Finale lětsa w Drjowku

Po prěnim běhu wo Němske dumperowe mišterstwa (DDM) zašły tydźeń ­w Adelsdorfje steja nětko tež dalše terminy. Spočatk julija dźe w Baćonju dale, na to sćěhujetej běhaj w Hórkach a Bad Freienwalde. Wulki finale budźe lětsa w Drjowku pola Choćebuza.

Kopańca kónc tydźenja

14.05. 14:00  FC International Lipsk –

  Budissa Budyšin

14.05.  15:00  Módro-běli Kulow –

  ST Horni kraj-Sprjewja

15.05.  12:30  SJ Chrósćicy II –

  Traktor Malešecy

15.05.  13:00  FC Energija Choćebuz –

  BSG Chemija Lipsk

15.05.  13:00  SJ Njebjelčicy II –

  Sokoł Ralbicy/Hórki II

15.05.  14:00  ST Marijina hwězda –

  Wojerowski FC

15.05.  15:00  ST Kinspork/Łužnica –

  Sokoł Ralbicy/Hórki

15.05.  15:00  SJ Njebjelčicy –

  ST 1896 Wulka Dubrawa

15.05.  15:00  ST Radwor –

  HZ Hórnikečanski jězor

Běh po Krakečanskich hórkach

Stajnje srjedu nawječor do Božeho spěća wotměwa so po tradiciji wurisanje po Krakečanskich hórkach. A tak budźe tomu nadźijomnje tež srjedu, 25. meje, mjeztym hižo 34. króć. Wubědźowanje organizuje zaso sportowe zjednoćenstwo Módro-běli Krakecy. Přizjewjenja su pod móžne. Planowany je kołokurs přez lěsy a łuki a zdźěla na asfaltowanych pućach. Zapisać móžeće so za čary 350 m, 700 m, 2 km, 5 km a 10 km.

Tři wučerske mustwa Budyskeje wučerskeje wolejbuloweje ligi su so před ­něšto časom w měsće na nachwatanski hrajny dźeń zetkali.

W prěnjej hrě steještej sej mustwje Budyskeho powołanskošulskeho centruma a wyšeje šule Wjazońca napřećo sebi. Mjez hrajerkami a hrajerjemi z Wjazońcy hraješe serbski wučer w Slepom Tomaš Suchy sobu.

W prěnjej sadźbje přesadźi so šěstka Powołanskošulskeho centruma jasnje z 25:12. Dołho wupadaše tež w druhim přeběhu tak, zo Budyšenjo dobudu. Po nawjedowanju 24:19 pak pokaza přećiwnik z Wjazońcy sylniše čuwy a sadźbu ze 27:25 hišće za sebje rozsudźi. Napjatosć wosta tež w tiebreaku wysoka, štož rezultat 16:14 za Budyski powołanskošulski centrum wobkrući.

Jednaćel wokrjesneho sportoweho zwjazka Lars Bauer (naprawo) je šulerkam a šulerjam Léona-Foucaultoweho-gymnazija Wojerecy Nickej Schwarzej, Linje Gruhn, ­Clemensej Braunerej (wotlěwa) a sportowej wučerce Steffi Wagner dobyćerski pokal a šek přepodał. Kubłanišćo je při wubědźowanju sportoweho znamješka najlěpše wukony w kategoriji wyše šule a gymnazije pokazało. Druhe a třeće městno wob­sadźištej Lessingowy gymnazij z Kamjenca a Wyša šula „Při Halštrowskej niwje“ ­Kamjenc. Prěnje městno pola zakładnych šulow dźěše do Hornjeje Hórki, druhe wobsadźichu šulerki a šulerjo z Wjelećina a třeće Za­kładna šula Bukecy.

Foto: Wokrjesny sportowy zwjazk Budyšin

ST Viktoria Worklecy – MB Wojerecy 0:3 (20:25, 19:25, 27:29)

Posledni hrajny dźeń w Sakskej klasy běchu wolejbulisća Viktorije Worklecy 13. nowembra 2021 wuhrali. Krótko po tym slědowaše přetorhnjenje hrajneje doby a něšto pozdźišo kompletne cofnjenje sezony. Jako w nalěću zakazy korony dla padnychu, wobzamknychu funkcionarojo SSVB, znajmjeńša jedne koło sezony kompletować, zo nastanje něšto podobne kaž njeoficialny ranking ligi. Konsek­wency nastupajo postup abo zestup njeběchu předwidźane. Wšitcy mějachu zaso wulki lóšt na wolejbul. Nó haj, snano nic wšitcy. Někotre hry su mustwa hnydom přepo­łožili abo scyła wotprajili, druhe sej za­pisachu 3:0-dobyća za zelenym blidom. To běše chětro chaotiska situacija. Tak tež Łužnica a MSV Budyšin hru přećiwo ­Worklečanam 26. měrca krótkodobnje wotpraji­štej. Wulke pak bě wjeselo pola Viktoričanow, jako wolejbulowi přećeljo Módro-běli Wojerecy připrajichu, falowacu dypkowu hru we Worklecach přewjesć. Skónčnje zaso wolejbul pod wubědźowanskimi wuměnjenjemi we Worklečanskej hali – po 146 dnjach(!).