Rallye po měsće přewjesć
Coowy su „wěste“
Wojerecy. W zwjazku organizowane coologiske zahrody a zwěrjency su so z listom na zwjazkowu kanclerku Angelu Merkel (CDU) a ministerskich prezidentow krajow wobroćili, kaž Wojerowski zwěrjenc informuje. W lisće proša wo to, zo smědźa wot měrca zaso wotewrěć a swójbam za čas lockdowna wulětny cil być. Nastupajo přiběracy ćišć na staršich a jich dźěći maja coowy tajki poskitk za wurunanje. Při tym skedźbnjeja na hygienowe koncepty a přeja sej postupne wotewrjenje wonkownych a pozdźišo dalšich wobłukow.
Wuspěšne skutkowanje
Budyšin. W Budyšinje stacioněrowany helikopter „Christoph 62“ za wuchowanja z powětra (DRF) bě loni 1 527 króć zasadźeny, z toho 1 011 nuzowje a 516 króć za transport kritisce schorjenych abo zranjenych mjez klinikami. Lěto do toho bu 1 396 króć zasadźeny. Wot decembra maja w sprjewinym měsće dalši wuchowanski helikopter. „Christoph 114“ pomha při nuzowych zasadźenjach, zo by „Christoph 62“ móhł wjace na koronu schorjenych pacientow transportować. W Sakskej zasadźene tři helikoptery w słužbje DRF běchu loni cyłkownje 2 720 razow wołali.
Na planowanju so wobdźělić
Budyšin. Wobydlerjo su namołwjeni wuprajić so k naćiskej hospodarskeho plana 2021/2022 Budyskeho wokrjesa. Za to maja hač do 3. měrca chwile. Dokument je zajimcam na internetnej stronje www.landkreis-bautzen.de přistupny. Kaž hižo w zašłymaj lětomaj, je w etaće wokrjesa lětsa njecyłe a klětu něšto wjace hač 500 milionow eurow zaplanowanych. Tež w minjenymaj lětomaj su z tajkej sumu pjenjez hospodarili.
Kino hižo pjatk
Kino za cyłu swójbu
Budyšin. Swójbna schadźowanka Rěčneho centruma WITAJ lětsa njebudźe. Město njeje su wšitke serbske swójby na kinowy wječor přeprošene. Sobotu, 27. februara, w 17 hodź. pokazaja na stronje www.schadzowanka.de swójbny film „Gilles“, kotryž hodźi so za dźěći wot wosom lět. Wot lěta 2010 pask w serbskej rěči předleži. Wón powěda stawiznu wo sonach a wužadanjach wobdarjeneho dwanaćelětneho koparja Gillesa. Hłowneho rjeka rěči Jan Brězan.
Jutrowne wubědźowanje
Budyšin. Hišće hač do 19. měrca móža so dorosćeni zajimcy na 68. wubědźowanju wo najrjeńše jutrowne jejko wobdźělić. Kolekcije maja tři jejka, w jednej ze znatych serbskich technikow debjene, wopřijeć a z póštu zapodate być.
Pjenjezy potrěbnym swójbam
Budyšin. Budyski jobcenter přewostaja potrěbnym swójbam wotnětka přidatne pjenjezy za digitalne nastroje za distancnu šulsku wučbu. Potrjecheni, kotřiž su spěchowani po socialnym zakoniku 2, móža za to próstwu na 350 eurow stajić. Wuměnjenja su: Dźěćo chodźi na powšitkownu abo powołansku šulu, wone njeje starše hač 25 lět, wobdźěla so pandemije dla na distancnej wučbje a nima trěbne nastroje. Šula ma potrjebu wobkrućić.
Pěstowarnja zdźěla zawrjena
Budyšin. W Budyskim dźěćacym dnjowym přebywanišću „Benjamin Blümchen“ su schorjenje na koronu zwěsćili. Kubłarjo a dźěći potrjecheneje skupiny njemóža tuž karanteny dla do pěstowarnje. Žłobik njeje potrjecheny.
Industrijne stawizny wotkryć
Biblioteka zmóžnja kino
Budyšin. Hdyž su kina začinjene, móža lubowarjo filmow alternatiwu wužiwać, mjenujcy nowy poskitk Budyskeje měšćanskeje biblioteki. Přez portal „Filmfriend“ poskića wona wjace hač 2 500 hrajnych a dokumentarnych filmow, serijow a krótkofilmow. Na internetnej stronje biblioteki móža so zajimcy ze swojim wužiwanskim čisłom a tajnym hesłom přizjewić.
Pomhaja wikowarjam
Wojerecy. Z wot dźensnišeho w Swobodnym staće Sakskej móžnym nakupowanskim systemom „Click & collect“ měli tež wobydlerjo Wojerec swojich domoródnych wikowarjow podpěrać a pola nich nakupować. K tomu namołwja tamniše měšćanske zarjadnistwo, kotrež chce wikowarjam w měsće tohorunja pomhać. Tohodla wozjewja na internetnej stronje města přehlad wo wobchodach, kotrež „Click & collect“ poskićeja, a trěbne daty, zo móžeš pola nich twory skazać. Lisćina njeje dospołna. Wona złožuje so na přidźěło přemysłownikow a so wobstajnje aktualizuje. Pod www.hoyerswerda.de zajimcy lisćinu nadeńdu.
Wo aktualnych prašenjach
Budyšin. Wo aktualnej situaciji, wo kritikach na šćěpjenskej akciji a wo móžnych wupućach diskutuje póndźelu, 15. februara, wot 18 hodź. zapósłanča Zwjazkoweho sejma Caren Lay (Lěwica) online ze sakskim krajnym předsydu strony Stefanom Hartmannom, nowinskim rěčnikom sakskeho DRK dr. Kaijom Kranichom a z Budyskim měšćanskim radźićelom Lěwicy Steffenom Grundmannom. Zarjadowanje wusyłaja na facebookowej stronje zapósłanče pod adresu www.facebook.com/caren.lay. Prašenja a pokiwy móža zajimcy přez komentarnu funkciju mjenowanym wosobam posrědkować.
Kofej w blidarni
Budyšin. Serbski ludowy ansambl přeprosy zajutřišim, 14. februara, w 16 hodź. na digitalny kofej w blidarni ansambla. Alena Farkašowa a Rüdiger Žur, spěwarjej chóra Serbskeho ludoweho ansambla, prezentujetaj hižo wot 80tych lět ptačokwasne programy na jewišću. Lětsa staj wonaj archiwy překramosćiłoj a mataj tu abo tamnu stawiznu k powědanju, kiž staj samaj dožiwiłoj. Wobhladać móža sej zajimcy tónle poskitk na youtube-kanalu Serbskeho ludoweho ansambla.
Nominuja kandidata
Nowe puće w kniharni
Budyšin. Smolerjec kniharnja w Domje Ludoweho nakładnistwa Domowina na Budyskej Sukelnskej drje je koronoweje pandemije dla dale zawrjena. Wot póndźele, 15. februara, pak poskića tam service „Click & collect“. Skazanki zajimcow přijimuja pod telefonowym čisłom 03591/577 288, e-mailnje pod abo w online-wobchodźe pod www.domowina-verlag.de. Wotewzać hodźa so skazane twory ze zličbowanku wot póndźele do pjatka wot 9 do 16.30 hodź w Smolerjec kniharni. Kupcy měli klinkačk při zachodźe do kniharnje wužiwać.
Šulerjow přizjewić
Ralbicy. Podobnje kaž na druhich wyšich šulach maja tež na Ralbičanskej starši šulerjow lětsa dwě móžnosći, swoje dźěći do přichodneho 5. lětnika přizjewić. Z póštu je to hač do 17. februara móžno. Wosobinsce móža starši swoje dźěći hišće hač do 16. februara přizjewić, a to jutře, pjatk, wot 10 do 13 hodź., póndźelu wot 8 do 14 hodź. a wutoru wot 10 do 17 hodź. We woběmaj padomaj trěbne su přizjewjenski formular, kubłanske doporučenje, porodne wopismo, połlětna informacija a dopokaz šćěpjenja pře wosypicy.
Mosty skóncowane
