Hońtwjerjo nyšpor swjećili
Kulow. Hubertusowy nyšpor wotmě so minjenu njedźelu w Kulowskej cyrkwi. Na nim wobdźělichu so přewažnje hajnicy-hońtwjerjo. Na nyšporje zahra dujerska skupina z Huskeje. Swjećili su nutrnosć na česć swjateho Hubertusa Kulowski farar Gabriš Nawka. Z nyšporom spominachu na swjateho, kotrehož mjeniny jutře swjećimy. Swj. Hubertus běše biskop a je zdobom patron hońtwjerjow. Jeho česća w katolskej runje tak kaž w ewangelskej cyrkwi.
Do hornčernje pohladnyć
Bóšicy. Lubowarjo keramiskich wudźěłkow njech njeskomdźa dźeń wotewrjenych duri w Bóščanskej Barchmannec hornčerni. Sobotu a njedźelu, 4. a 5. nowembra, móža sej tam wobaj dnjej wot 9 do 17 hodź. hornčernju wobhladać, přistajenym při dźěle přez ramjo hladać a sej něšto z wobšěrneho poskitka kupić. Nadrobniše informacije pod adresu www.toepferei-barchmann.de
Koch w ródnej wsy čitał
Hórki (KJu/SN). Na přeprošenje wjesneho towarstwa Při skale je rodźeny Hórčan Jurij Koch minjeny pjatk w tamnišej wohnjowobornej gratowni ze swojich dopomnjenkow na dźěćatstwo a młodźinske lěta čitał. Něhdźe 20 ludźi słyšeše wurězki z knihow „Zabych ći něšto rjec„ a „Wětrnik na třěše“. Mjez wopytowarjemi bě bratr Jurja Kocha Rudi, kiž móžeše rozprawam swojeho bratra něštožkuli přidać. Wjetšina wšak wosobiny a městna w knihomaj znaješe, tak zo dóńdźe k zajimawym rozmołwam. Młody Choćebuski akordeonist Daniel Grunski je čitanje hudźbnje wobrubił. 15lětny zanjese ruske pěsnje, wšako pochadźataj jeho staršej ze Sibirskeje, zwotkelž staj so před 16 lětami do Němskeje přesydliłoj.
Poskićeja adwentny kalender
Wjelk w bajkach a powěsćach
Stróža. Na runje tak aktualny kaž zajimawy přednošk su zajimcy srjedu, 1. nowembra, w 19 hodź. do Stróžanskeho Domu tysac hatow přeprošeni. Tam přednošuje dr. Susanne Hozyna na temu „Wjelk w bajkach a powěsćach“. Wědomostna sobudźěłaćerka Serbskeho instituta zaběra so z prašenjom, zwotkel pochadźa strach před wjelkom a kak so wón w bajkach a ludowych powěsćach wotbłyšćuje. Zastup płaći dwaj euraj, potuńšeny jedyn.
Za tydźeń na premjeru
Šunow. Lubowarjo lajskeho dźiwadła dožiwja bórze nowu hru lajskeje dźiwadłoweje skupiny Šunow-Konjecy. Jeje čłonojo nazwučuja tuchwilu komediju „Kurowa klinika ,Wjesoła mysl‘“. Kruch změje sobotu, 4. nowembra, we 18 hodź. premjeru w Šunowskej Fabrikskej hospodźe. Dalše předstajenje ze simultanym přełožkom přizamknje so na samsnym městnje njedźelu, 5. nowembra, w 16 hodź. W nowembru a decembru hru hišće trójce pokazaja, dalše předstajenja budu klětu.
Informuja wo spěchowanju
Njebjelčicy. Euroregion Nysa z.t. a Njebjelčanska gmejna přeprošatej jutře, štwórtk, na informaciske zarjadowanje pod hesłom „Spěchowanje mjezy přesahowaceho zhromadneho dźěła w euroregionje Nysa – Móžnosće serbskich gmejnow, zarjadnišćow a towarstwow“. Zarjadowanje započnje so we 18.30 hodź. w Njebjelčanskim gmejnskim zarjadnistwje. We wobłuku programa Interreg hodźa so mjez druhim seminary, dźěłarnički, wjacerěčne publikacije, turistiske projekty a dalše spěchować. Wo tym móža so zajimcy jutře tež indiwidualnje poradźować dać.
Wobswětleny Boži dom
Budyšink. W cyle nowym swětle dožiwja zajimcy wot jutřišeho hač do soboty cyrkej w Budyšinku. Te dny budźe Boži dom stajnje wot 19 do 22 hodź. na wosebite wašnje wobswětleny. K tomu zaklinča hudźba, zwuki a rěč. 40 mjeńšin trajacy program budźe na kóždym z mjenowanych wječorow wjacore razy předstajeny. Wopytowarjo móža tuž sami rozsudźić, hdy chcedźa hić abo hač sej wěstu scenu z hinašeje perspektiwy hišće raz wobhladaja.
Luthera „live“ dožiwić
Předstaja knihu
Budyšin. Nowu knihu Pawoła Roty „Z kameru a pisakom po Delanach“ předstaja štwórtk, 26. oktobra, w 19.30 hodź. w Budyskej Smolerjec kniharni. Zaměrnje a z wulkej přichilnosću je Pawoł Rota ze swojimi njeličomnymi přinoškami, powědkami a basnjemi w běhu lětdźesatkow Delanam w serbskim pismowstwje trajny pomnik stajił. Na knižnym předstajenju čitaja wurězki z jeho knihi. Awtor budźe přitomny.
Socialne poradźowanje
Hlinka. Zapósłanc Sakskeho krajneho sejma a prawiznik Hajko Kozel (Lěwica) přeproša pjatk, 27. oktobra, na darmotne socialne poradźowanje do rumnosćow „Stareje šule“ w Hlince (Cunnersdorf) w gmejnje Schönteichen. Zhromadnje z prawiznikom Gregorom Janikom, w socialnym prawje wosebje wobhonjenym, skići wón pomoc při rozrisanju problemow, kotrež so často w socialnych prašenjach jewja. Poradźowanje wotměje so wot 13 do 16 hodź.
Předstaja knihu
Budyšin. Nowu knihu Pawoła Roty „Z kameru a pisakom po Delanach“ předstaja štwórtk, 26. oktobra, w 19.30 hodź. w Budyskej Smolerjec kniharni. Zaměrnje a z wulkej přichilnosću je Pawoł Rota ze swojimi njeličomnymi přinoškami, powědkami a basnjemi w běhu lětdźesatkow Delanam w serbskim pismowstwje trajny pomnik stajił. Na knižnym předstajenju čitaja wurězki z jeho knihi. Awtor budźe přitomny.
Durje konjenca wočinjene
Rakojdy. Na dźeń wotewrjenych duri su zajimcy njedźelu, 22. oktobra, na Bartušec šumjelowy dwór do Rakojd přeprošeni. Wot 10.30 hodź. móža woni tam do konjencow pohladnyć, so w jězdźenju z konjacym zapřahom pospytać a při dresurje přihladować.
Koncertaj wotprajenej
Budyšin. Załožba za serbski lud je nazymskej koncertaj 22. oktobra we Worklecach a 4. nowembra w Hórkach wotprajiła. We Worklecach njeje žana móžnosć pohosćenje zaručić, a za Hórki bě skupina JANKAHANKA pobrachowaceho hudźbnika dla wotprajiła. Wšitke dalše nazymske koncerty so wotměja.
Přednošuje wo židach
Přewjedu zetkawanski tydźeń
Smochćicy. Konflikty a njedorozumjenja w zhromadnym žiwjenju z ludźimi druhich kulturow nastanu zwjetša přemało pozadkoweje wědy wo kulturje, tradicijach, nabožinje a politiskich zwiskach dla. Tohodla přewjedźetej Budyski wokrjes a Smochčanski Dom biskopa Bena wot 13. do 17. nowembra kubłanski a zetkawanski tydźeń. W tym času budźe składnosć so wo žiwjenju w rańšim kraju informować, při čimž póńdźe wo wěru runje tak kaž wo swójbne žiwjenje a wuměłstwo. Dalše informacije nadeńdu zajimcy pod www.landkreis-bautzen.de. Tam su tež přizjewjenja móžne.
Rock a klasika zaklinčitej
Budyšin. Na wosebite koncertne dožiwjenje přeproša Nowa Łužiska filharmonija njedźelu, 22. oktobra, w 19.30 hodź. do wulkeho domu Budyskeho NSLDź. Tam zahraja rockowu sinfoniju „Concerto for Group and Orchestra“, kotruž běštej kapała Deep Purple a Royal Philharmonic Orchestra w lěće 1969 prěni raz předstajiłoj. Nimo toho zaklinči twórba Antonína Dvořáka.
Spominaja na Kandlera
Smječkecy (AK/SN). Z wopomnjenskej taflu počesći Smječkečanska wosada mnohostronskeho architekta Woldemara Kandlera. Drježdźanski cyrkwinski twarski mišter (1866 – 1929) je wjace hač 23 cyrkwjow, mjez druhim w Smječkecach, jako architekt natwarić dał. K tomu přińdu kapałki na kěrchowach, farske domy a profanowe twarjenja. „Smječkečanska cyrkej je ze swojej bliskosću cyrkwinskeho ruma a wołtarnišća architektonisce tak koncipowana, zo móža tu ludźo zhromadnosć dožiwić“, fararka Karin Großmann měni. Poswjećenje wopomnjenskeje tafle wotměje so zajutřišim, njedźelu, 15. oktobra, w 10 hodź., na swjatočnych kemšach w Smječkecach. Přeprošeni su tež přiwuzni Kandlera.
Zaso tójšto namakankow
Wojerecy (SN). Z Wojerowskeho běrowa wyšeho měšćanosty rěka, zo su ludźo w času wot 1. do 30. septembra w měšćanskim běrowje namakankow zaso tójšto wěcow wotedali – wosebje kluče, kolesa a handyje. Štóž tajke abo podobne zhubjenki pyta, njech so hač do 28. februara 2018 we wobydlerskim běrowje přizjewi.
Wuměłstwo w chorowni
Wojerecy (SN/mwe). Hač do 7. nowembra su pod titulom „Fabulieren in Farbe“ ilustracije a rysowanki zemrěteho Mišnjanskeho wuměłca Lothara Sella w geriatriskej dnjowej klinice Łužiskeho jězorinoweho klinikuma wustajene. Kaž nam dźensa z jednaćelstwa chorownje zdźělichu, je ekspozicija tójšto připóznaća dóstała. Nimo pacientow a wopytowarjow chorownje bě sej ju tež tójšto wobydlerjow města a wokoliny wobhladało. „Dźensa sej zajimc mólbu kupi“, rěkaše. Geriatriska dnjowa klinika w přizemju, blisko hłowneho zachoda klinikuma, je wotydźenja wot 9 do 16 hodź. spřistupna.
Torhošćo bórze přetworjene
Pacienća přećah njepytnu
Kamjenc (SN). Zamołwići z přećahowanskimi dźěłami ambulantneje hladanskeje słužby maltezow z Worklec do Kamjenca zaměrnje pokročuja. Kaž wjednica hladanskeje słužby Marika Nowakowa informuje, pacienća tónle přećah njepytnu. Wona potwjerdźi, zo so wšitcy na městnje a po zwučenym wašnju dale zastaruja. Po přećahu maltezojo přidatne poradźowanske posłužby poskićeja.
Lětnu kartu dobyli
Wojerecy (SN). We Wojerowskim zwěrjencu wotmě so dźensa tróšku hinaši prózdninsi dźeń za dźěći. Ze slědźenskim čuchom, wćipnotu a wulkim wjeselom móžachu wone na wosom stacijach dypki hromadźić. Najlěpšim kiwaše lětny zastupny lisćik do woblubowaneje coologiskeje zahrody jako wosebite myto.
