Wosow dla so žiwy płót palił

Slepo. Zo dyrbiš přewšo kedźbliwy być, hdyž maš na zahrodźe abo samo w domje hnězdo wosow, dyrbješe předwčerawšim muž w Slepom nazhonić. Za­kročejo přećiwo překasancam je wón ­woheń zamiškrił a při tym njemało škody zawinił. Pječa běchu jeho wosy nadpadnyli, tak zo so ze chemiskim srědkom ze sprayjoweje bleše na nje měrješe. Při tym pak so žiwy płót zapali. Susodźa a wohnjowi wobornicy drje płomjenja podusychu, nastata horcota pak při­wšěm płuwanski basenk wobškodźi. Wěcna škoda wučinja dohromady ně­hdźe 3 000 eurow.

Z wopačnym čisłom po puću

Budyšin. W nocy na njedźelu bě 63lětny němski staćan na awtodróze A 4 ze swójbu po puću na dowol do směra na Pólsku. Blisko Budyšina jeho policija zadźerža. Přičina kontrole bě, zo awtowe čisło po policajskim systemje scyła njeeksistowaše. Při blišim přepytowanju wobstejnosćow so wukopa, zo steješe w podłožkach za awto ličba 334, na jězdźidle přičinjene pak bě čisło 344. Kaž w policajskej rozprawje dale rěka, 63lětny powědaše, zo z awtom a wotpowědnym čisłom hižo dwě lěće jězdźi a zo jemu zmylk dotal napadnył njeje. To pak mužej a jeho swójbje tež přewjele njepomhaše. Čisło a awtowe papjery policisća sćazachu, a wón dyrbješe sej hinaše awto za dalšu jězbu wobstarać. Při chłostanskim přepytowanju falšowanja ­wopisma dla dyrbja nětko zwěsćić, kak bě k tomu dóšło, zo bě na awće hinaše čisło přičinjene, hač je wone w podłožkach zapisane.

Paduši w klubje

Wětrow. Njelubu překwapjenku dožiwichu Wětrowscy młodostni sobotu dopołdnja, jako do swojeho kluba w tak mjenowanym sydlišću přińdźechu. Tam běchu njeznaći w nocy do toho wokno rozbili a skład za hódnotnymi wěcami přepytali. Pokradnyli su wšelki grat kaž tež dźiwiznowu kameru w cyłkownej hódnoće něhdźe 600 eurow. Načinjenu wěcnu škodu trochuje policija na dobre 100 eurow.

Wjac hač štyrcećo přespěšnje jěli

Kamjenc. Dokelž w Kamjencu tuchwilu na wjacorych městnach twarja, je wobchadna straža hromadźe z policiju srjedu na twarnišću při Goethowej do směra na dwórnišćo spěšnosć kontrolowała. Dowolene je tam 30 km/h. Ně­hdźe 1 515 jězdźidłow bě na mjenowanym městnje w času wot 7 do 12 hodź. po puću. 43 króć měrjenska připrawa zabłyskny, negatiwny rekord ležeše pola 60 km/h.

Frontalnje koliděrowałoj

Biskopicy. W Biskopicach je 26lětny wodźer Audija srjedu wječor na Budyskej dróze z města na lěwu stronu jězdnje zajěł­ a frontalnje do napřećo při­jěduceho Opela zrazył. 62lětna šoferka so lochko zrani. Jako policisća zawino­warja zražki kontrolowachu, dyrbjachu zwěsćić, zo měješe wjace hač dwaj promilej alkohola w kreji. Jězbnu dowolnosć jemu nablaku sćazachu. Wěcna škoda na awtomaj wučinja něhdźe 12 000 eurow.

Wjacore awta wobškodźene

Němcy. W Němcach su njeznaći minjene dny w jednej firmje třěchi tam wustajenych jězdźidłow rozškrabali, načinjejo při tym něhdźe 2 000 eurow škody.