Krótkopowěsće (31.01.22)
Ličba natyknjenjow dale přiběra
Budyšin. Incidenca po Roberta Kochowym instituće je dźensa w Budyskim wokrjesu na 533,9 a w Zhorjelskim na 676,1 stupiła. Minjeny pjatk rozprawješe wokrjes Budyšin wo 219 natyknjenjach z koronawirusom a štyrjoch w tymle zwisku zemrětych pacientach. We wokrjesu Zhorjelc bě to 323 infekcijow a runje tak štyri smjertnych padow.
Lěwica žada sej konsekwency
Budyšin. Frakcija Lěwicy w Budyskim wokrjesnym sejmiku ma wuprajenja 1. přirjadnika krajneho rady Uda Wićaza (CDU) składnostnje demonstracije přećiwnikow šćěpjenja minjenu póndźelu „za jasnu namołwu prawo łamać“. Frakcija krajneho radu Michaela Hariga a krajnu direkciju namołwi na to reagować. Wot CDU w Budyskim wokrjesu wočakuje jasne stejišćo wopačneho jednanja jeje móžneho kandidata za wólby krajneho rady dla.
Zdarma na njewšědnych městnach
Krótkopowěsće (28.01.22)
Wokrjesny zjězd rozsudźi
Budyšin. Wuprajenja Uda Wićaza, prěnjeho přirjadnika Budyskeho krajneho rady, póndźelu demonstrantam je wokrjesne předsydstwo CDU předwčerawšim rozjimało. Tam je krajny rada Michael Harig wobžarował, zo nasta zaćišć, wokrjes Budyšin zwjazkowe zakonje njenałožuje. Podobnje wupraji so tež Udo Wićaz sam. Kontrerne běchu pozicije čłonow předsydstwa a wokrjesnych radźićelow CDU k naležnosći. Hač nominuja křesćanscy demokraća Wićaza za wólby krajneho rady, wo tym rozsudźa na wokrjesnym stronskim zjězdźe 26. měrca.
Incidenca we Łužicy dale stupa
Budyšin. Wo 269 natyknjenjach z koronawirusom je Budyski strowotniski zarjad wčera informował. Dalšich šěsć wosobow w tym zwisku zemrě. Po dźensnišich informacijach RKI postupi incidenca w Budyskim wokrjesu na 428,5, a w Zhorjelskim na 508,9. Wčera su tam 336 z wirusom natyknjenych a dwaj smjertnej padaj registrowali.
Towarstwo ma nowe mjeno
Krótkopowěsće (27.01.22)
Kat Austen předstaji album
Berlin. Wuslědki swojeho łužiskeho projekta předstaji zwukowa wuměłča Kat Austen dźensa w 20 hodź w Berlinje, ale tež online. Pod titulom „This Land is Not Mine“ wozjewi wona sydom spěwow na protestny album, kotrež wopřijimaja wubrane zwuki z regiona a powědaja wo zhubjenych wjeskach, wo mystiskich rěkach a wo měnjacej so kulturnej identiće.
Dźeń a wjace infekcijow
Budyšin. Budyski wokrjes je wčera 440 nowoinfekcijow z koronawirusom zwěsćił. Dwě dalšej wosobje stej zemrěłoj. Roberta Kochowy institut podawa tu dźensa incidencnu hódnotu 387,9. W Zhorjelskim wokrjesu je so wčera 435 wosobow natyknyło. Incidenca tam wučinja 445,8 po dźensnišej informaciji RKI. Štyrjo schorjeni su zemrěli.
Iniciatiwa přeproša
Krótkopowěsće (26.01.22)
68 pacientow w chorownjach
Budyšin. W Hornjej Łužicy lěkuja korony dla tuchwilu 68 pacientow w chorownjach. Incidenca po Roberta Kochowym instituće je dźensa na 321,5 w Budyskim wokrjesu a na 332,9 w Zhorjelskim postupiła. Wokrjes Budyšin informowaše wčera wo 275 natyknjenjach z koronawirusom a wo dwěmaj smjertnymaj padomaj. We wokrjesu Zhorjelcu mějachu 230 infekcijow a třoch zemrětych w zwisku z koronu.
Dalša hospodarska pomoc
Drježdźany. Sakske krajne knježerstwo je dalšim hospodarskim pomocam puć runało. Kabinet schwali wčera wot hospodarskeho ministerstwa nastorčeny program „Korona-přiražka Sakska plus“, kotryž ma za mini-předewzaćelow, samostatnych a swobodnje skutkowacych dźěru zatykać. Přiražku financuja z krajnych srědkow, dotal njewužiwanych z loni nalěto zahajeneho programa za krute pady.
Wjace wěriwych w Čěskej
Krótkopowěsće (25.01.22)
Natyknjenja njenadměrne
Budyšin. Warianta omikron njeje w Hornjej Łužicy dotal hišće nadměru wjele natyknjenjow wuskutkowała. Po Roberta Kochowym instituće je incidenca dźensa w Budyskim wokrjesu 235,9 a w Zhorjelskim 293,7. Wokrjes Budyšin informowaše wčera wo 226 natyknjenjach z koronawirusom a wo jednym smjertnym padźe wot minjeneho pjatka. W samsnym času běchu we wokrjesu Zhorjelc 252 infekcijow a dwaj smjertnej padaj.
Maja wjetšina w gremiju być
Budyšin. Serbja maja w gremiju za rozdźělowanje serbskich spěchowanskich srědkow strukturneje změny w Sakskej wjetšina być. To zhonichu čłonojo Zwjazkoweho předsydstwa Domowiny, rady a parlamentariskeje přirady Załožby za serbski lud a serbskeju radow Braniborskeje a Sakskeje wčera wot załožboweho direktora Jana Budarja. Na online-zetkanje přeprosył bě předsyda Domowiny.
Pomjeńša potuńšenje
Krótkopowěsće (24.01.22)
Incidenca pod přerězkom
Budyšin. Strowotniski zarjad Budyskeho wokrjesa je minjeny pjatk 179 dalšich natyknjenjow z koronawirusom wozjewił. Po wobličenjach RKI wučinja sydomdnjowska incidenca we wokrjesu tuchwilu 241,6 a leži jasnje pod cyłoněmskim přerězkom. W Zhorjelskim wokrjesu je incidenca po informaciji RKI 289,9.
Grofa wuběrkej předsydari
Budyšin. Při konstituowanju wuběrka Zwjazkoweho předsydstwa Domowiny za zjawnostne a wukrajne dźěło buštaj Krystof Grofa za předsydu a Beno Bělk za městopředsydu wuzwolenaj. Gremij je so minjeny pjatk digitalnje schadźował a chce so wobrazej Serbow w šěršej zjawnosći wěnować a prezencu třěšneho zwjazka w nowych medijach a digitalnych socialnych syćach sobu sylnić.
DGB z nowym nawodnistwom
Krótkopowěsće (21.01.22)
Tiede z hosćom Steinmeiera
Berlin/Budyšin. Farar Christian Tiede z iniciatiwy „Budyšin zhromadnje“ wobdźěli so přichodnu póndźelu na podijowej rozmołwje „Hida a namóc w časach pandemije – nazhonjenja a reakcije“ na Berlinskim hrodźe Bellevue. Na tele rozmołwne koło zwjazkowy prezident Frank-Walter Steinmeier prawidłownje hosći z towaršnostneho žiwjenja přeproša. Nimo toho planuje iniciatiwa 28. januara ćichi rjećaz swěcow po Budyšinje.
Dźeń Saksow wotprajeny
Drježdźany/Frankenberg/Sa. Najwjetši sakski swjedźeń towarstwow tež lětsa njebudźe. To su měšćanscy radźićeljo Frankenberga na swojim wčerawšim posedźenju wobzamknyli. Předewšěm boja so tam raznje wyšich kóštow hač planowane, kaž Frankenbergski měšćanosta Thomas Firmenich předsydźe kuratorija „Dźeń Saksow“ dr. Matthiasej Rößlerej zdźěli.
Incidenca dale snadnje stupa
Krótkopowěsće (20.01.22)
SLA přeproša na wubědźowanje
Budyšin. Na 12. wubědźowanje młodych talentow „Młoda serbska hudźba“ přeproša Serbski ludowy ansambl dźěći a młodostnych w starobje šěsć do 23 lět. Zajimcy njech so hač do 31. měrca požadaja. Přizjewjenja su móžne w kategorijach spěw (solo, skupina, chór), instrument (solo, skupina, orchester) a cyle nowe w kategorijomaj band a reja (solo, skupinu).
Incidenca pomału stupa
Budyšin. Budyski strowotniski zarjad je wčera 184 dalšich natyknjenjow z koronawirusom zwěsćił. Dźewjeć ludźi je tu w běhu 24 hodźin w zwisku z wirusom zemrěło. RKI podawa dźensa za Budyski wokrjes incidencnu hódnotu 224,5 a za Zhorjelski 249,4. Tam je so wčera 199 ludźi z wirusom natyknyło. Tři wosoby su w zwisku z infekciju zemrěli.
Budyšan nadběha dla zasudźeny
Krótkopowěsće (19.01.22)
Marko Suchy zaso sobu dźěła
Budyšin. Marko Suchy w Radźe za serbske naležnosće Sakskeje zaso sobu dźěła. To zdźěli předsydka Kathrin Šwjelina wčera na posedźenju braniborskeje Rady za naležnosće Serbow. Na naprašowanje Serbskich Nowin Suchy rozsud wobkrući. Wón je loni w septembrje jako předsyda gremija wotstupił a sobudźěło wotpočować dał. Za to pak njebě žanoho prawniskeho zakłada.
Dalšich dźesać zemrětych
Budyšin. Za Budyski wokrjes podawa RKI dźensa incidencu 182,5, za Zhorjelski 229,5. Tamniši strowotniski zarjad zwěsći wčera 203 dalše natyknjenja z koronawirusom a tři smjertne pady. Třećina nowoinficěrowanych su ze 77 padami dźěći. W Budyskim wokrjesu bě wčera 190 nowych natyknjenych, sydom ludźi je w zwisku z koronu zemrěło. Wosom dalšich pacientow lěkuja w chorowni.
Direktny wid z Ukrainy
Krótkopowěsće (18.01.22)
Dwaj nowaj čłonaj w radźe
Budyšin. Wjelelětny zastupowacy předsyda Sakskeho wustawoweho sudnistwa dr. Jürgen Rühmann je nowy zastupowacy čłon serbskich zastupnikow w radźe Załožby za serbski lud. Wón naslěduje Marka Dźisławka, kiž je zastojnstwo časowych přičin dla złožił. Nawodnica wotrjada kultury w ministerstwje za wědomosć, slědźenje a wuměłstwo Braniborskeje Brigitte Faber-Schmidt wobsadźi po wobzamknjenju kabineta druhe městno kraja w gremiju.
Incidenca snadnje woteběrała
Budyšin. RKI podawa ze 169,1 tróšku mjeńšu incidencu za Budyski wokrjes. Dohromady 162 nowoinfekcijow z koronawirusom a jědnaće smjertnych padow je wokrjes wčera zwěsćił. W Zhorjelskim wokrjesu su 13 dalšich natyknjenych registrowali. Incidenca je tež tu po informacijach RKI na 170,4 spadnyła.
Wabjenske telefonaty wozjewić
