Krótkopowěsće (21.07.22)
Jenny Erpenbeck wuznamjenili
Neubrandenburg/Berlin. Za roman „Kairos“ su spisowaćelce Jenny Erpenbeck Literarne myto Uwe Johnsona přiznali. Z 20 000 eurami dotěrowane myto chcedźa 55lětnej 23. septembra w Berlinje přepodać, zdźěli Mecklenburgska literarna towaršnosć. Roman „Kairos“ wobjednawa na zakładźe lubosćinskeje stawizny towaršnostnu změnu wot poslednjeje fazy NDR 1986.
Nowela zakonja
Drježdźany. Sakska přihotuje tuchwilu nowy wysokošulski zakoń. Po prěnim čitanju je jón sakske knježerstwo do zjawneje diskusije dało. Z nowym zakonjom chcedźa prawo wysokich šulow centralnje wuwiwać. Prěni króć jewi so w nim prawo wutworić zastupnistwo zajimow za doktorandki a doktorandow. Hač do nazymy móža zastupjerjo zajimcow swoje stejišća k noweli wotedać. Na jich zakładźe kabinet dalše słyšenje přihotuje.
Dźělne wolóženje za Čěsku
Policija (20.07.22)
Diesel pokradnyli
Spale. W času, hdyž je ćěriwo najwšelakorišeho razu wosebje drohe, ćim bóle boli, hdyž je něchtó kradnje. To dyrbješe tele dny firma w Spalach pola Kulowa nazhonić. Kaž tam předwčerawšim rano zwěsćichu, běchu so njeznaći minjeny kónc tydźenja do dweju bagrow na terenje firmy na Kulowskej dróze zadobyli. Z mašinow wotklumpachu dohromady 700 litrow diesela. Škoda wučinja po informacijach Zhorjelskeje policajskeje direkcije něhdźe 1 400 eurow. Nimo toho načinichu skućićeljo na bagromaj něhdźe sto eurow wěcneje škody. Kriminalna słužba Wojerowskeho policajskeho rewěra je slědy zawěsćiła a pad nětko dale přepytuje.
Staršiski přinošk klětu stupa
Gmejna reaguje na zwyšenje tarifow a přiběrace wěcne kóšty
Hamor (AK/SN). Měsačne staršiske přinoški za žłobik, pěstowarnju a hort budu w Hamorskej gmejnje wot 2023 dróše. W žłobiku (dźewjeć hodźin hladanskeho časa) rozrosće měsačny přinošk wot 214 na 220 eurow. W pěstowarni płaća starši za samsny čas město 113 přichodnje 116 eurow. Měsačny hortowy přinošk podróši so wot 62 na 64 eurow. Tole wobzamkny na swojim zašłym posedźenju wjetšina gmejnskeje rady po intensiwnej diskusiji. Wosom radźićelow hłosowaše za to, třo přećiwo tomu a třo so hłosa wzdachu. W jednotliwym potrjechi to tři komunalne pěstowarnje „Bummi“ w Hamorje, „Sprjewine palčiki“ w Delnim Wujězdźe a „Kubołćiki“ w Rychwałdźe.
Na dobro gmejny so zasadźowali
Prěni raz po dołhim twarskim času je gmejnska rada Pančicy-Kukow swoje měsačne wuradźowanje wčera zaso w awli Šule Ćišinskeho přewjedła. Cyłkowne saněrowanje kubłanišća pak hišće cyle hotowe njeje. Někotre zbywace dźěła su hišće trěbne.
Pančicy-Kukow (SN/MWj). Zo so wjesnjanosta na posedźenju gmejnskeje rady někomu zjawnje a z prezentom dźakuje, so přečasto njestawa. Na wčerawšim wuradźowanju Pančičansko-Kukowskeho parlamenta měješe wjesnjanosta Markus Kreuz (CDU) tajku składnosć hnydom dwójce. Jónu počesći wón Katrin Młynkowu a Jana Ješku ze swójbnym lisćikom do zabawjenskeho parka Belantis pola Lipska. Wobaj běštaj hłownaj iniciatoraj, zo je so gmejna Pančicy-Kukow wuspěšnje na wubědźowanju Simul+ wobdźěliła a za nowe wjesne srjedźišćo na terenje něhdyšeho hosćenca w Pančicach myto 100 000 eurow dobyła. Mjeztym je komuna tež spěchowanske srědki z programa za witalne wjesne srjedźišća dóstała, tak zo móža za tónle projekt lětsa 444 000 eurow nałožić. Na terenje něhdyšeho hosćenca maja mjez druhim hrajkanišćo, pawiljon a nabiwanska stacija za elektrokolesa nastać.
Zběraja pjenjezy za nowe zwony
Přichodny krok za nowu wyšu šulu
Za přetwar a rozšěrjenje dwučaroweje wyšeje šule w Barće, gmejna Malešecy, je Budyski wokrjesny sejmik předwčerawšim naćiskowe planowanje wobzamknył.
Budyšin (SN/at). Z tym dowolnosć předleži, zo bychu planowanja dale wjedli, podłožki za twarsku próstwu zapodali a twarske dźěła wukonjeli. Z tym zwjazane je zwyšenje swójskich srědkow wokrjesa wo 243 800 eurow na nimale 7,345 milionow eurow. Po finalnym wobličenju kóštow z lětušeje 18. meje docpěje inwesticija cyłkownu sumu 17,304 miliony eurow. Krajny rada Michael Harig (CDU) skedźbni na to, zo je spěchowanje swobodneho stata něhdźe 9,959 milionow eurow z přizwolenskej informaciju z 13. decembra 2021 zaručene.
Krótkopowěsće (20.07.22)
Program za brunicowe regiony
Drježdźany. Sakski kabinet je nowy program EU za strukturnu změnu w brunicowych regionach z mjenom Just Transition Fund wobzamknył. Z tym steji tam přichodnje 645 milionow eurow k dispoziciji, zdźěli wčera sakske hospodarske ministerstwo. Lěpšinu z programa w Sakskej maja wokrjesy Budyšin, Zhorjelc, Lipsk a Sewjerna Sakska.
Projekty wobkrućene
Podstupim. Hladajo na strukturnu změnu we Łužicy je w Braniborskej dotal 112 projektow spěchowanja kmanych. 55 z nich su naprawy Zwjazka, tamnych 57 je ze stron Braniborskeje, zdźěli nětko statna kenclija w Podstupimje a wotmołwi z tym naprašowanje frakcije Lěwicy Krajneho sejma Braniborskeje. Za dalšich 15 projektow su financy zaručene.
Wopomnišćo za Geralda Stonea
Dróha zawrjena
Budyšink. Wotrězk wokrjesneje dróhi K7219 mjez Budyšinkom a Poršicami w Malešanskej gmejnje je hač do 26. awgusta twarskich dźěłow dla dospołnje zawrjeny. W tym času w Budyšinku žane busy při busowym zastanišću njezastawaja. Nachwilnje zarjaduja busowe zastanišćo při awtodróhowym mosće při wotbóčce puća wot Poršic do Skanec.
Zaso wjace wopytowarjow
Budyšin. Ličba přenocowanjow wopytowarjow Budyšina bliži so zaso niwowej do korony. Kaž měšćanske zarjadnistwo zdźěli, zličichu w aprylu 5 591 hosći, štož wučinja něšto wjace hač 13 000 přenocowanjow. Přerěznje wostachu ludźo 2,3 dny w měsće. W aprylu 2019 mějachu 6 433 wopytowarjow z 15 414 přenocowanjemi.
W prózdninach do muzeja
Policija (19.07.22)
Paducha twarožka lepili
Njeswačidło. Njeprošeny wopyt mějachu předwčerawšim rano na wuměłstwowych wikach w Njeswačidle. Najprjedy njeznaty muž bě tam z chłódźaka 200 twarožkow spakosćił. Nimo toho wza wón wjacore drjewjane skulptury kaž tež dalše wuměłske wudźěłki w cyłkownej hódnoće 3 000 eurow sobu. Dźakowano dobremu wopisanju swědkow móžeše policija 33lětneho jako paducha wuslědźić. Při přepytowanju jeho bydlenja wulki dźěl rubizny namakachu a ju wobsedźerjam wróćichu.
Znowa swoju wěru swjećili
Na GiG-festiwalu w Róžeńće něhdźe 600 wopytowarjow witali
Róžant (gž/SN). Šesty raz je so minjeny kónc tydźenja festiwal „God is good“ (Bóh je dobry) w Róžeńće wotměł. Najebać runočasne zarjadowanja we wokolinje, wjeselachu so organizatorojo towarstwa „Misija wuchodny wětr“ nad něhdźe 600 wopytowarjemi. Z Róžantom měješe lětuša tura GiG-festiwala swoju pjatu staciju. Před tydźenjom su ju w bayerskim Marienfriedźe zahajili a po Nürnbergu, durinskim Beinrode a Berlinje dale wjedli. Prěni raz podachu so z turu po Róžeńće tež do wukraja, a to do pólskeje Legnicy.
