Policija (12.06.20)
Hobbyjowy nurjak w nuzy pomhał
Wojerecy. Zo hodźi so nurjenska technika tež za hinaše zaměry wužiwać, je předwčerawšim muž we Wojerecach dopokazał. Wobydlerka wjaceswójbneho domu je tam cokorowy sirup wariła a po wšěm zdaću na hornc zabyła, tak zo so z njeho chětro kurić započa. Kuražěrowany susod a hobbyjowy nurjak dźěše na to ze swojej nurjenskej techniku do bydlenja žony a donjese hornc won. Žana wěcna škoda tuž njenasta, a zranił so tež nichtó njeje. Alarmowani wohnjowi wobornicy móžachu swoje zasadźenje spěšnje skónčić. Zasadnje pak policija radźi, w padźe wohenja na kóždy pad wohnjowu woboru informować a njewustajić so sam móžnemu strachej. Přiwšěm so kameradojo zmužitemu wobydlerjej za jeho njesebične jednanje dźakuja.
Policija (11.06.20)
Znata moped spóznała
Rakecy. Mało wjesela nad pokradnjenym mopedom měještaj předwčerawšim skućićelej w starobje 17 a 39 lět w Rakecach. Po tym zo je wobsedźer popołdnju policiji přizjewił, zo bě něchtó jeho moped pokradnył, wuhlada jeho znata jězdźidło wječor w Psowjach. Přiwołanym zastojnikam spytaštaj skućićelej napowědać, zo běštaj moped online kupiłoj. Kaž so wukopa, bě 39lětny z S 51 jěł, njeměješe pak scyła žanu jězbnu dowolnosć, dokelž běchu ju jemu hižo dawno sćazali. Nimo toho steještaj wón kaž tež młodostna pod wliwom drogow. Policija wobsedźerjej moped zaso wróći. Paduchaj změjetaj so nětko hnydom wjacorych deliktow dla sudnisce zamołwić.
Policija (10.06.20)
Kofej radšo doma pić
Ptačecy. Kofejowy nopašk za „po puću“ je předwčerawšim rano na wokrjesnej dróze mjez Złym Komorowom a Ptačecami po wšěm zdaću wobchadne njezbožo zawinił. Horcy napoj steješe na pódlanskim sydle VW Tourana a so při jězbje powróći. To 56lětnu wodźerku drje bóle zaběraše, hač na puć dźiwać. Tak wona na prawy bok jězdnje zajědźe a do štoma zrazy. Zranjenu dowjezechu ju do chorownje. Awto so dospołnje skóncowa, škodu trochuja na něhdźe 22 000 eurow.
Policija (09.06.20)
Do firmy so zadobyli
Drětwja. Njeznaći su so minjeny kónc tydźenja namócnje do firmy w Drětwi (Zerre) w gmejnje Sprjewiny Doł zadobyli a tam tójšto škody načinili. Kaž Zhorjelska policajska direkcija rozprawja, rozbichu skućićeljo wšelake techniske nastroje a pokradnychu dwě róli koporoweho kabla. Jeju hódnotu trochuja na 20 000 eurow. Načinjena wěcna škoda wučinja dohromady 5 000 eurow. Technikarjo kriminalneje policije móžachu wjacore slědy zawěsćić a so nadźijeja, zo móža z jich pomocu paduchow dosahnyć.
Policija (08.06.20)
Drohej kolesy fuk
Ćisk. Před kupnicu w Ćisku su njeznaći sobotu popołdnju e-bikaj znački Scott pokradnyli. Přizamknjenej kolesy měještej po informaciji wobsedźerjow hódnotu dohromady 10 000 eurow. Jedna so wo neonzeleno-čorne Genius 710 plus a wo fijałkojto-čorne EGenius Contessa 720 plus. Štóž je něšto wobkedźbował, njech to policiji zdźěli.
Pola frizera pobyli
Wojerecy. Lědma zo smědźa frizerojo zaso dźěłać, su so njeznaći w nocy na sobotu do tajkeho salona we Wojerecach zadobyli. Tam pokradnychu pjeć frizerskich mašinow w hódnoće 500 eurow.
Policija (05.06.20)
Medicina wina była?
Krušwica. Hač bě znaty přirodny lěk „Klosterfrau Melissengeist“ wina na tym, zo měješe šofer tójšto alkohola w kreji, dyrbi nětko policija w Krušwicy wujasnić. Jako zastojnicy awto 59lětneho wčera rano kontrolowachu, jim alkoholowa chorhojčka hnydom napadny. Muž so wurěčowaše, zo měješe problemy ze žołdkom a zo bě lunk woneho srědka pił. Zo pak je tón dwaj promilej alkohola zawinił, je skerje wěrjenjepodobne.
Policija (04.06.20)
Ilegalnje truskalcy šćipał
Sćijecy. Darmotnje truskalcy našćipać chcyše sej 54lětny muž hižo minjenu njedźelu při Drježdźanskej dróze w Sćijecach pola Budyšina. Kedźbliwy swědk bě jeho tam w 5.45 hodź. wobkedźbował a policiju zazwonił. Zastojnikam muž powědaše, zo chcyše zdźěla hišće njezrałe płody swojej maćeri donjesć. Truskalcy pak wón ani zapłaćić móhł njeby, dokelž žane pjenjezy při sebi njeměješe. Škoda wučinja dźesać eurow.
Policija (03.06.20)
W lěsu so paliło
Pěskecy. Měrny wukónc swjatkowneje póndźele někotrym wohnjowym wobornikam popřaty njebě. Wołachu jich předwčerawšim do lěsa mjez Pěskecami a Němskimi Pazlicami, zo bychu jón hašeli. Tam běchu so płomjenja po 800 kwadratnych metrach wupřestrěli.
Policija (02.06.20)
Policija (29.05.20)
Wulku sumu pjenjez a drogi našli
Mały Wjelkow. Zastojnicy Budyskeho policajskeho rewěra a inspekcije kriminalneje policije su minjenu wutoru z pomocu stafle slědźacych psow přepytowanje w Małym Wjelkowje přewjedli. W podhladnym „bydlenskim objekće“ namakachu „něšto mariuany, srědki za woćeńšenje drogow a něhdźe 10 000 eurow“. Třoch muži w starobje 25 do 28 lět a 19lětnu žonu policija zaja, statne rěčnistwo dale přepytuje.
Policistow nadběhował
Niska. Wočiwidnje wopojeny 25lětny muž je so předwčerawšim zajeću spjećował a za policistami kopajo škleńcu słužbneho awta zastojnikow wobškodźił. Wěcnu škodu trochuja na něhdźe 300 eurow. Skućićel spyta z kolesom ćeknyć, štož pak so jemu njeporadźi. Nětko je w přepytowanskej jatbje.
