Za dalše dialogi
Mnohe dalše informacije trěbne
Wulkoprojekt za strukturnu změnu „Němski centrum za astrofyziku“ steješe w srjedźišću wobydlerskeho zarjadowanja pod titlom „Wot uniwersuma do Łužicy“ předwčerawšim w Budyskej „Krónje“. Tudyša hwězdarnja bě přeprosyła so raz z astronomiju zaběrać.
Budyšin (SN/at). Astrofyzika je mnohim ludźom přewšo cuza naležnosć. Ze swojim angažowanym přednoškom je prof. dr. Michèle Heurs z Leibnizoweje uniwersity Hannover přitomnych sobu wzała do sferow čornych dźěrow a grawitaciskich žołmow. Astrofyzika, tak wona wuwjedźe, je na slědźenje, technologiju a digitalizaciju so zepěraca hightech-wědomosć, kotraž postup pohonjuje. W Hornjej Łužicy blisko Konjec a w Zhorjelcu wotpohladany Němski centrum za astrofyziku „ma z našim wšědnym žiwjenjom činić“, prof. Heurs wuwědomi a dodawa, zo je seismiskich wuměnjenjow dla serbska Łužica prawa městnosć za podzemski slědźenski laboratorij, na kotryž by na zemskim powjerchu jenož twarjenje skedźbniło, tak wulke kaž wyša šula.
Krótkopowěsće (15.07.22)
Michaela Hariga rozžohnowali
Budyšin. W Budyskim krajnoradnym zarjedźe su wjelelětneho krajneho radu Michaela Hariga (CDU) dźensa oficialnje ze zastojnstwa rozžohnowali. Při tutej składnosći přepoda jemu Wolfgang Zender, jednaćel Wuchodoněmskeho zwjazka nalutorwarnje, Medalju dr. Johanna Christiana Eberle. Z tym připóznaja zasłužby Hariga wo wuwiće Budyskeje lutowarnje a lutowarnistwa w regionje.
Ličba mortwych porodow přiběra
Wiesbaden. Nimale kóžde 230. dźěćo w Němskej so mortwje narodźi. Po niskim stawje 2007 kwota tendencielnje zaso přiběra, kaž dźensa Statistiski zwjazkowy zarjad we Wiesbadenje zdźěla. Loni narodźi so w zwjazkowej republice 3 420 dźěći mortwych, štož wotpowěduje 4,3 mortwych porodow na 1 000 narodźenych. Jedna z přičin je stupaca staroba maćerjow.
Wopomnišćo město kormjernje
„Trjebamy rozumnu zhromadnosć Němcow a Serbow“
Serbske Nowiny w rozmołwje z rozžohnowacym so Budyskim krajnym radu Michaelom Harigom
Budyski krajny rada Michael Harig (CDU) je tele zastojnstwo 21 lět wukonjał. 2001 bě wón Horsta Gallerta naslědował, wot 2008 steješe na čole zarjadnistwa nowowutworjeneho wulkowokrjesa Budyšin. Mjeztym su wolerjo wo jeho naslědniku rozsudźili. Na wuwiće w minjenymaj lětdźesatkomaj zhladował je Axel Arlt w rozmołwje z rozžohnowacym so krajnym radu.
Knježe Harigo, kak posudźujeće wuwiće Budyskeho wokrjesa za dobu Wašeje zamołwitosće?
M. Harig: Hospodarska strona je přewšo pozitiwna. Tehdy, 2001, mjenowachu Němsku choreho muža Europy, štož je so pola nas wosebje wuskutkowało. Mějachmy tehdy wjace hač 78 000 bjezdźěłnych w Budyskim wobwodźe dźěłoweje agentury. Dźensa je jich přibližnje 105 000 po cyłej Sakskej. Hłowny problem njejsu wjace dźěłowe městna, ale dźěłowe mocy.
Na projektnym dnju serbske institucije zeznali
Budyšin. Šulske lěto so nachila a posledni tydźeń do prózdnin je mnohim šulam dobra móžnosć čas wučby raz trochu hinak wužić. W tym tež Budyski Serbski gymnazij njeje hinaši a tuž wuhotowachu tam za swój 6. lětnik wutoru projektny dźeń.
Dwěle ludźi wobkedźbować
Njedosahace informacije a falowaca komunikacija wohrožuja rozsud
Njeswačidło (JK/SN). Samo na sebi chcyše Njeswačanska gmejnska rada na swojim posedźenju předwčerawšim wobzamknyć stejišćo k rozšěrjenju biosferoweho rezerwata Hornjołužiskeje hole a hatow na dźěle swojeho teritorija. Zo dyrbjachu tutu naležnosć z dnjoweho porjada šmórnyć a na jedne z přichodnych posedźenjow přestorčić, zaležeše na wopyće sylneje delegacije wjesnjanow z Holešowskeje Dubrawki. Woni běchu na posedźenje přišli, zo bychu swoje wobmyslenja a swoju njepřezjednosć z planowanym gmejnskim rozsudom zwuraznili.
Policija (14.07.22)
Dźěćo snadnje zranjene
Pančicy-Kukow. Při wobchadnym njezbožu na Dróze Ćišinskeho w Pančicach-Kukowje bu předwčerawšim šěsćlětne dźěćo snadnje zranjene. Něhdźe w 19.30 hodź. bě do směra na Kamjenc jěducy 37lětny wodźer Mercedesa přewidźał, zo na prawej kromje dróhi BMW parkowaše, a do njeho zajědźe. Při tym bu w Daimleru sobu jěduce dźěćo zranjene. Dokelž z jězdźidłow wolij na puć wuběža, wołachu Pančičanskich wohnjowych wobornikow. Ći w swojej gratowni runje zwučowachu, a běchu tuž hižo za něšto wokomikow na městnje njezboža.
Drěwčan z wosebitej dowolnosću
Nimo dalšich insektow su předewšěm tež pčołki za přirodu nimoměry wažne. Často sej małe stworjenčka prawje wažić njewěmy. Tohodla so w lětnjej seriji na lokalnej stronje lětsa pilnym pčołkam a pčołarjam wěnujemy. (4)
„Bjez pčołkow a pčołarstwa by moje žiwjenje njewupjelnjene było“, hódnoći 46lětny Drěwčan Heiner Wjeńk swoje njesprócniwe dźěło a přichilnosć stajnje pilnym překasancam. Jako je so wón 1976 do Wjeńkec swójby narodźił, drje njeje nichtó na to myslił, zo budźe z njeho jónu připóznaty pčołar. Po wuspěšnym zakónčenju 10. lětnika we Łazu nawukny powołanje awtoweho mechanikarja w Lubušu, hačrunjež je so za šulski čas stajnje za přirodne zjawy a scyła za wšu přirodu jara zajimował. Připadnje dósta jako šuler 8. lětnika knižku wo pčołkach do rukow. Ta zbudźi w nim zajim so bliže wo nich informować. Nětko wědźeše, zo su pčołki rozsudne za nimale wšě ekosystemy na našej zemi, dokelž zaruča wopłodźenje wulkeho dźěla rostlinow a zo mamy tak žiwidła w dosahacej měrje. Jara jeho k rozmyslowanju pohnuwaše, „zo njeby bjez pčołkow naša cyła fawna a flora wjace fungowała“.
Dotalny měšćanosta je tež nowy
Po sydom lětach skónči so 31. awgusta hamtska doba Budyskeho financneho měšćanosty dr. Roberta Böhmera. Tohodla měješe měšćanska rada na wčerawšim posedźenju wo znowa wobsadźenju funkcije rozsudźić.
Budyšin (CS/SN). Financny měšćanosta města Budyšina dr. Robert Böhmer je na dalše sydom lět do tohole zastojnstwa wuzwoleny. Na wčerawšim posedźenju měšćanskeje rady je jemu 22 wot 26 přitomnych radźićelow swój hłós dało. Dokelž so jeho hamtska doba kónc awgusta skónči, běchu městno w měrcu zjawnje wupisali. Na to je so jědnaće zajimcow přizjewiło. Kónc junija a spočatk julija su z požadarjemi rozmołwy wjedli. We wobłuku wuběranskeho procesa staj dwaj zajimcaj wotprajiłoj. Na kóncu zwostaštaj jenož hišće dwaj. Na wčerawšim posedźenju radźićelow pak so jenož jedyn z njeju předstaji a za sebje wabješe, mjenujcy tuchwilny mějićel zastojnstwa.
Krótkopowěsće (14.07.22)
Zawostajenstwo online
Budyšin. Serbski institut informuje, zo je wotnětka z digitalizowanym zawostajenstwom Kita Šwjele a Bogumiła Šwjele wažny wobstatk serbskeho kulturneho namrěwstwa online přistupny, na přikład na portalu SI SORABICON. Prezentacija dokumentow z wobrazami, metadatami a přidatnymi informacijemi je wuslědk digitalizaciskeho projekta Serbskeho kulturneho archiwa, spěchowaneho wot Němskeho slědźerskeho zwjazka.
Serbske wustawki změnjene
Radwor. Na swojim wčerawšim posedźenju su čłonojo Radworskeje gmejnskeje rady wustawki wo spěchowanju serbskeje rěče a kultury změnili. Jednaše so wo wotrězk, kotryž postaja tamnišu Domowinsku skupinu za partnera gmejny w serbskich naležnosćach. Wotnětka smědźa so tež druzy za čestnohamtske dźěło społnomócnjeneho za serbske naležnosće pola gmejny přizjewić. Wšitke druhe wotrězki wostanu njezměnjene.
Bohačík změni do Němskeje
