Horni Wujězd. Saněrowanskich dźěłow dla budźe wotjězd z awtodróhi A 4 w Hornim Wujězdźe přichodny tydźeń dwójce zawrjeny. Wutoru, 20. apryla, dźěłaja na wotbóčce do směra na Zhorjelc, nazajtra do směra na Drježdźany. Wob­jězdka budźe wupisana, wona powjedźe do Zhorjelca přez Słonu Boršć a do Drježdźan přez Porchow.

Poskića kubłanski tydźeń

Smochćicy. Pod hesłom „Mjenje stresa – wjace wjesela“ přeproša Smochčanske kubłanišćo swj. Bena za tydźeń wot 28. awgusta do 4. septembra na swójbny kubłanski tydźeń. Nimo zetkanjow a hrow dóstanu starši pokiwy k wšědnemu dnjej w swójbje z dźěćimi wot třoch lět. Při tym póńdźe hłownje wo kubłanski stil a wo potrjeby dźěći. Tydźeń wobrubja z pisanym programom wšelakich akcijow, kotrež su temje wobsahowje přiměrjene. Za čas ­seminarow za staršich poskića dźěćom wosebity program. Přizjewjenja přijimuja internetnje pod www.bildungsgut-schmochtitz.de abo pod telefonowym čisłom 03 59 35 / 2 23 17.

Chrósćicy. Nakup mustwoweho transportera za Chróšćansku wohnjowu woboru budźe jedna z temow přichodneho posedźenja tamnišeje gmejnskeje rady jutře, štwórtk, w 19 hodź. w sydarni gmejnskeho a kulturneho centruma. Dale chcedźa radźićeljo přepodać nadawk wutworić w Serbskej zakładnej šuli Chrósćicy WLAN-syć z controllerom a firewall. Nimo toho zaběraja so z dalšim wu­twarom dróhi wot Nuknicy do Lejna, za čož ma so zrěčenje za inženjerske wukony wotzamknyć. Wobydlerjo su wutrobnje přeprošeni.

Zwukowu instalaciju zakónča

Rakecy. Z dołhej nocu z psalmom 23 zahaji so zakónčenje spirituelneje zwukoweje instalacije w Rakečanskej ewangelsko-lutherskej cyrkwi. Dźakny nyšpor pjatk, 16. apryla, započnje so w 19 hodź. Hač do 23.06 hodź. budźe Boži dom přistupny. Pozadk njewšědneho časa je, zo wopřijima psalm 23 šěsć štučkow. Projekt wostanje hač do 18. apryla słyšeć.

Budyšin. Pod hesłom „Serbja we Łužicy. Drěmacy pokład w Sakskej?“ přeproša Politiski ku błanski forum Sakska Konrada Adenaueroweje załožby hišće na dwě onlinowej zarjadowani z diskusiju. Jutře, srjedu, wěnujetaj so něhdyša zapósłanča zwjazkoweho sejma a bywša předsydka Rady za serbske naležnosće Sakskeje ­Marja Michałkowa kaž tež Slepjanski wjesnjanosta Jörg Funda (CDU) temje ­„Jedyn lud, jedyn hłós!? – Politiska participacija Serbow w Sakskej“. Hosćo poslednjeho zarjadowanja 21. apryla pod hesłom „Młodźi a dynamiscy – Perspektiwy do přichoda za Serbow“ budu ­Dawid Statnik, předsyda Domowiny, kaž tež Helena Hejduškec a Jakub Wowčer ­ze Serbskeho młodźinskeho towarstwa Pawk. Za wobě zarjadowani je přizjewjenje trěbne. Z wobkrućenjom dóstanu zajimcy přistup připósłany. Link na stronu k přizjewjenju je mjez druhim pod www.posol.de wozjewjeny.

Premjera knihi wirtuelnje

Boranecy. Zhromadnu twarsku naprawu wopłóčkoweho zaměroweho zwjazka Mała Sprjewja, Budyskeho wokrjesa, wo­krjesnych zawodow Budyšin a Radworskeje gmejny wot póndźele, 12. apryla, w Boranecach zwoprawdźa. Tam hłowny puć přez wjes wobšěrnje ponowja a při tym trěbne medije znowa składu. Twarske dźěła maja hač do spočatka decembra trać. W tym času puć dospołnje za­wru. Tež zastaranske a wotwožowanske jězdźidła kaž tež wuchowanska słužba njebudu přez wjes jěć móc. Hač k nawsy přijědu wone pak z Radworskeho směra pak ze směra Nowych Boranec. Kaž krajnoradny zarjad zdźěli, dyrbja wuchowanske mocy po zawrjenym dźělu dróhi nóžkować. Wotpadkowe sudobja wobydlerjow dowjezu sobudźěłaćerjo twarskich firmow k wotpowědnym městnam. Wokołopuć powjedźe po statnymaj dróhomaj S 106 a S 107 do wobeju směrow.