Wotmołwa njespokoja

wutora, 24. meje 2022 spisane wot:

Na schodach před Budyskim krajnoradnym zarjadom sedźeše wčera Wojerowski farar Jörg Michel a je z hłodowym stawkom na njedostatki krajnoradneho zarjada skedźbnił. Stajił je pódla so plakat z napisom „Knježe krajny rada, čakam na wotmołwu!“

Budyšin/Wojerecy (SN/MiR). Ze swojej akciju, kotruž je mjeztym hižo zakónčił, kritizowaše Wojerowski farar a rěčnik wobydlerskeho zwjazka „Wojerecy pomhaja z wutrobu“, zo je Budyski zarjad za wukrajnikow wosobinske daty třećim spřistupnił a zo njeje narunał financnej požčonce ewangelskeje cyrkwje prošacymaj wo azyl. Farar Michel bě wjackróć pisomnje na to skedźbnił, wotmołwy pak njedóstał.

Maja słužić

wutora, 24. meje 2022 spisane wot:
Přeju sej, zo bychu w zarjadach skutkowacy směli přidać, – bjez toho, zo dyrbjeli so někajkich sćěhow bojeć – zo je něšto misnyło. Potom móhli, kaž we wšědnym žiwjenju, naležnosć zrjadować bjez wulkich wušparanjow. Znajemy tola wšitcy hesło, zo tam, hdźež čłowjekojo dźěłaja, so tež zmylki woraja. Hinak to wězo wupada, hdyž wobsteji podhlad, zo spyta w někajkim zarjedźe něchtó něšto schować abo samo zamjelčeć. To při konfliktnych temach scyła ničo njepřinjese. Wšako stej na tajkich rozestajenjach dwě stronje wobdźělenej. A štož ta jedna po wšěm zdaću hižo njewě a na čož je zabyła – ta tamna ma za to bjezdwěla dopokazy abo wě so cyle dokładnje dopomnić. A hdyž potom wo to dźe, potrěbnym pomoc zaprajić abo pomocnikam „stólc před durje“ stajić – potom so prašam, hač su sobudźěłaćerjo zarjadow na to zabyli, z kotreje přičiny woni tam su. Maja pomhać a čłowjekam słužić, kotřiž pomoc trjebaja. Milenka Rječcyna

Budyšin (CS/SN). Što zaběra žony w Budyskim wokrjesu? Tute prašenje chcyše njestronski kandidat za wólby krajneho rady Alex Theile ze žonami diskutować, kotrež so za runostajenje, inkluziju a prewenciju přećiwo namocy angažuja. Ně­hdźe dwanatk tajkich a jedyn muž běchu wčera wječor do Budyskeho hotela Best Western přišli.

Z rolatorom zwučowali

póndźela, 16. meje 2022 spisane wot:
Kak zalězu najlěpje z busa a do njeho, hdyž mam w rolatoru nakupy? Wotmołwy na tajke a podobne prašenja dósta tele dny nimale 30 staršich ludźi na Wojerowskim Łužiskim naměsće. Woni poskitk přirady seniorow a wobchadnych zawodow rady přiwzachu. Wobstajneho treninga dla je mjeztym mjenje njezbožow a škodow w zwisku z wuměnkarjemi z rolatorami. Přichodne tajke zwučowanje budźe 28. septembra we Wojerowskim starym měsće. Foto: Silke Richter

Jedne z kapłanskich bydlenjow na Chróšćanskej farje tuchwilu tak zarumuja, zo móže zajutřišim ukrainska swójba ze sydom dźěćimi do njeho zaćahnyć. Za to su tam wutworili pomocny kruh pod nawodom předsydki wosadneje rady Jadwigi Nukoweje. ­Pomocnicy chcedźa swójbu tež přewodźeć. Wosadni kaž tež priwatnicy z druhich kónčin darichu blida, kamor, łožo, matracy a poćehnjenja kaž tež kuchnju a samo telewizor. Wulki dźěl su wčera do bydlenja znosyli. Foto: Feliks Haza

Oldtimery zynčeli a rželi

póndźela, 25. apryla 2022 spisane wot:

Bóšicy (SN/MiR). Nadměru wulki bě wothłós na kónctydźensku jězbu dwu- a štyritaktowych oldtimerow po třiróžku mjez Bóšicami a Wětrowom. Wjace hač 1 500 wopytowarjow, kaž běchu organizatorojo wočakowali, je sej wobhladało jězbu 80 motorskich kaž tež tajkich z přiwozom, kotrež jězdźachu, haj samo smalachu, po dróhach, kotrež Wětrow, Bóšicy a Nowe Bóšicy zwjazuja. Wobdźělnicy běchu z cyłeje Němskeje a ze susodneje Čěskeje do Łužicy přijěli.

Pomoc z Budyšina do Lwowa dóšła

pjatk, 22. apryla 2022 spisane wot:
Wulke wjeselo zbudźił je transport pomocnych srědkow z Budyšina pola socialneje załožby Swj. Wolodymyra w ukrainskim Lwowje. Na wšě 3,7 tonow pomocnych srědkow bě towarstwo „Ekumeniski Tachantski wobchod Budyšin“ w zhromadnym dźěle z Němsko-serbskim ludowym dźiwadłom nazběrał. Přepodali su dary při ukrainskej mjezy pola Krakoveca. „Dźakuju so wšitkim, kotřiž su z pjenjezami, wěcnymi darami a druhej podpěru k poradźenju projekta přinošowali“, zdźěla předsyda towarstwa Peter-Paul Straube. Mjeztym je wotmołwa w formje fota z Lwowa dóšła, hdźež su prěnje potrěbne swójby hižo podpěrać móhli. Foto: priwatne

W Serbach znata praksa „Kolebka“ w Swinjarni bu před třomi lětami załožena. Hanka Pěčcyna je jedna z třoch tam dźěłacych młodych babow. Za wulke zbožo ma wona šěroki poskitk.

Swinarnja (xš/SN). Kursy do poroda, akupunktura, tapowanje a homeopatija su požadane. Wšitko je direktne přiměrjene na jednotliwu žonu. Dalši plus je, zo samodruhe žony­ hižo do poroda z babu w kon­takće su a sej tak dowěru natwarja. Tak móža fachowče žony po porodźe doma přewodźeć a w „Kolebce“ zastarać. Korony dla dyrbjachu baby kursy płaćacym prawi­dłam přiměrić. Najwjetše wužadanje bě rumnosće namakać, kotrež wotpowědnje wulke su. Wosebite ćělne wužadanje bě nošenje nahubnika. Tuž su w lěću kursy kaž gymnastiku po porodźe pod hołym njebjom přewjedli a dalše, kaž tež poradźowanja, online podawali.

Za wšitkich

wutora, 29. měrca 2022 spisane wot:
Kulow (SN). W Kulowskim Jakubecowym wustawje ma nastać socialne zetkanišćo. Loni w lěću bu spěchowanski program „Socialne městnosće“ zahajeny. Nětko so prěnim projektam trěbne pjenjezy při­zwola a posrědkuja. Sakska socialna ministerka Petra Köpping (SPD) chce w Kulowje přepodać towarstwu ­„Verein(t) für Wittichenau“ za projekt „Jakubecowy wustaw – zetkanišćo a angažement za kóždu starobu“ spěchowanje we wyso­kosći 380 000 eurow. Ze srědkami ma so w Kulowje – konkretnje centralnje ležace twarjenje historiskeho dźěla Jakubecoweho wustawa, kotrež bě dotal jako dźěćace dnjowe přebywanišćo słužiło – zet­kanišćo wutworić. Towarstwo dóstanje spěchowanje za tři lěta hač do 2024 w ramiku noweho spěchowanskeho programa „Socialne městnosće“. Na přepodaću wopisma wo spěchowanju, kotrež ma so jutře na zažnym popołdnju w Jakubecowym wustawje w Kulowje wotměć, budu nimo ministerki přitomni Kulowski měšćanosta Markus Posch, farar dr. Wolfgang Křesák (jako mějićel wustawa) kaž tež Martin Klimank, předsyda towarstwa „Verein(t) für Wittichenau“.

Witajmy jenako!

pjatk, 25. měrca 2022 spisane wot:
„Lěpša witanska kultura“ móhła bjezdwěla tójšto branšam porjedźenje njedostatka fachowcow nastupajo polěkować. Hižo dołho rěčimy wo Němskej jako „zapućowanskim kraju“, hižo dołho wěmy wo zestarjenju towaršnosće, hižo dołho słyšimy wo ruce łamacym wabjenju zajimcow za wu­kubłanske městna najwšelakorišich wobłukow. Zo smy bjeze wšeho kmani tajku­ kulturu zwoprawdźić, to runje do­žiwjamy: Ukrainskim ćěkancam tele dny spěšnje a njeběrokratisce pomhamy, maksimalnje tři dny ma jich přebytk w prowizoriskich „zběrnych lěhwach“ trać, prjedy hač móža so swobodnje po Němskej resp. EU pohibować, šulskej winowatosći wotpowědować a samo dźěłać. Poradźi-li so nam, přichodnje podobnje z čłowjekami postupować, kotřiž chcedźa so wójnam, potłóčowanju a/abo přesćěhanju wuwinyć, byrnjež na přikład ze Syriskeje, Afghanistana abo Somalije pochadźeli, by to dobry krok doprědka był – za „nas“ runje tak kaž za „nich“. Bosćan Nawka

Serbska debata

nowostki LND