Konsekwency za započatkarja

Budyšin. Na wjeršku póstniskeho časa je policija wot štwórtka zašłeho tydźenja hač do minjeneje wutory w zesylnjenej měrje šoferow wosobowych awtow na jich kmanosć jězdźenja kontrolowała. W Budyskim a Zhorjelskim wokrjesu lepichu dohromady 24 wodźerjow. Wosmjo z nich běchu drogi brali, šěsnaćo stejachu pod wliwom alkohola. Mjez nimi bě 20lětny, kotrehož su njedźelu wječor w Korzymju zadźerželi. Jako započatkar dyrbjał wón dospołnje strózby być, alkomat pak pokaza 0,46 promilow. Za to dóstanje młody muž dypk w centralnym registrje w Flensburgu a změje 250 eurow pokuty płaćić. Nimo toho podlěši so jeho probowy čas na štyri lěta. A skónčnje dyrbi so wón na tak mjenowanym natwarnym seminarje wobdźělić, kotryž je po informacijach policije z tójšto wudawkami zwjazany.

Kulow. Na lětušu róžowu póndźelu w Kulowje drje so 47lětny muž rady dopominać njebudźe. Byrnjež tam popoł­dnju při póstniskim ćahu alkoholej derje přirěčował, sydny so wón pozdźišo do swojeho Toyoty a wotjědźe. Na Salowskej dróze pak bě jeho jězba nimo. Jako policisća jeho kontrolowachu, napadny jim chorhojčka šofera. Zwěsćichu pola njeho 1,2 promilej alkohola w kreji. Po tym zo dyrbješe wón na policajskim rewěrje krej kaž tež swoju jězbnu dowolnosć wotedać, smědźeše muž zaso hić. Wón pak njeměješe žanu lěpšu ideju, hač so znowa do awta sydnyć, zo by domoj jěł. Tež to pak so jemu njeporadźi, přetož w Mučowje jeho zastojnicy znowa lepichu.

Bjez žony dale jěł

Budyšin. Při jězbje po awtodróze A 4 je minjenu sobotu wječor k rozestajenju mjez mandźelskimaj dóšło. Jako bě žona na parkowanišću na nuzniku, muž roznjemdrjeny ze swojim Citroenom prosće wotjědźe. Z wupožčenym handyjom za­zwoni žona policiju, kotraž ju sobu na Budyski rewěr wza. Hakle po wjacorych hodźinach so tam tež muž zjewi a swoju žonu wotewza. Wo čim staj wonaj na to w awće rěčałoj, bohužel znate njeje.

Małe njezbožo w kuchni

Běła Woda. Dokelž je pječa k rozpachnjenju dóšło, wołaše w rańšich hodźinach wčerawšeje njedźele wobydler Běłeje Wody wohnjowu woboru do zahrodnišća na Heinowej. Jako běchu kameradojo a policisća na městnje, woni spěšnje zwěsćichu, zo scyła tak zlě njebě. Paliło so tam mjenujcy njeje. 34lětna žona chcyše sej jeničce něšto k jědźi spřihotować a zwohrěwa sej začinjenu konserwu. Jako ju wočini, jej horca jědź mjezwoči pryskny a ju snadnje zrani. Žonu dowjezechu do chorownje.