Nutřka a wonka tež serbsce
Twarske dźěła na Wojerowskim wobydlerskim centrumje so nachileja. Wčera je so měšćanska rada z napisami na domje zaběrała a při tym tež stawizniski pozadk wobkedźbowała.
Wojerecy (AK/SN). Wobydlerski centrum Piwarska 1 změje na južnej fasadźe němski a na zapadnej fasadźe serbski napis. Tole je měšćanska rada wčera jednohłósnje wobzamknyła. Napisaj „Bürgerzentrum Braugasse 1“ a „Wobydlerski centrum Piwarska hasa 1“ orientujetej so na historiskim přikładźe a wotpowědujetej němskim kaž serbskim stawiznam domu, w kotrymž běchu 1912 Domowinu załožili. Tež nutřkowny wodźenski system ma dwurěčny być.
Na naměsće před domom ma přichodnje plastika „Rozwiwanje“ Wojerowskeho wuměłca Helge Niegela stać. Iniciatiwu za to měješe Wojerowska kulturna fabrika, kotraž budźe dom wobhospodarjeć. Plastika ma so do skupiny štomow hodźeć, kotrež tam hižo su. Po kritiskej diskusiji radźićeljo tež tomu přihłosowachu, ale z jednym napřećiwnym a jednym wzdatym hłosom.
Krótkopowěsće (01.07.15)
Nowe mjezwočo pola agentury
Budyšin. Jörg Waniek, nawoda personalneho managementa w koncernje Vattenfall Europe Generation AG w Choćebuzu, je wot dźensnišeho předsyda zarjadniskeho wuběrka Budyskeje dźěłoweje agentury. Zastupowacy předsyda je Bernhard Sonntag, regionalny jednaćel dźěłarniskeho zwjazka DGB wuchodneje Sakskeje, kiž bě dotal předsyda.
Nowe čisło Naša Domowina
Budyšin. XI. mjezynarodny folklorny festiwal, wólby serbskeje rady w Braniborskej, 17. hłowna zhromadźizna Domowiny a lětuši FUEN-kongres su někotre z temow noweho čisła informaciskeho łopjena „Naša Domowina“, kotrež Domowina dźensa na swojej internetnej stronje wozjewi. Abonenća Serbskich Nowin dóstanu Našu Domowinu pjatk, abonenća Noweho Casnika přichodny tydźeń.
Wobjězdka hotowa
Spěwaja w Slepjanskej serbšćinje
Poradźeny wjesny swjedźeń w Delanach
Konjecy (DG/SN). Swój zhromadny wjesny swjedźeń wotměchu minjeny kónc tydźenja wobydlerjo Konjec a Šunowa. Po tym zo běchu loni prěni raz w Konjecach swjećili, rozsudźichu so organizatorojo lětsa znowa za dwór towarstwoweho domu Delany.
Z volleyballowym turněrom wjesnych mustwow, kotryž Čórlichec swójba doby, su swjedźeń sobotu popołdnju zahajili. Hrajnišćo při wjesnym hrajkanišću běštej wjesnej towarstwje hakle njedawno ponowiłoj, tak zo bě turněr zdobom premjera noweho volleyballnišća. Wobnowjenje bě tohorunja tema žortneho filma młodźiny, kotryž wječor w bróžni předstajichu. W nim so wjesne kóčki za swój nowy „hajzl“ dźakowachu.
Wjeršk delanskeho wjesneho swjedźenja bě znowa wubědźowanje 13 dobrowólnych wohnjowych woborow. Hladajo na to, zo mustwa dźeń a wjace do swojich mašinow inwestuja a technika zwjetša tež wo wuspěchu a njewuspěchu rozsudźa, běchu w Konjecach wobzamkli, zo wšitcy wohnjowi wobornicy ze samsnej mašinu startuja. Tak mějachu wšitcy nimale samsne wuměnjenja. Dobyli su skónčnje Worklečenjo z 28,05 sekundami před Róžantom a Salowom.
Policija (30.06.15)
Rakecy. Dokelž z woknom wjacebydlenskeho domu na Rakečanskim Kastaniowym kruhu kur sapaše, je kedźbliwy wobydler wčera wječor wohnjowu woboru alarmował. W tym wokomiku nichtó njewědźeše, hač něchtó w bydlenju přebywa. Spěšnje bě 45 kameradow wohnjowych woborow z Rakec, Njeswačidła a Jeńšec na městnje a so přez zakurjene schodźišćo hač do bydlenja předrě. Woheń w kuchni móžachu spěšnje zhašeć, ludźi pak žanych w bydlenju njenańdźechu. Bórze na to móžachu wobydlerjo domu zaso do swojich bydlenjow. Policija přepytuje, čehodla bě woheń wudyrił.
Wo wosadźe a hwězdach zhonili
Na wulět z awtami do Ochranowa podali su so minjenu sobotu čłonojo Domowinskeje skupiny Komorow-Rakecy-Trupin. Fararka Erdmute Frank wodźeše nas po wustajeńcy Ochranowskeje wosady, po cyrkwi a po pohrjebnišću.
Jara nazornje rysuje wustajeńca stawizny Ochranowskeje wosady wot jeje spočatkow 1475 w Čechach a na Morawje. Nikolaus Ludwig Graf von Zinzendorf je we 18. lětstotku Ochranow tak zarjadował, kaž wón dźensa hišće wobsteji. Jeho wowka Henriette Catharina von Gersdorff bě přełožowanje biblije do serbšćiny spěchowała. Wustajeńca hódnoći tež skutkowanje misionarow, mjez nimi serbskich. Dźensa je Ochranow předewšěm znaty za swoje swětoznate hesła, přełožowane do 50 rěčow, tež do serbšćiny. Fararka Frank nam tohorunja zmóžni wopytać cyrkwinsku žurlu a rozjasni dźensniše žiwjenje wosady. Na historiskim pohrjebnišću z lěta 1730 z dohromady 6 200 rownymi kamjenjemi namakaš při hłownym puću tež row Zinzendorfa.
Dźeń a wjace swobodnych městnow
Połoženje na dźěłowych wikach wuchodneje Sakskeje je tak dobre kaž hižo lětdźesatki nic. Dźěłodawarjo pak maja dźeń a wjetši problem, dosć kwalifikowanych přistajenych namakać.
Budyšin (CK/SN). W prěnim połlěće 2015 je bjezdźěłnosć we wuchodnej Sakskej wobstajnje woteběrała. W agenturje za dźěło maja tuchwilu 3 107 dźěłowych městnow z winowatostnym socialnym zawěsćenjom w poskitku. Jeničce w juniju přizjewichu dźěłodawarjo 1 025 nowych městnow, 128 wjace hač loni w samsnym času. To je wuraz dobreho hospodarskeho wuwića, pokazuje pak tež přiběracu dowěru předewzaćow do posłužbow dźěłoweje agentury, rjekny dźens dopołdnja Ilona Winge-Paul, operatiwna jednaćelka Budyskeje agentury za dźěło. Ze 471 přińdźe najwjetši dźěl městnow z tak mjenowanych hospodarskich posłužbow, k čemuž słušeja dźěło na čas, wobstražowanske słužby a rjedźenske přemysło, ale tež dawkowe poradźowanje.
Za Pěskečanow hłosować
Młode swójby prócuja so zhromadnje wo nowe hrajkanišćo
Pěskecy (SN/MWj). Na njekonwencionelne wašnje spytaja młode swójby w Pěskecach wjesne hrajkanišćo při wohnjowobornej gratowni zachować a w najlěpšim padźe nowe natwarić. Z materialom gmejny su starši njedawno krosnowanski nastroj z wěžičkomaj ponowili, dodźeržane deski wuměnili a nowe připrawili. Nětko chcedźa drjewo wobarbić a nowy pěsk nasypać.
Wotstronjeja schorjene jěrowcy
Krótkopowěsće (30.06.15)
Zaso mjenje bjezdźěłnych
Nürnberg. Ličba bjezdźěłnych w Němskej je z 2,711 milionami tak mała kaž wot lěta 1991 nic. Zwjazkowa agentura za dźěło dźensa zdźěli, zo je ličba w meji wo 51 000 woteběrała. Kwota zniži so wo 0,1 procent na nětko 6,2. Tuchwilu ma agentura 572 000 njewobsadźenych dźěłowych městnow přizjewjene.
Chětro tunjo do Berlina a Wiena
Praha. Konkurenca mjez třomi awtobusowymi předewzaćemi na čaromaj Praha–Berlin a Praha–Wien je dotal njesłyšane potuńšenje płaćiznow jězdźenkow wuskutkowała. Tak jědźeš tuchwilu z čěskeje stolicy do Berlina za něhdźe 9 a do Wiena za 7 eurow. Storno pak njeje móžne. Najtuńše jězdźenki za ćah z Prahi do Berlina płaća něhdźe 30 eurow.
Dwójniki so zetkaja
Budyšin. Na wšě 55 porikow-dwójnikow wočakuja přichodny kónc tydźenja w Budyšinje. Na přeprošenje Němskeho kluba dwójnikow přijědu wobdźělnicy ze wšeje Němskeje. Na programje dwudnjowskeho zetkanja steja mjez druhim wopyty wopomnišća něhdyšeho stasijastwa, žonopoweho muzeja a Biskopičanskich Karla Mayjowych hrow.
Wažny měznik za Budissu
