
Solarny park dotwarili
Wjelcej. Solarny park Haidemühl na kromje jamy Wjelcej-juh je dotwarjeny. Wčera je koncern Łužiska energija a milinarnja (LEAG) wobhospodarjenje parka zahajił. Park je jedna z naprawow, z kotrejž chce energijowe předewzaće zelenu milinu produkować. Milina ma so z pomocu swójskeje syće při milinarni Čorna Pumpa do syće wobhospodarjerja 50 Hertzow wjesć.
Zwólniwosć domiznu škitać
Krótkopowěsće (25.11.24)
Serbski sejm: Dotal 400 wolerjow
Njebjelčicy. Za wólby 2. Serbskeho sejma je 33 kandidatow namjetowanych. To zdźěli předsyda wólbneje komisije Siegfried Kühn dźensa našemu wječornikej. Čas za zapodaće kandidaturow za 24 městnow Serbskeho sejma je nimo, wolerjo pak móža so hišće hač do klětušeho 23. februara přizjewić. Dotal je so w běhu poł lěta něhdźe 400 ludźi do lisćiny wolerjow zapisać dało.
Přećiwo antisemitizmej wustupili
Budyšin. Něhdźe 140 ludźi je so wčera na „pochodźe přećiwo antisemitizmej“ po Budyskim nutřkownym měsće wobdźěliło. Podłu čary bě pjeć stacijow z kopolakami, hdźež spominachu woni na wosudy Židow a Židowkow za čas nacionalsocializma w Budyšinje.
Hłowne myto Ladinjance
Krótkopowěsće (22.11.24)
Jako „turistiski rjek“ mytowany
Lipsk. Referent Domowiny a předsyda towarstwa Serbski kulturny turizm Pětr Brězan je wčera w Lipsku za swoje zasłužby we wobłuku regionalneho turizma wuznamjenjenje „turistiski rjek“ dóstał. Sakske ministerstwo za wědomosć, kulturu a turizm je cyłkownje 55 ludźi na Lipšćanskich turistiskich wikach počesćiło. Březan bě jedyn z nich.
Serbaj na „Liet international“
Bastia. Na hudźbnym wubědźowanju w mjeńšinowych rěčach „Liet international“, kotrež so dźensa na kupje Korsika wotměwa, wobdźěli so tež delnjoserbska spěwarka Lena Hauptmannojc z pěsnju „Co by nadejšła“. Choćebužanka studuje jazz-spěwanje w Lipsku. Mjez jurorami je lětsa prěni raz tež Serb, hudźbny redaktor Serbskeho rozhłosa Handrij Špitank.
Ukrainjenjo etatej tyja
Krótkopowěsće (21.11.24)
Klětu dóstanu wjace mzdy
Radebeul. Sakska metalowa a elektroindustrija přewozmje Hamburgske tarifowe wobzamknjenje. Na to dojednachu so dźěłarnistwo IG metal a dźěłodawarjo zawčerawšim w Radebeulu. Z tym změje 160 000 přistajenych branše w Swobodnym staće wjace mzdy. W februaru dóstanu woni jónkrótnje 600 eurow. Wot apryla budźe mzda wo 2 proc. stupać. Dalše zwyšenje je w aprylu 2026 planowane.
Łopjena z trutami rozdźěla
Wjelcej. Hladajo na rozšěrjenje nawěškowych łopjenow dale a wjac roznošowarjow pobrachuje. Towaršnosć za roznošowanje Łužica chce w přichodźe truty zasadźić, kotrež maja wot lětanišća we Wjelcej sem domjacnosće w regionje posłužeć. Lětanske objekty towaršnosć za logistiku Morpheus w sewjerorynsko-westfalskim Lüdenscheidźe wodźi. Najprjedy raz maja truty „Lausitzer Woche“ a „LR Tipps“ rozdźělić.
Wjerški minjeneju lětdźesatkow
