Budyšin (UM/SN). Při tak mjenowanym Green Parku na Budyskej Flincowej blisko Serbskeho gymnazija zahaja bórze wobšěrne twarske dźěła. Kaž Andreas Spitzke z Lipšćanskeje serwisoweje towaršnosće Amalie wobkrući, ma tam 60 bydlenjow z wobstajnym hladanjom ­a dnjowe hladanišćo nastać. W tymle měsacu chcedźa fasadu ponowić kaž tež tepjenje, přewětrjenje a sanitarne připrawy zatwarić započeć. „Zaměr je, zo wobydlerjo wot apryla 2023 zaćahnu“, praji Andreas Spitzke. Byrnjež připrawu na zakładźe wobstejacych twarjenjow natwarja, ma bydlenski kompleks kaž „nowy natwarjeny“ wupadać. Twar dodźerži předpisy za dom z mało energiju. „Za zemsku ćopłotu smy dohromady 3 000 metrow dźěrow do zemje točili. Na dwěmaj domomaj natwarimy solarnu připrawu, tak zo budźemy wot miliny a ćopłoty njewotwisni, Spitzke připowědźa.

Serwisowa towaršnosć Amalie wjedźe hižo wjacore domy z wobstajnym hladanjom wokoło Lipska, mjez druhim w Lipsku, Eilenburgu, Halle a Leuna. Nětko chcedźa so sylnišo na kónčiny zwonka wulkich městow koncentrować.

Wochožanski park błudźenkow ma nowy poskitk za swójby

Wochozy (CK/SN). Při tuchwilnych horcych temperaturach stara so we Wochožanskim parku błudźenkow nowa atrakcija wo wochłódźenje. Tam maja nětko nowe wodowe hrajkanišćo.

Na dołhosći jědnaće metrow a šěrokosći sydom metrow so woda na dwěmaj pućomaj žórli. „Jedna rěčka je runa kaž młynska hrjebja, tamna bóle přirodna a trochu dlěša“, wopisuje Matthias Ebeling nowu atrakciju. Planowar bě při­prawu po předstawach spěchowanskeho towarstwa parka koncipował. 10. junija su twarić započeli, dobrych sydom tydźenjow pozdźišo bě wšo hotowe. Wodowe hrajkanišćo přizamknychu krjepjenskemu kołoběhej parka błudźenkow. Tak móža nowosć wobstajnje z čerstwej wodu zastarać, kotraž pak pitna woda njeje.

Zo móhła woda scyła ćec, dyrbja ju dźěći najprjedy raz z klumpu do małeho bazenka klumpać. Hdyž potom něchtó haćidło sćehnje, sej woda swój puć pyta. Tak kaž móžeš wodu na wěstym městnje spławić, maja tež dalše elementy z wo­doweho hospodarstwa, praji Matthias Ebeling. Tež małe młynske koła hodźa so zapowěsnyć.

Sernjany. Z natočenjom piwa a z wubědźowanjom wohnjowych woborow započnje so dźensa wjesny swjedźeń w Sernjanach. Wot 21.30 hodź. budźe kino při Klóšterskej wodźe. Jutře wot 14 hodź. přizamknje so soccerowy turněr. Wot 21 hodź. budu reje pod hołym njebjom z kapału „Die Wehder“. Njedźelu zahudźa Chróšćanscy muzikanća k rańšemu piwku. W 14.30 hodź. slěduje swójbne popołdnjo ze sokolnistwom Winde a ze zabawu za wulkich a małych.

Filmy we wowčerni

Stróža. Druhi raz přewjedu na dworje zarjadnistwa biosferoweho rezerwata Hornjołužiska hola a haty w Stróži filmowe wječory we wowčerni. Dźensa wot 20 hodź. widźa wopytowarjo film „Contra“. Dale pokazaja „Die Wiese – Ein Paradies nebenan“ (12.8., 20 hodź.), „Willi und die Wunderkröte“ (19.8., 18 hodź.) a „Das Pubertier“ (26.8., 20 hodź.)

Wobšudnistwu zadźěwała

Budyšin. Starši porik by so předwčerawšim w Budyšinje nimale z woporom wobšudnikow stał. Kedźbliwa sobudźěłaćerka banki je hóršemu zadźěwała. Rentnarjej chcyštaj w swojej bance kredit we wobjimje 45 000 eurow za zběrku knihow měć. To bě sobudźěłaćerce podhladne a wona skedźbni 89lětneju na móžne wobšudnistwo. Na to informowaše wona policiju. Zastojnicy dojědźechu sej k by­dlenju rentnarjow, hdźež pozdatnej předawarjej knihow w swojim Mercedesu čakaštaj. Policisća mužej w starobje 22 a 23 lět nachwilnje zajachu. Po zwěsćenju jich personalijow, porstowych wotćišćow a dalšich informacijow jeju zaso pušćichu a pad dale přepytuja.