Sokoł Ralbicy/Hórki – TSV Wachau 2:0 (0:0)
Zestawa domjacych: Schöne – M. Matka, Domaška, Wałda, Šewc, Janca (80. Kř. Matka), Šołta (86. Materna), Gloxyn, Rachel, Nuk (89. Kocor), Korjeńk
Dołho so prěnje mustwo Sokoła Ralbicy/Hórki na nowy start we wokrjesnej wyšej lize wjeseleše. Tola w minjenych dnjach a tydźenjach dyrbješe trenar Chrystof Gloxyn časćišo na swój telefon pohladać, dokelž so zranjenja abo chorosće dla tójšto hrajerjow wotzjewi. Jeno 17 akterow prěnjeho a druheho mustwa běše kmanych, njedźelu kopańcu hrać. Tohodla dyrbjachu wonkownu hru rezerwy Sokoła, kiž by so runočasnje z domjacej hru prěnjeho mustwa wotměła, wotprajić.