Pytaja blachowe wotpadki
Budyšin. Za lětušu hodownu klankodźiwadłowu inscenaciju pyta Budyske NSLDź blachowe wěka za šrubowanje, wěka piwowych blešow a dalše blachowe wotpadki we wšěch barbach a formach. W inscenaciji póńdźe wo to, kak móžeš tajke a podobne wěcy zmysłapołnje wužiwać. Tuž móža zajimcy swoje wupalene čajowe swěčki, skóncowane wěka horncow, zezerzawjene křidy a podobny čapor wot 28. awgusta hač do 9. nowembra při dźiwadłowej kasy k wotewrjenskim časam wotedać.
Wustajeja pruwowanske dźěła
Kamjenc. Zwjazk blidarjow Budyskeho wokrjesa přeproša zajimcow sobotu, 21. julija, do rumnosćow EWAG w Kamjencu, Při měšćanskich zawodach 2. Tam budu tón dźeń wot 14 do 16 hodź. widźeć pruwowanske dźěła wučomnikow, kotřiž su po třoch lětach swoje blidarske wukubłanje wuspěšnje zakónčili. Zastup je darmotny. Kaž w přeprošenju rěka, móža so wopytowarjo wo fachowych kmanosćach wučomnikow we wšelakich specialnych směrach, kaž su to twar durjow, meblow abo schodow, přeswědčić a budu překwapjeni, kak mnohostronsce a kreatiwnje su wukubłancy dźěłali.
Wot póndźele móst zawrjeny
Budyšin. Dróhotwarskich dźěłow na Budyskej Hasy Clary Zetkin dla budźe Móst měra wot póndźele, 16., hač do soboty, 21. julija, dospołnje zawrjeny. Wot kružneho wobchada hač k Leibnitzowej budźe wotrězk dróhi slepa hasa. Wobchad do města powjedu kaž hižo zašłe tydźenje přez Móst swjateho ducha a Wonkownu Lawsku. Z města won dyrbja awta přez Nowosólsku a zapadnu tangentu jězdźić. Kolesowarjo a pěšcy móža zawrjeny wotrězk dale wužiwać.
Wodźa zajimcow po měsće
Biskopicy. Tři radnicy steja jutře, sobotu, w srjedźišću zjawneho měšćanskeho wodźenja w Biskopicach. Prěnju radnicu natwarichu 1286 na torhošću. Dźensniša nasta tam před 200 lětami na zakładnych murjach druheje radnicy. Zajimcy zetkaja so w 15 hodź. při radnicy na torhošću. Přizjewić so njetrjebaja.
Ponowja wotrězk puća
Łomsk. Statna dróha S 106 we Łomsku w Radworskej gmejnje budźe wutoru, 17. julija, dospołnje zawrjena. Přičina su dróhotwarske dźěła. Po 240 metrow dołhim wotrězku pokryja tam puć z nowej asfaltowej worštu.
Swjeća 20lětne wobstaće
Smječkecy. Z wjesnym swjedźenjom zhladuje Smječkečanski wjesny klub Při winicy wot zajutřišeho hač do njedźele, 15. julija, na 20lětne wobstaće. Po pjatkownym natočenju piwa změja sobotu popołdnju wosebity program za młode swójby z wubědźowanskim parcoursom. Dobyćerjej kiwa jako prěnje myto swójbny lisćik za Wojerowski zwěrjenc. Wječor zahrajetaj diskoteka Melodia ze Serbskich Pazlic a Berlinski DJ Nellski. Wot 20.30 do 21.30 hodź. změja tak mjenowanu happyhour, hdyž poskića dwaj napojej za płaćiznu jednoho. Po njedźelnym rańšim piwku slěduje w 14 hodź. ekumeniski nyšpor w ewangelskej cyrkwi z fararku Karin Großmann a z diakonom Pětrom Mrózom. Po tym su wšitcy na kofej a tykanc kaž tež na pisany program wjesnjanow a hosći přeprošeni.
Wězo pokazaja w 17 hodź. finalnu hru koparskich swětowych mišterstwow. Wšitcy zajimcy su tuž do Smječkec wutrobnje přeprošeni.
Na rozmołwu z politikarjemi
Kamjenc. Předsydka Lěwicy a zapósłanča zwjazkoweho sejma Katja Kipping budźe jutře, wutoru, w Kamjencu. Hromadźe ze zapósłanču Sakskeho krajneho sejma Marion Junge prosy wona na piknik a rozmołwu na zahrodowej kulturnej šćežce. Zajimcy zetkaja so w 10 hodź. před hotelom „Villa Weiße“ blisko dwórnišća. Tam wočakuja tohorunja předsydu frakcije Lěwicy krajneho sejma Rica Gebhardta. Wot 13 hodź. chcedźa wšitcy třo Kamjenskej tafli pomhać. Wot 16 hodź. je dalša rozmołwa z wobydlerjemi při kofejowni před Klóšterskimi wrotami planowana.
Za dźěłarničku so přizjewić
Wojerecy. Wot 30. julija do 3. awgusta wotměje so na Wojerowskej dźěćacej a młodźinskej farmje cirkusowa dźěłarnička za dźěći a młodostnych w starobje sydom do 18 lět. Wšědnje wot 9 do 16 hodź. budu tam wobdźělnicy akrobatiku, kuzłarstwo, reje a wjele dalšeho zwučować. Nazwučowany program předstaja woni 3. awgusta w 16 hodź. Za dźěłarničku móža so zajimcy hač do 16. julija přizjewić, a to pod telefonowym čisłom 03571/ 979 164 abo e-mailnje pod .
Dyrdomdej po měsće
Pytaja mjeno za puć
Hórnikecy. Wot minjeneho kónca tydźenja twarja w Hórnikecach nowy puć k Energijowej fabrice. Po nim budu wopytowarjo přichodnje hač k muzejej jěć móc. Je to dźěl cyłkowneho přetwara bywšeje briketownje na muzej. Nětko pyta Wojerowske měšćanske zarjadnistwo namjety za mjeno noweho puća. Te móža wobydlerjo hač do 17. awgusta e-mailnje w radnicy wotedać, a to pod adresu . Wažne je wobkedźbować, zo njedóńdźe k dwojenju z hižo wobstejacymi mjenami, tež podobnym pomjenowanjam měło so zadźěwać.
Po bahnje pućować
Michałki. Kulowska skupina přirodoškitneho zwjazka NABU poskića w prózdninach wosebite pućowanja po Dubrjenskim bahnje. Prěnje budźe zajutřišim, njedźelu. Dalšej terminaj stej 22. julij a 5. awgust. Zajimcy zetkaja so stajnje w 9 hodź. při hosćencu w Michałkach. Wobdźělenje płaći za dorosćenych dwaj euraj, dźěći smědźa darmotnje sobu pućować.
Kak su so něhdy wochłódźili?
Po Bohatej kolesować
Budyšin (SN). Po Hłownym torhošću a po Bohatej hasy w Budyšinje je nětko móžno kolesować. Kaž měšćanske zarjadnistwo zdźěli, wotpowěduja tak přeću mnohich wobydlerjow, zo móhli wobchody spěšnišo docpěć. Přichodne tydźenje chcedźa w pospyće zwěsćić, hač je móžno, zo pěšcy a kolesowarjo měrliwje mjez sobu wuńdu. Test ma hač do 23. nowembra trać. Hač do nalěća chcedźa jón wuhódnoćić a potom wobzamknyć, hač smědźa kolesowarjo dale po Bohatej a po torhošću jězdźić. W pospyće za nich płaći, zo činja to jenož pomału a zo maja pěšcy stajnje „předjězbu“. Nazhonjenja wobydlerjow budu při wuhódnoćenju sobu wobkedźbować.
Bórze započnu twarić
Kurs hakle popołdnju
Chrósćicy. Tydźenski intensiwny kurs čěšćiny z Čechom Janom Breindlom budźe w poslednim tydźenju wulkich prózdnin wot 6. do 11. awgusta w Chrósćicach na farje. Wučba započina so wšědnje hakle w 14 hodź. a traje hač do 18 hodź. Wona wopřijima čěskorěčne přednoški wo čěskej kulturje, stawiznach a politice. Dale wotměje so filmowy, spěwny a kulinariski wječork. Sobotu wuleća sej wobdźělnicy do Libereca. Zajimcy njech přizjewja so w Rěčnym centrumje WITAJ pod telefonowym čisłom 0 35 91 / 55 04 00 abo e-mailnje pod adresu .
Pytaja elewow za chór
Pytaja přinoški za nowinu
Budyšin. Składnostnje dźesaćlětneho wobstaća Budyskeho wokrjesa w jeho dźensnišej formje planuja wudać wosebite wudaće hamtskeho łopjena. Zajimcy móža nowinu sobu wuhotować a za nje mjeńše přinoški, komentary a fota zapodać. Jednać móže so tu wo wosebite wokomiki zašłych dźesać lět, wo najrjeńše městnosće abo wo wosebitych ludźi. Wuraznje su tež serbske přinoški witane, kaž zamołwity sobudźěłaćer krajnoradneho zarjada Peter Stange wobkrući. Přinoški měli zapodać hač do 6. julija e-mailnje pod adresu .
Po mlokowym swěće dundać
Koćina. Ratarski zawod Krabatowy mlokowy swět w Koćinje přeproša w lětnich prózdninach wosebje swójby kóždy pjatk wot 9.30 do 12.30 hodź. na prózdninske wodźenje. Po snědani z čerstwym mlokom, jogurtom a twarožkom podadźa so wone do hródźow a twarožkarnje. Jako zakónčenje poskića jim sobudźěłaćerjo wobjed ze słódneho bifeja „Łužica słodźi“. Zajimcy měli so na kóždy pad do toho přizjewić, a to telefonisce pod čisłom 03 57 25 / 92 90 12 abo e-mailnje pod .
Na zawodny jubilej
Dopomina so na dźěćatstwo
Budyšin. „Katta“ rěka kniha Hagena P. Kadena, kotraž steji w srjedźišću přichodneho zarjadowanja w Budyskej Smolerjec kniharni, a to jutře, štwórtk, w 19.30 hodź. W swojej knize powěda awtor Kaden napjate, žortne, druhdy ćiche, ale tež strašne dźěćace a młodźinske pryzle, kotrež bě sam w 1950tych lětach w kónčinje južnje Budyšina dožiwił. Na čitanski wječor su wšitcy wutrobnje přeprošeni.
Šulski muzej přeproša
Stróža. Na dźeń wotewrjenych duri přeprošuje Stróžanski Serbski šulski muzej „Korla Awgust Kocor“ sobotu, 30. junija. Wot 14 do 17 hodź. móža so tam zajimcy rozhladować a zhonić, kajke běchu něhdy šulske poměry na wsy. Demonstrować chcedźa hodźinu stawiznow, ručneho dźěła a domiznowědy. Wo ćělne derjeměće budźe postarane.
Spěwaja pod dubom
Židźino. Mjeztym hižo 32. raz wotměje so jutře, srjedu, w 19 hodź. wječorne spěwanje pod měrowym dubom w Židźinom. Na nje přeproša tamniši chór pod nawodom Kerstin Lieder. Jako hóstny cyłk su sej lětsa Łazowski muski chór pod nawodom Yvetty Michael zdobyli. Organizatorojo nadźijeja so bohateho wopyta. Wšitcy su lubje witani.
Zabawa na zahrodźe
Hodźij. Přijomna serbska zabawa drje knježi jutře, srjedu, na Hodźijskej farskej zahrodźe. Tam organizuje Hodźijska Bjesada serbski spěwny wječor. „Chcemy sej zhromadnje někotre serbske pěsnje zanjesć a k tomu pobjesadować“, rjekny Hodźijski farar Christoph Rummel. Započatk budźe we 18 hodź. Přeprosyli su sej za jutřiši wječor tež čłonow Rakečan- skeje Bjesady.
