Krótkopowěsće (12.12.23)
Serbska etaža w Drježdźanach?
Drježdźany. W najstaršim Drježdźanskim studentskim klubje „Gutzkowclub“ su so serbscy studenća wčera na adwentničce z předsydu Domowiny Dawidom Statnikom, kubłanskej referentku třěšneho zwjazka Katrin Suchec-Dźisławkowej a jednaćelom Serbskeho šulskeho towarstwa Andreasom Ošiku zetkali. Mjez druhim su wo móžnym znowawutworjenju serbskeje etaže studowacych rěčeli.
Tež negatiwne wuskutki
Choćebuz. Reforma braniborskich wokrjesow před 30 lětami měješe tež negatiwne wuskutki na Serbow, rjekny stawiznar dr. Pětš Šurman ze Serbskeho instituta. Kaž Serbski rozhłós RBB rozprawja, mějachu Serbja do 1993 jednoho zamołwiteho za cyły Choćebuski wobwod. Na to dźěłaštej jenož w Choćebuzu a we wokrjesu Sprjewja-Nysa (SPN) hłownohamtskej społnomócnjenej. Serbstwo móhło so we wokrjesu SPN chětřišo wuwiwać hač w susodnych wokrjesach.
Palestinsku parolu zakazali
Krótkopowěsće (11.12.23)
SN dźěło fotografow připóznawaja
Berlin. Serbske Nowiny su nimo dźenikow Mainpost a Landshuter Zeitung znowa přikładne nastupajo prawo fotografowkow a fotografow, zo so jich mjeno wozjewja. Wo tym informowaše Zwjazk žurnalistow Němskeje (DJV) dźensa w Berlinje. Při wuhódnoćenju zwěsćachu, zo steji w Serbskich Nowinach pod sto procentami fotow mjeno awtora. „Njeńdźe jenož wo zakoń, ale wo připóznaće dźěła“, rjekny Mika Beuster, zwjazkowy předsyda DJV.
Z Choćebuza do Żaganja direktnje
Choćebuz. Direktny ćah DB Regio zwjaza jako RB93 pjeć razow wot póndźele do pjatka a dwójce kónc tydźenja nětko Choćebuz z pólskim městom Żaganjom we wojewódstwje Lubuskie. Dotal dyrbjachu pasažěrojo w Baršću do pólskeho ćaha přestupić. Změna płaći z nowym jězbnym planom wot wčerawšeje njedźele. Dotalny poskitk ćahow mjez Choćebuzom a Baršćom so njezměni.
Dźak za čestnohamtstwo
Krótkopowěsće (08.12.23)
Michał Lorenc njeboh
Budyšin. Dźiwadźelnik, režiser a awtor Michał Lorenc je 84lětny 6. decembra zemrěł, kaž Němsko-Serbske ludowe dźiwadło zdźěla. Jewišću bě wón wot załoženja w lěće 1963 swěrny. Ze starosće wo dorost bě Lorenc 1992 Młodźinske dźiwadło na Serbskim gymnaziju a 1994 Serbske činohrajne studijo załožił. Jako prěni je wot 1998 funkciju zastupjerja intendanta za serbske dźiwadło wukonjał. Jako awtor je 600lětne stawizny Budyskeho dźiwadła wuslědźił a publikował.
Jednaćela rozžohnowali
Miłoćicy. Z wjelelětnym jednaćelom Peterom Neunertom je so Miłoćanski křesćansko-socialny kubłanski skutk wčera rozžohnował. Wón bě zdobom jednaćel Sakskeho krajneho kuratorija za wjesny rum, za čož dźakowaše so jemu předsydka Marja Michałkowa. We woběmaj funkcijomaj naslědowaše jeho lětsa w meji Marko Kliman.
„Krisenmodus“ słowo lěta
Krótkopowěsće (07.12.23)
Dwójnemu etatej přizwoliła
Zhorjelc. Hačrunjež planuje wokrjes Zhorjelc w lětomaj 2023/2024 wjac pjenjez wudać, hač dochodow wočakuje, je Sakska krajna direkcija dwójnemu etatej předwčerawšim přizwoliła. Móžno běše rozsud jenož Sakskeho wukaza za wolóženje hospodarstwa za čas energijoweje krizy dla. Krajna direkcija je zdobom 40 milionow eurow financneje podpěry za wokrjes schwaliła.
Biblioteka předata
Wostrowc. Swobodny stat Sakska je z podpěru wuměłskeje załožby Ernst von Siemens biblioteku klóštra Marijiny doł kupił. Wona je historisce wusahowaca a ma so tak za přichodne generacije zachować. Biblioteka ma w přichodźe zaměrnje za zjawnosć přistupna być. Dohromady inwestuja po dołhich jednanjach z klóštrom 5,5 milionow eurow.
Nowy zastupowacy direktor
Krótkopowěsće (06.12.23)
Burja dóstanu zarunanje
Drježdźany. Hladajo na pozdźišo wupłaćene pjenjezy EU, kotrež so wot decembra na februar přesunu, dóstanu ratarjo w Sakskej pjenježne wurunanje. Na to dojednachu so wčera zapósłancy kabineta. Wurunanje je jónkrótne a pawšalne a dyrbi kóšty na přikład danje kreditow zarunać. Kelko ratarskich zawodow je w nuzy a budźe próstwu zapodać, dotal jasne njeje.
Wjesne kónčiny spěchować
Drježdźany. Sakska wobdźěli so z wosom regionami na zwjazkowym programje „Aller.Land“, z kotrymž so wjesne kónčiny w kulturnym wobłuku spěchuja. Nimo Budyskich wjesnych kónčinow je tež sewjerny Zhorjelski wokrjes zapřijaty. W cyłku je 93 wjesnych regionow po cyłej Němskej wobdźělene, zdźěli zwjazkowe ministerstwo za kulturu a turizm.
Při ponowjenju pomhać
Krótkopowěsće (05.12.23)
Mobilnje operować
Wojerecy. Sobudźěłaćerjo Wojerowskeho klinikuma Łužiska jězorina změja jutře wosebite dalekubłanje. Na hospodarski dwór klinikuma přijědźe mobilna operaciska žurla. Tam móža mjez druhim lěkarjo, personal za operacije a we wobłuku hladanja skutkowacy operaciske instrumenty testować abo implantaty do kumštnych kosćow zasadźić.
Serbskej klubaj dobyłoj
Biskopicy. Mjez dobyćerjemi Myta za młodźinski angažement w Budyskim wokrjesu stej młodźinskej klubaj Chrósćicy a Radwor. Lětsa je so 16 klubow, zarjadnišćow a jednotliwcow wo myto pola Biskopičanskeje Syće za dźěći a młodźinu (KiJu) požadało. Mjez nimi běchu runje tak nominowani akterojo. Z młodostnych wobstejaca jury je dźesać dobyćerjow wuzwoliła.
Wučerjo za sněhakowanje faluja
Krótkopowěsće (04.12.23)
Nětko za šulske myto požadać
Drježdźany. Sakske kultusowe ministerstwo pyta sedmy raz kubłanišća, kotrež wuznamjenjeja so z wosebitymi projektami hladajo na wudźeržliwosć a poćah k šulskemu programej abo kotrež zapřijeja na wosebite wašnje tež wulku ličbu staršich a eksternych partnerow. Požadać móža so šule wšitkich družin hač do 8. januara. Wšě informacije www.schulpreis.sachsen.de
SŠT wo změnach informuje
Budyšin. Na hłownej wólbnej zhromadźiznje 15. decembra chce předsydstwo Serbskeho šulskeho towarstwa (SŠT) swojich čłonow wo tuchwilnym stawje změnow Sakskeho ministerstwa za kultus hladajo na serbske šule informować. Zhromadnje z Domowinu prócuje so SŠT mjeztym hižo dlěje hač lěto wo aktualizowanje płaćiwych postajenjow. Planowane je mjez druhim koło serbskich šulskich nawodow.
Swětowe mišterstwo we Łužicy
Krótkopowěsće (01.12.23)
Towarstwo z nowej předsydku
Budyšin. Čłonojo Towaršnosće za spěchowanje Serbskeho ludoweho ansambla z.t. dźakowachu so wčera na hłownej a wólbnej zhromadźiznje swojemu dołholětnemu předsydźe Sieghardej Kozelej za nawod towarstwa. Po rozprawje dźěławosće minjenych štyrjoch lět a wuwjazanju dotalneho předsydstwa ze zamołwitosće wuzwolichu nowe předsydstwo z předsydku Jěwu-Marju Čornakec.
Frank Hirche direktny kandidat
Wulke Zdźary. Direktny kandidat CDU za klětuše wólby sakskeho krajneho sejma we wólbnym wokrjesu 55 (Budyšin 4) je Frank Hirche. 62lětny bywši krajny zapósłanc (2009–2019) z Wojerec docpě wčera na wólbnej zhromadźiznje CDU we Wulkich Zdźarach w druhim wólbnym kole 32 hłosow. W prěnim kole njejsu Hirche (28), Birgit Elsnerowa z Radworja (20) a Christian Behring z Wojerec (11) trěbnu wjetšinu 30 hłosow měli.
Regionalny adwentny kalender
Krótkopowěsće (30.11.23)
Bjezdźěłnosć snadnje rozrostła
Budyšin. We wuchodnej Sakskej běše w nowembrje 19 594 bjezdźěłnych, 142 resp. 0,7 procentow wjace hač w oktobrje. Wo tym je Budyska wotnožka Zwjazkoweje agentury za dźěło dźensa informowała. Jako přičinje snadneho rozrosta bjezdźěłnosće w regionje mjenuja słabu konjunkturu, nowy job dóstać je wo wjele ćešo. Zdobom su prěnje přizjewjenja bjezdźěłnych ze sezonowym dźěłom z ratarstwa, lěsnistwa a zahrodnistwa
Pjenjezy za dźiwadła
Drježdźany. Sakska statna ministerka za kulturu a turizm, Barbara Klepsch (CDU), je so ze zastupjerjemi regionalnych dźiwadłow a orchestrow na to dojednała, je za pobrachowace pjenjezy 2023/2024 ze 4,6 milionami eurow podpěrać. Předsyda krajneho zwjazka Němskeho jewišćoweho towarstwa, Lutz Hillmann, je přez tute wuwiće jara zbožowny.
Potrjechenych podpěrować
Krótkopowěsće (29.11.23)
Wjelka popadnyli
Ochranow. Sakski zarjad za wobswětoškit, ratarstwo a geologiju je wčera wopodstatniło, zo dyrbjachu fachowcy choru wjelčicu popadnyć a zasparnić. Młode zwěrjo běše widźomnje słabe. Wjacore ludźi su wjelka minjenu njedźelu w Großhennersdorfje blisko Ochranowa wuhladali a to přizjewili.
Cyłoněmski semesterski tiket
Drježdźany. Na jednotny semesterski tiket, kotryž ma z lětnim semestrom 2024 startować, su so Zwjazk a kraje předwčerawšim dojednali. Studentam zmóžni so tak tiket z měsačnej płaćiznu 29,40 eurow. Woni smědźa z nim wšitke wobchadne srědki zjawneho wosoboweho bliskowobchada wužiwać. Studentske zastupnistwa dojednaja so k tomu z wotpowědnymi tarifowymi zwjazkami.
Darja Ukrainje helikopter
