Krótkopowěsće (15.07.22)
Michaela Hariga rozžohnowali
Budyšin. W Budyskim krajnoradnym zarjedźe su wjelelětneho krajneho radu Michaela Hariga (CDU) dźensa oficialnje ze zastojnstwa rozžohnowali. Při tutej składnosći přepoda jemu Wolfgang Zender, jednaćel Wuchodoněmskeho zwjazka nalutorwarnje, Medalju dr. Johanna Christiana Eberle. Z tym připóznaja zasłužby Hariga wo wuwiće Budyskeje lutowarnje a lutowarnistwa w regionje.
Ličba mortwych porodow přiběra
Wiesbaden. Nimale kóžde 230. dźěćo w Němskej so mortwje narodźi. Po niskim stawje 2007 kwota tendencielnje zaso přiběra, kaž dźensa Statistiski zwjazkowy zarjad we Wiesbadenje zdźěla. Loni narodźi so w zwjazkowej republice 3 420 dźěći mortwych, štož wotpowěduje 4,3 mortwych porodow na 1 000 narodźenych. Jedna z přičin je stupaca staroba maćerjow.
Wopomnišćo město kormjernje
Krótkopowěsće (14.07.22)
Zawostajenstwo online
Budyšin. Serbski institut informuje, zo je wotnětka z digitalizowanym zawostajenstwom Kita Šwjele a Bogumiła Šwjele wažny wobstatk serbskeho kulturneho namrěwstwa online přistupny, na přikład na portalu SI SORABICON. Prezentacija dokumentow z wobrazami, metadatami a přidatnymi informacijemi je wuslědk digitalizaciskeho projekta Serbskeho kulturneho archiwa, spěchowaneho wot Němskeho slědźerskeho zwjazka.
Serbske wustawki změnjene
Radwor. Na swojim wčerawšim posedźenju su čłonojo Radworskeje gmejnskeje rady wustawki wo spěchowanju serbskeje rěče a kultury změnili. Jednaše so wo wotrězk, kotryž postaja tamnišu Domowinsku skupinu za partnera gmejny w serbskich naležnosćach. Wotnětka smědźa so tež druzy za čestnohamtske dźěło społnomócnjeneho za serbske naležnosće pola gmejny přizjewić. Wšitke druhe wotrězki wostanu njezměnjene.
Bohačík změni do Němskeje
Krótkopowěsće (13.07.22)
Swoju poziciju wobkrućili
Wojerecy. Předsydstwo župy „Handrij Zejler“ je wčera na swojim doprózdninskim posedźenju we Wojerecach poziciju wobkrućiło, zo njeměli žane wuwzaća być, kotrež bychu zjawnosć hłownych zhromadźiznow Domowiny wobmjezowali. Gremij bě wurjadnu hłownu zhromadźiznu třěšneho zwjazka 3. junija w Choćebuzu wuhódnoćił, hdźež wjetšina delegatow wotpowědny namjet župy za změnu wustawkow sćěhowała njebě.
Pawołska šula mytowana
Drježdźany. Rakečanska Ewangelska Pawołska šula słuša z projektom „Pawołska šula sej historisku biblioteku w Rakečanskej ewangelskej cyrkwi wotkrywa“ k dohromady 26 lawreatam krajneho programa „Pegasus – šule pomniki adoptuja“ za šulske lěto 2022/2023 a změje za to premiju. Wo tym je sakske kultusowe ministerstwo wčera informowało.
Wobornicy w zymowej komorje
Krótkopowěsće (12.07.22)
Wuspěšny spěwny swjedźeń
Poršicy. Na 60 ludźi je wčera wječor přišło na serbski spěwny swjedźeń do Poršic, kotryž wotmě so jako zazběh swjedźenskeho tydźenja składnostnje 800teho jubileja wsy. Skupina Přezpólni zanošowaše z wopytowarjemi hač do pózdnich hodźin jednu štučku po druhej. To budźeše w někotrymžkuli wopytowarju dopomnjenki na dźěćacy čas, jako w Poršicach a wokolnych wsach na tójšto kwasach hišće serbsce spěwachu.
Prastare swětłožołmowe signale
Paris. Swětnišćowe agentury ESA (wjacore europske kraje), NASA (USA) a CSA (Kanada) su dźensa prěni regularny wobraz, sfotografowaneho wot kosmosoweho teleskopa „James Webb“, wozjewili. Dotal „najbóle detailěrowane foto swojeho razu“ pokazuje mólički wurězk uniwersuma, kajkiž před něhdźe 4,6 miliardami lětami wupadaše.
Wraki ruskich tankow w Praze
Krótkopowěsće (11.07.22)
Hilbert dale w zastójnstwje
Drježdźany. Dirk Hilbert wostanje wyši měšćanosta stolicy Sakskeje. Kandidat towarstwa „Njewotwisni wolerjo za Drježdźany“ zdoby sej při wčerawšich rozsudnych wólbach 45,3 proc. hłosow. Prěni raz po lěće 1994 poradźi so tak amtěrowacemu měšćanosće tam znowawuzwolenje. Na druhim resp. třećim městnje slědujetaj Eva Jähnigen (Zeleni) z 38,3 proc. a Maximilian Krah (AfD) 12,2 proc.
Sydom wosobow kandiduje
Choćebuz. Sydom wosobow nastupi k wólbam Choćebuskeho wyšeho měšćanosty 11. septembra. Su to Lars Schieske (AfD), Thomas Bergner (CDU), Tobias Schick (SPD), Sven Benken (Naš Choćebuz), Felix Sicker ( FDP), Lysann Kobbe (Die Basis) a kandidat-jednotliwc Johann Staudinger. Wokrjesny wólbny wuběrk je jich minjeny pjatk wobkrućił. Wyši měšćanosta Holger Kelch (CDU) zastojnstwo ze strowotniskich přičin złoži.
Róčnicu „wowki“ wopominali
Krótkopowěsće (08.07.22)
Isa Bryccyna prezidentka
Budyšin. Serbska grafikarka, ilustratorka, molerka a wuhotowarka w Ludowym nakładnistwje Domowina Isa Bryccyna je nowa prezidentka Rotary kluba Budyšin. Wona je wčera na jedne lěto zastojnstwo wot Bernharda Johna přewzała. Jako prezidentka chce so tež serbskim temam wěnować. Dotal je so wona wjacore lěta w předsydstwje kluba wo prawidłowne přednoški a referentow starała.
Dešć jeno zlochka pomhał
Lubin/Luboraz. W kónčinje lěsneho wohenja w Luborazskej holi wulkozasadźenje wohnjowych woborow, policije a zwjazkoweje wobory traje. „Dešć je jeno zlochka pomhał“, rjekny wčera rěčnica wokrjesa Dubja-Błóta Kathrin Veh. Region wjace spadkow trjeba. Póndźelu wudyrjeny lěsny woheń po přestrjeni 86 hektarow so dale njewupřestrěwa. Zaměr bě, woheń wčera zhašeć.
Nohajcy z Havelom njebudu
Krótkopowěsće (07.07.22)
Rědku pčołku našli
Radebeul. Rědku družinu dźiwich pčołkow su po informacijach wobswětoweho zwjazka BUND w Radebeulskich winicach wotkrywali. Pod Bismarckowej wěžu a w bliskej winicy su dwě čerwjenej dwuzubowej pčołce (Dioxys cincta) našli, organizacija wčera zdźěla. Mjeno poćahuje so na formu chribjetneho tarčika insekta. Pčołka je jara rědka, w Němskej su ju dotal jenož w Braniborskej zwěsćili.
Nowa přiručka za šule
Budyšin. Nowa zběrka z wjace hač 90 serbskimi poskitkami za šule po cyłej Łužicy je wušła a hižo pod přistupna. Kubłanska referentka a regionalne rěčnicy Domowiny su lisćinu zestajili a wjednistwam wšěch šulow, na kotrychž serbšćinu wuwučuja, připósłali.
Wojowanje wo Ještěd
Krótkopowěsće (06.07.22)
Jeničke zawrjene pasmo
Drježdźany/Rakecy. Noweho pada afriskeje swinjaceje mrětwy pola Rakec dla wobě zawrjenej pasmje II w Sakskej zjednoća, kaž socialne ministerstwo wčera w Drježdźanach zdźěla. Pufrowa cona mjez dotalnymaj zawrjenymaj pasmomaj we wokrjesach Mišno/Budyšin a Zhorjelc je zběhnjena. Restrikciska cona saha wot mjezy z Pólskej hač k Łobju na zapadźe. Na juhu wobmjezuje ju čara B 6 wot Klipphausena hač do Zhorjelca.
Spěchuja festiwal NSLDź
Drježdźany. Němsko-Serbske ludowe dźiwadło změje spěchowanje we wysokosći nimale 20 000 eurow z programa „Kulturny kraj 2022. Sakska jako jewišćo“ za festiwal „Witajće druhdźe“ wot 21. do 23. oktobra. Předstajić chcedźa tam pjeć swójskich produkcijow NSLDź a dalše inscenacije z Mnichowa, Berlina a Drježdźan, kaž je Sakska kulturna załožba informowała.
Předewzaća zhubjene njejsu
Krótkopowěsće (05.07.22)
Šefredaktor SN wupowědźił
Budyšin. Janek Wowčer je swoje dźěłowe zrěčenje jako šefredaktor Serbskich Nowin a wotrjadnik za nowiny a časopisy w Ludowym nakładnistwje Domowina wupowědźił. Wón chce so w přichodźe druhim nadawkam wěnować. Jednaćelstwo nakładnistwa nětko proces znowawobsadźenja pozicije organizuje.
Informowanišćo anticyganizm
Berlin. Po cyłym Zwjazku skutkowace informowanišćo anticyganizm (MIA) je swoje dźěło dźensa w Berlinje zahajiło. Nowe zarjadnišćo chce na wobstejace deficity w systemje prawidłow skedźbnjeć a njejasny wobłuk anticyganistiskich podawkow w Němskej registrować. Wo wonkownych formach a rozměrje anticyganizma w towaršnosći rozswětlić, přiměrjeny poradźowanski poskitk potrjechenym natwarić kaž tež zjawnosć a politikarjow sensibilizować su zaměry MIA.
Dalši lockdown njepřetraja
Krótkopowěsće (04.07.22)
Dietze zastojnstwo złožiła
Berlin. Nawodnica wobwoda dźěłarnistwa IG metal za Braniborsku, Saksku a Berlin Birgit Dietze je swoje zastojnistwo k 1. julijej złožiła. Hakle 1. oktobra 2020 je wona nadawki přewzała. Přičina za wupowědźenje su wšelake wosobinske naležnosće a druha powołanska perspektiwa. Koordinaciju wobwoda je nětko Stephan Vetter přewzał.
Z wyšim měšćanostu rěčeli
Wojerecy. Prezenca serbskeje rěče w šulach města, spěchowanje motiwacije za wuknjacych přez přiličenje za maturu (2. cuza rěč) kaž tež lěpšiny a móžnosće za wutworjenje samopostajowaceje korporacije serbskeho ludu stejachu minjeny pjatk w srjedźišću rozmołwy Wojerowskeho wyšeho měšćanosta Torstena Rubana-Zeha (SPD) z čłonami Serbskeho sejma Anetu Zahrodnikowej, Hagenom Domašku a Měrćinom Krawcom.
Šćěpiwa efektiwne
