Policija (16.10.20)
Praskotak rozbuchnył
Běła Woda. Ćežko zranił je so wčera rano w Běłej Wodźe 21lětny muž w swojim bydlenju na Jurja Gagarinowej. Najskerje je tam zakazany praskotak rozbuchnył, kaž policija zdźěli. Wobydlerka bě wulki wrjeskot słyšała a zastojnikow zawołała. Zranjeneho dowjezechu do chorownje.
Policija (15.10.20)
Při njezbožu zemrěł
Kinspork. Tragiski wukónc měješe we wčerawšich rańšich hodźinach jězba 41lětneho muža z Kamjenca do směra na Kinspork. Z dotal njeznateje přičiny je wodźer VW Passata tam krótko do 1.30 hodź. na lěwy bok jězdnje zajěł a něhdźe 300 metrow před Kinsporkom do štoma zrazył. Wuchowanske mocy zatłusnjeneho z jězdźidła wuswobodźichu a spytachu jeho wožiwić, bohužel bjez wuspěcha. 41lětny hišće na městnje njezboža wudycha. Jeho wosobowe awto so dospołnje skóncowa.
Policija (14.10.20)
Mopedaj a motorske fuk
Brězow. Dwukolesate jězdźidła z časa NDR su tež mjez paduchami dźeń a woblubowaniše. Minjene dny su policiji tři tajke padustwa přizjewili. Tak je so z bróžnje w Brězowje (Blösa) w Kubšiskej gmejnje motorske typa ETZ w hódnoće 2 000 eurow zhubiło. W Ottendorfje-Okrilli běchu njeznaći Łastojčku w samsnej hódnoće z garaže pokradnyli. W Niskej je dalša Łastojčka fuk. Jeje hódnota wučinja 1 000 eurow.
Policija (13.10.20)
Drohu palmu pokradnyli
Mužakow. Na runje tak njewšědnu kaž eksotisku rubiznu měrjachu so minjeny kónc tydźenja paduši w Mužakowje. W času wot soboty popołdnja hač do njedźele ranja pokradnychu woni z naměsta před hrodom nimale tři metry wysoku feniksowu palmu. Po informacijach Zhorjelskeje policajskeje direkcije je wosebita rostlina něhdźe 2 000 eurow hódna. Hakle před něšto tydźenjemi, tak policija dale rozprawja, běchu njeznaći w Mužakowje dalše tajke eksotiske eksemplary spakosćili.
Policija (12.10.20)
„Třěchikryjerjo“ wobšudźić chcyli
Kamjenc. Po zdaću lukratiwny poskitk rjemjeslnikow je so tele dny w Kamjenskim měšćanskim dźělu Lückersdorfje jako wobšudnistwo wopokazało. Štyrjo mužojo, kotřiž so jako třěchikryjerjo wudawachu, 80lětnemu wobydlerjej poskićichu, zo bychu jeho carport znowa zakryli, a to za 450 eurow. Rentnar do toho zwoli. Njemało pak so wón dźiwaše a nastróži, jako jemu pozdatni fachowcy zličbowanku 12 000 eurow předpołožichu a sej nablaku pjenjezy žadachu. Na to zawoła muž policiju. Ta zwěsći, zo rumunscy staćenjo w starobje 28 do 43 lět scyła žanu přemysłowu dowolnosć njemějachu. Nětko so cłownistwo z padom zaběra.
Policija (09.10.20)
Z wopačnej lisćinu dary zběrali
Kamjenc. Wobšudnicy su předwčerawšim w Kamjencu a Kinsporku wudawali, zo za zbrašene dźěći dary zběraja. W Kamjenskej kupnicy Kaufland policisća třoch rumunskich staćanow w starobje 19, 20 a 22 lět lepichu. Kaž so wukopa, woni sami zbrašeni njeběchu a tež za žanu powšitkownowužitnu organizaciju pjenjezy zběrali njejsu. Dale su wšitcy třo ludźom wudma nadawali a jich skřiwdźili, hdyž nochcychu jim žane pjenjezy dać. Nimo toho su na jednu wosobu napojowu tyzu ćisnyli. Policija pyta nětko wosoby, kotřiž su třom wobšudnikam pjenjezy přewostajili abo jich wobkedźbowali. Pokiwy přijimuja pod telefonowym čisłom 03578/ 35 20.
Policija (08.10.20)
Z wotmachom do Lkw-ja zrazył
Porchow. Ćežke wobchadne njezbožo ze złymi sćěhami sta so wčera něhdźe w 17 hodź. na awtodróze A 4 blisko Porchowskeje wotbóčki. Do směra na Zhorjelc jěducy wodźer pólskeho wosoboweho awta je z wulkim wotmachom wotzady do nakładneho awta prasnył. Wón bu ze swojeho awta ćisnjeny, při čimž bu jemu ruka wottorhnjena. Z helikopterom dowjezechu muža do chorownje. Šofer Lkw-ja so njezrani. Awtodróha bě dlěši čas zawrjena.
Policija (07.10.20)
Jebak sej pjenjezy wulišćił
Biskopicy. 88lětny muž je so předwčerawšim w Biskopicach z woporom jebaka stał. Dotal njeznaty skućićel rentnarja na parkowanišću kupnicy narěča a jeho prošeše pjenjezy zaměnić. Dobroćiwy starc wočini swoju móšnju, w kotrejž měješe wjetšu sumu pjenjez. W tym wokomiku cuzy do móšnje sahny a pokaza na dźesaćeurowsku bankowku, wo kotruž Biskopičana prošeše. Myslo sej, zo je wotpowědne drobne pjenjezy hižo dóstał, 88lětny wone dźesać eurow cuzemu da, na čož so tón zminy. Hakle pozdźišo škodowany pytny, zo jemu wjacore sta eurow w móšni pobrachuja. Po jeho wopisanju je jebak 170 centimetrow wulki, ma swětłe, krótke włosy a ćmowu drastu. Pokiwy přijimuje policija pod telefonowym čisłom 03594/ 75 70.
Policija (06.10.20)
Kolesowarja so šmórnył a dale jěł
Budyšin. Na Ćichońskej dróze w Budyšine je minjenu sobotu popołdnju wodźer wosoboweho awta dweju kolesowarjow přesćahnył. Při tym so wón jednoho z njeju z wonkownym špihelom šmórny, tak zo kolesowar padny a so zrani. Zawinowar pak je dale jěł. Policija pyta nětko swědkow, kotřiž su snano něšto wobkedźbowali.
Policija (05.10.20)
Předpisy tež na wodźe płaća
Lejno. Zo płaća wobchadne předpisy tež na wodźe, wě nětko 57lětny muž, kotrehož je policija sobotu na Lejnjanskim jězoru (Geierswalder See) kontrolowała. Wón bě tam ze sportowym čołmikom na wodźe po puću. Při kontroli policisća zwěsćichu, zo měješe muž wjace alkohola hač dowolene w kreji, mjenujcy 0,78 promilow. Na 57lětneho čaka nětko pokutne jednanje, dokelž njeje postajenja nutřkokrajneho łódźnistwa dodźeržał.
