Krótkopowěsće (20.04.22)
Lena Hauptmann nominowana
Halle. Delnjoserbska šansoneta Lena Hauptmannojc je ze swojim duwom LeDazzo nominowana za wubědźowanje „Women in Jazz – next generation virtuell 2022“ a zdobom za Jazzowe myto města Halle 2023. Hač do 12. meje móža zajimcy swoje tři hłosy za dohromady 22 jazzowych hudźbnicow z Argentinskeje, Němskeje, Awstriskeje, Pólskeje, Ruskeje a ze Słowjenskeje zapodać, a to online pod .
Incidenca z kóždym dnjom niša
Budyšin. Incidenca w Hornjej Łužicy dale woteběra. Po Roberta Kochowym instituće je wona dźensa w Budyskim wokrjesu 274,5. RKI zdobom wo dalšich 446 natyknjenjach z koronawirusom informuje. Zhorjelski wokrjes je wčera za dobu wot Zeleneho štwórtka wo 241 infekcijach, mjez nimi je 45 dźěći, rozprawjał. Incidenca po RKI je tam dźensa 186,4.
Pilnje jejka debili
Krótkopowěsće (19.04.22)
Bohatosć widźomnu sčinić
Podstupim. Braniborske kulturne ministerstwo je namjetowało „Błótowski čołm – twar a wužiwanje“ do cyłozwjazkoweho zapiska za imaterielne kulturne namrěwstwo zapřijeć. Próstwu podało je Błótowske towarstwo z Lubina. Čołm twori identitu za błótowski region a je wusko ze zachowanjom tradicionalneje kulturneje krajiny a ze žiwjenjom Serbow w Delnjej Łužicy zwjazany.
Žane informacije infekcijow dla
Budyšin. Jutrownych swjatych dnjow dla njepředleža Roberta Kochowemu institutej žane informacije wo aktualnych natyknjenjach z koronawirusom w Budyskim a Zhorjelskim wokrjesu. Dźensa wot RKI podata incidenca za wokrjes Budyšin je 371,8, za wokrjes Zhorjelc 248,2. Tam rozprawjachu zeleny štwórtk wo 263 infekcijach a sydom smjertnych padach z doby wot 30. měrca do 8. apryla.
Wjesne tafle přeměnili
Krótkopowěsće (14.04.22)
Hra „Šěrcec Hanka“ wuspěšna
Budyšin. Poslednje předstajenje inscenacije „Šěrcec Hanka“ je so wčera wotměło. W sydom předstajenjach je sej wot 12. februara dohromady 1 614 ludźi na hłownym jewišću NSLDź dźiwadłowu hru wobhladało. To je nowy rekord ličby wopytowarjow za serbskorěčnu inscenaciju hladajo na předstajenja minjenych lět. W nowej hrajnej dobje je inscenacija pod titulom „Schierzens Hanka“ za němskorěčne hłowne jewišćo zaplanowana.
Incidenca lochce stupała
Budyšin/Zhorjelc. W hornjołužiskimaj wokrjesomaj je incidenca lochce stupała. Po Roberta Kochowym instituće je wona dźensa w Budyskim wokrjesu 823,5; zwěsćili su wčera 762 natyknjenjow a štyri dalše smjertne pady. Za Zhorjelski wokrjes podawa RKI incidencnu hódnotu 658,9, 418 nowych infekcijow a štyri smjertne pady w zwisku z koronu.
Jadrowa milina a čěska politika
Krótkopowěsće (13.04.22)
Štyri wólbne namjety
Budyšin. Wólbny wuběrk města Budyšina je wčera štyri namjety za wólby tudyšeho wyšeho měšćanosty 12. junija přizwolił. Su to w slědźe, kotryž komunalny wólbny porjad postaja, Alexander Ahrens (SPD), Karsten Vogt (CDU), Andrea Kubank (Lěwica) a Andreas Thronicker jako požadar-jednotliwc. Dale namjetowany Jens Reime wobkrućeny njebu, trěbna ličba podpěracych podpismow předležała njeje.
Natyknjenja na nišim niwowje
Budyšin. W Budyskim wokrjesu incidenca dale spaduje. Po Roberta Kochowym instituće je wona dźensa 748,0. RKI informowaše zdobom wo 501 natyknjenjach z koronawirusom a dalšim smjertnym padźe. Wo 451 infekcijach, mjez nimi je 70 dźěći, a štyrjoch w zwisku z koronu zemrětych mjez 28. měrcom a 3. aprylom rozprawješe wčera wokrjes Zhorjelc. Tamniša incidenca 649,7 po RKI je dźensa tróšku zwyšena.
Ameriska baza w Čěskej?
Krótkopowěsće (12.04.22)
Spadowacy trend traje
Budyšin. Do jutrow incidenca dale woteběra. Roberta Kochowy institut je za Budyski wokrjes dźensa hódnotu 849,3 a 195 nowych natyknjenjow z koronawirusom zapodał, za Zhorjelski 605,4. Wokrjes Zhorjelc informowaše wčera za dobu wot minjeneho pjatka wo dohromady 484 infekcijach, z toho bě 69 dźěći.
Swobodni wolerjo za Wićaza
Biskopicy. Přichod Budyskeho wokrjesa zhromadnje z Udom Wićazom wuhotować, to móža sej tudyši Swobodni wolerjo derje předstajić. Wo tym informowaše předsyda Budyskeho wokrjesneho zwjazka strony prof. dr. Holm Große. Rozsudźili su so po přeswědčacej a wobšěrnej, konstruktiwnej a hłubokosahacej diskusiji z kandidatom CDU za wólby krajneho rady na posedźenju wokrjesneho předsydstwa a frakcije we wokrjesnym sejmiku.
Zahaja předpředań
Krótkopowěsće (11.04.22)
Na jutrownym seminarje
Åbenrå/Apenrade. Nimale 70 młodostnych ze wšeje Europy přebywa hač do pjatka na lětušim jutrownym seminarje Młodźiny europskich narodnych mjeńšin MENS. Třo čłonojo młodźinskeho towarstwa Pawk zastupuja tam Serbow. W srjedźišću seminara pola němskeje mjeńšiny w Danskej na Knivsbergu steja stawizny němsko-danskeje namjezneje kónčiny a kritiske myslenje młodostnych. Pjatk wotměja tam hłownu zhromadźiznu MENS.
Snadnje zwyšena incidenca
Budyšin. Přez kónc tydźenja je incidenca w Hornjej Łužica znowa snadnje stupała. Roberta Kochowy institut (RKI) je dźensa za Budyski wokrjes hódnotu 974,1 podał a zdobom wo 408 natyknjenjach z koronawirusom informował. Incidenca we wokrjesu Zhorjelc je po RKI 795,0. Tamniši strowotniski zarjad je minjeny pjatk wo dalšich 348 infekcijach a smjertnymaj padomaj rozprawjał.
Potuńši so bencin w Čěskej?
Krótkopowěsće (08.04.22)
Bórze nowa wersija app Sotra
Budyšin. Nowa wersija serbskeje přełožowanskeje app Sotra ma w meji přistupna być. To bě wčera we wobłuku online-zarjadowanja Załožby za serbski lud wo wužiwanju aktualnych móžnosćow, serbske teksty do druhich rěčow přenjesć, zhonić. Nowy system změje neuronalny zakład, tak je eficientniši hač dotalny na statistiskej bazy. Hišće w běhu lěta app wo delnjoserbšćinu rozšěrja.
Kampanja za wučerjowy dorost
Drježdźany. Pod hesłom „LEHRERIN SACHSEN – eine Klasse für sich“ je sakske ministerstwo za kultus nowu kampanju zahajiło. Z njej chcedźa nuznje trjebany dorost za powołanje wučerja wabić. Woprašowanja su zwěsćili, zo 18- do 25lětni w Sakskej skeptisce na wučerstwo hladaja. Woni widźa tam skerje mało postupnych šansow, mało česćenja, stres a karjeru bjez wulkeho wuwića hač do renty.
Incidenca woteběra
Krótkopowěsće (07.04.22)
Na dźeń wotewrjenych duri
Budyšin. Koronapandemije dla přetorhnjenu tradiciju dnja wotewrjenych duri w domje Měrćina Nowaka Njechorńskeho Domowinska župa „Jan Arnošt Smoler“ Budyšin lětsa 9. julija dale wjedźe. Župne předsydstwo je na wčerawšim wuradźowanju termin wobkrućiło a wšitke župy a towarstwa na wopyt do Njechornja přeprosyło.
Niwow lědma změnjeny
Budyšin. Roberta Kochowy institut (RKI) je za Budyski wokrjes dźensa incidencu 925,1, 856 natyknjenjow z koronawirusom a dwaj smjertnej padaj wozjewił. Aktualna incidenca we wokrjesu Zhorjelc je po RKI 802,2. Wokrjes bě wčera wo 457 infekcijach, mjez nimi je 73 dźěći, a wo třoch w zwisku z koronu zemrětych pacientach z doby 24. a 25. měrca rozprawjał. Budyski strowotniski zarjad je zastał, kontakty pozitiwnje testowanych telefonisce slědować.
Čěske pancery za Ukrainu
Krótkopowěsće (06.04.22)
Noweho předsydu wolili
Drježdźany. Albrecht Koch, kantor a organist Freibergskeje ewangelskeje wosady kaž tež prezident Towaršnosće Gottfrieda Silbermanna, nastupi spočatk oktobra zastojnstwo předsydy Sakskeho kulturneho senata. Dotalna nawodnica gremija Friederike Koch-Heinrichs, direktorka Kamjenskeho muzeja zapadneje Łužicy, zastojnstwo turnusej wotpowědnje kónc septembra złoži.
Z nowej kartu do Berlina
Zły Komorow. Do zahajenja noweje kolesowanskeje sezony prezentuje so turistiski zwjazk Łužiska jězorina na kolesowarskim festiwalu VELO Berlin, kotryž so přichodny kónc tydźenja wotměje. Tam změja tež nowu kartu z kolesowanskimi šćežkami kónčiny sobu. Mjeztym je dosć a nadosć zajimawych pućow, kotrež móža sej kolesowarjo wotkryć.
Incidenca dale woteběra
Krótkopowěsće (05.04.22)
Ukrainjanka wuwučuje
Worklecy. Na Worklečanskej zakładnej šuli „Michał Hórnik“ wuwučuje wot dźensnišeho Ukrainjanka. Wučerka, kotraž dyrbješe z domizny ćeknyć, wuwučuje předewšěm štyrjoch šulerjow, kotřiž hižo na tutu šulu chodźa, w jich maćeršćinje. Wona je wukubłana pedagogowka za zakładne šule. Sama wuknje wona ze šulerjemi w regularnej wučbje němčinu.
Poda so lětsa na wuměnk
Wojerecy. Wot lěta 2000 organizuje Carmen Hoffmann Wojerowske hudźbne dny. Lětuši 55. festiwal je za nju zdobom čas rozžohnowanja. W awgusće poda so w Serbskim wučerskim wustawje w Budyšinje wukubłana na wuměnk. Jeje naslědnica je Christiane Vogel, kotraž hižo wjele lět dorostowe wubědźowanje „Młodźina hudźi“ organizuje.
Mjenje natyknjenjow
