Adwentny kalender za dźěći
Worklecy. Dekanatne dušepastyrstwo za dźěći we Worklecach poskići lětsa adwentny kalender za dźěći. Wšědnje dóstanu wone z póštu adwentne woknješko připósłane. Protyčka je w třoch wariantach za pěstowarske dźěći kaž tež za šulerjow 1. do 4. lětnika a 5. do 8. lětnika přihotowana. Zajimcy njech so hač do srjedy, 25. nowembra, přez link, podaty pod www.posol.de, přizjewja. Nadrobniše informacije dóstanu woni we Worklecach pod telefonowym čisłom 03 57 96 / 8 87 07 abo e-mailnje pod .
Wustajeńcu přestorča
Budyšin. Wot 28. nowembra měješe wosebita wustajeńca „Smjerć & ritual. Předstawizniske chowanja pola Delnjeje Kiny“ zajimcow do Muzeja Budyšin wabić. Techniskich přičin dla pak dyrbja swoju přehladku přestorčić. Kaž muzej zdźěli, pokazaja ju tuž wot 15. oktobra 2022 hač do 15. januara 2023. Tule wosebitu wustajeńcu prezentuje Budyski muzej w kooperaciji z Kamjeničanskim statnym muzejom za archeologiju a ze Sakskim krajnym muzejom za archeologiju.
Koncert wotprajeny
Skrótšene časy
Budyšin. Koronapandemija wuskutkuje so nětko tež na Serbsku kulturnu informaciju w Budyskim Serbskim domje. Kaž wottam rěkaše, maja wot dźensnišeho na njewěsty čas skrótšene wotewrjenske časy. SKI je nětko wšědnje jenož hišće wot 10 do 14 hodź. přistupna.
Sudnistwo rozsudźiło
Kulow. Wjacore lěta trajace juristiske rozestajenje mjez městom Kulowom a Łazowskej gmejnu je skónčene. W druhej instancy je Kulow skóržbu přećiwo susodnej gmejnje přěhrał. Tak bě prawnisce w porjadku, zo je Łaz w lěće 2015 wupowědźił, wopłóčki z Wulkich Ždźarow a Koblic do Kulowskeje wodočisćernje klumpać. Wot toho časa ćeku wopłóčki z wobeju wsow do wodočisćernje na Horach. Po słowach Kulowskeho měšćanosty Markusa Poscha (CDU) najnowši wusud akceptuja. Wupowědźenja dla pak ma Kulow mjenje wopłóčkowych popłatkow.
Dóstanu nowy tomograf
Kónc z přećemi
Wojerecy. Dźensa, pjatk, bě posledni termin za wotedaće namjetow, kotrež měli so we wobłuku wobydlerskeho budgeta 2021 města Wojerec zwoprawdźić. Wjace hač 60 přećow z města samoho a z přisłušacych wokolnych wsow su minjene dny do měšćanskeho zarjadnistwa dóšli. Najprjedy internje pruwuja, što hodźi so zeskutkownić, w aprylu móža wobydlerjo potom swojich faworitow wolić.
Adwentničku wotprajili
Budyšin. Předsydstwo Zwjazka serbskich wuměłcow je so rozsudźiło lětsa žanu adwentničku njeswjećić. Tuchwilu je předwidźane, zo ZSW swoje tradicionalne zetkanje do nalěća přesunje, zdźěli předsyda Jan Bělk. Klětu w aprylu steja nowowólby předsydstwa ZSW na planje. Bychu-li hłownu zhromadźiznu ze słódnej hosćinu zwjazali, njeby to jenož „narunanje“ za wupadnjenu adwentničku było, ale zdobom rjany zazběh do noweje legislatury. Termin planować pak móža hakle něhdźe w februaru/měrcu započeć.
Trjebaja nuznje pomoc
Chrósćicy. Aktualneho połoženja w Chróšćanskim Domje swj. Ludmile dla tuchwilu wjele sobudźěłaćerjow wupadnje. Tohodla pytaja nuznje pomocnikow, kotřiž maja nazhonjenja při hladanju starych ludźi. Pomoc je hnydom trěbna. Tež fachowy personal na wuměnku je rady witany. Zajimcy njech přizjewja so pola nawodnicy domu Móniki Wencloweje pod telefonowym čisłom 035796/ 947 330 abo pola nawodnicy hladanskeje słužby Silvany Bjaršoweje pod telefonowym čisłom 035796/ 947 379.
SKC dale přistupny
Slepo. W Slepjanskim Serbskim kulturnym centrumje je předawanski wobłuk dale přistupny. „To smy z gmejnu wothłosowali“, zdźěli sobudźěłaćerka Stephanie Bierholdtec. Předawanišćo je wot póndźele do pjatka stajnje wot 10 do 16 hodź. wočinjene. Tam maja knihi, protyki, karty a wjele dalšeho w poskitku. Wustajenišćo je porno tomu zawrjene.
Drustwo „hłownu“ njewotměje
Přehladka dlěje widźeć
Budyšin. Wustajeńcu wo česćowanju swjateho Bosćana w Chróšćanskej wosadźe móža sej zajimcy dlěje hač dotal planowane, mjenujcy hač do njedźele, 6. decembra, w Budyskej tachantskej cyrkwi wobhladać. Přistupna je přehladka za čas wotewrjenja simultaneho Božeho domu wot póndźele do soboty wot 10 do 16 hodź., njedźelu wot 12 do 16 hodź.
Spominaja na wopory
Wojerecy. K lětušemu ludowemu žarowanskemu dnjej wotměje so njedźelu, 15. nowembra, w 10.30 hodź. we Wojerowskim wopomnišću na Bonhoefferowej zhromadne wopomnjenske zarjadowanje města Wojerec a staraćelstwa němskich wojerskich rowow. Tam spominaja na wopory wójnow a namocy. Koronapandemije dla maja přitomni předpisy hygieny dodźeržeć a škitny nahubnik wužiwać. Dalše wopominanje wotměje so samsny dźeń w 14 hodź. při wojerskich rowach w Narću.
Swj. Měrćina cyle hinak swjećić
Pančicy-Kukow. Hinak hač hišće minjeny pjatk w SN wozjewjene, w klóštrje Marijinej hwězdźe w Pančicach-Kukowje jutře na swj. Měrćina žanu hru wo swj. Měrćinje njepředstaja. Tež lampionowy ćah njebudźe. Město toho móža so tam a wšudźe druhdźe tež dźěći a jich starši na wosebitym online-nyšporje wobdźělić. Wón započnje so w 17 hodź. Přizjewić móža so zajimcy na internetnej stronje Katolskeho Posoła abo pod www.schadźowanka.de. W Budyšinje so jutře tradicionalny ekumeniski Měrćinowy swjedźeń Budyskich wosadow njewotměje. Tež wulki lampionowy ćah po starym měsće dyrbja wotprajić.
Při młynje podźěłali
Radźićeljo so schadźuja
Łaz. K swojemu přichodnemu wuradźowanju zetkaja so Łazowscy gmejnscy radźićeljo jutře, wutoru, we 18 hodź. na Łazowskim gmejnskim zarjedźe. Mjez druhim chcedźa so tam z koncepcionelnym zdźěłanjom analyzy za inwesticije w jednotliwych pěstowarnjach gmejny rozestajeć. Dale póńdźe wo wopłóčkowy koncept za kónčinu wokoło Hórnikečanskeho jězora.
Předawaja zwonka domu
Čorny Chołmc. Koronoweje pandemije dla wostanje Čornochołmčanski Krabatowy młyn hač do kónca nowembra zawrjeny. Zdobom pak na to skedźbnjeja, zo wot wutory hač do njedźele stajnje wot 11 do 16 hodź. najwšelakoriše jědźe a předewšěm swoje słódne plincy zwonka domu předawaja. Nadrobnišo wobhonić móža so zajimcy internetnje pod www.krabat-muehle.de.
Nowe postajenja płaća
Žane płuwanje za šule
Wojerecy. Runja mnohim dalšim zarjadnišćam dyrbješe spočatk tydźenja tež Wojerowska Łužiska kupjel zawrěć. Kaž jednaćel Matthias Brauer zdźěli, potrjechi to zjawne kupanje a sawnu kaž tež wšitke dalekubłanja, kursy a towarstwowe płuwanje. Byrnjež so intensiwnje wo to prócowali, njemóža tež žane šulske płuwanje a płuwanske kursy za pěstowarnje přewjesć. Po słowach Brauera je kupjel w tak mjenowanym standby-modusu. Ručež budu wotpowědne zakonske móžnosće wutworjene, chcedźa Łužisku kupjel krótkodobnje zaso wočinić.
Dźěći móža darik dobyć
Radźićeljo so zetkaja
Chrósćicy. Přichodne posedźenje Chróšćanskeje gmejnskeje rady wotměje so jutře, štwórtk, w 19 hodź. we wjacezaměrowym rumje „Jednoty“. Na dnjowym porjedźe steji nimo wjacorych priwatnych twarskich naležnosćow wobzamknjenje wo njeplanowanych wudawkach za wottorhanje bywšeje Chróšćanskeje pěstowarnje. Nimo toho informuje wjesnjanosta wo nakupje mobilnych kónčnych nastrojow za Chróšćansku zakładnu šulu.
Njebjelčicy. Tohorunja jutře, štwórtk, ale w 19.30 hodź. zetkaja so čłonjojo Njebjelčanskeje gmejnskeje rady w posedźenskej rumnosći gmejny. Mjez druhim porěča woni wo tym, kak chcedźa srědki za skrućenje wjesneje kónčiny 2020 wužiwać. Wopytowarjo maja płaćiwe postajenja hygieny wobkedźbować a škitny nahubnik wužiwać.
Wotnožku zaso wotewru
