Józef Šwon a Jan Hrjehor, zamołwitaj Serbskeho Sokoła za 37. sokołski wolejbulowy turněr wo pokal Domowiny, staj sobotu we Worklečanskej sportowni zhromadnje z wolejbulistkami Hrajneho zjednoćenstwa Pančicy-Worklecy stafli za turněr wulosowałoj, kotryž budźe 2. měrca w sportowni na Budyskim Třělnišću.
Dokelž wotmě so wulosowanje do partijow Pančičankow a Worklečankow we wobwodnej lize, móžeše hnydom 14 wolejbulistkow 14 losow z losowanskeje šklě wućahnyć. Hłowje staflow A a B tworitaj finalistaj zašłeho lěta. Na A1 bu cyłk Serbskeho domu Budyšin sadźeny, na B1 zakitowar pokala Bratrowstwo Róžant. Tak je najprjedy raz zaručene, zo mustwje w skupinskej fazy přećiwo sebi njenastupitej.
W staflomaj budźe w předkole kóždy přećiwo kóždemu hrać, potom dobyćer stafle A přećiwo druhemu stafle B w prěnim połfinalu a dobyćer stafle B přećiwo druhemu stafle A w druhim połfinalu. W kónčnym kole wubědźuja so mustwa potom jenož hišće wo městna 1 do 14.