Kóžde lěto přewjedźe Křesćansko-socialny kubłanski skutk Sakska z.t. (CSB) za swoje přebywanišća z hortom koparski turněr. Tutón přewjeduje so přeco we wotměnje pola hinašeho hosćićela, hdźež zdobom tež sportnišćo je.

Lětsa hraješe so pjatk, 7. junija, na trawniku Marijineje hwězdy. Nastupiło bě cyłkownje šěsć mustwow z horta Pančic-Kukowa, Nadrózneje Hrabowki, Rakec, Kulowa a dwoje mustwa staji hort „Handrij Zejler“ z Wojerec. Hraješe so w dwojimaj staflomaj, a to stajnje dźesać mjeńšinow. Prěnjej dwě mustwje skwalifikujetej so stajnje za połfinale, kotryž so přez křiž wuhraje.

W stafli A podleža hosćićel z Pančic-Kukowa přećiwo Nadróznej Hrabowce a zakitowarjej pokala z Wojerec I stajnje z 0:2. Dokelž so poslednja hra mjez Wojerecami a Nadróznej Hrabowku bjez wrotow skónči, dyrbješe třělenje z dźewjeć metrow rozsudźić, štó jako prěni do połfinala zaćahny. Tam wopokazachu hrajerjo z Nadrózneje Hrabowki lěpše čuwy a dobychu.

W stafli B přesadźi so Kulow na prěnim městnje ze šěsć dypkami. Slědowaše mustwo z Rakec před druhim zastupnistwom z Wojerec.