Domizniske zajimawostki słyšeli
K najwšelakorišim turistiskim poskitkam we Wojerecach słušachu wokoło jutrow wodźenja po měsće. Jedne z nich bě cyle wosebiteho razu, dokelž so jeno zrědka přewjeduje.
Wojerecy (KD/SN). Serbsko-němske stawizny a stawiznički stejachu w srjedźišću měšćanskeho wodźenja minjenu sobotu we Wojerecach. Wodźerka po měsće Cornelia Schnippa bě sej za to dźěłansku drastu ewangelskich Serbow Wojerowskeho regiona woblekła. Po puću wot hrodu nimo torhošća a Wjacsławkec drastoweho domu a dale po Dołhej hasce hač k staremu póstej wobdźělnicy něštožkuli zajimaweho zhonichu.
Na torhošću Claudia Schnippa na přikład powědaše, zo mějachu tam hižo lěta 1731 studnju, kotraž tehdyše Wojerecy z čistej wodu zastarowaše. Dźensa steji na tymle městnje serbska studnja, a ju bě čestny wobydler města Jürgen von Woyski stworił. Něhdy steješe studnja na dworje Budyskeho hrodu. 1998 přenjesechu ju do Wojerec. Dale powědaše Cornelia Schnippa wo pjerjodrěću, kotrež bě jako dźěćo pola wowki dožiwiła.
Přeprošeja na wotkrywanski dźeń
Budyšin (SN). „Za pjaty wotkrywanski dźeń 1. apryla we wobchadnym zwjazku Hornje Łobjo (VVO) smy sej zhromadnje z předewzaćemi wjele noweho wumyslili“, praji Gabriele Clauss, wjednica marketinga zwjazka VVO. Tón dźeń móža so swójby, pućowacy a dalši ze swójbnej dnjowej kartu za jedne tarifowe pasmo we wobchadnym zwjazku ze železnicu a busom na puć podać. Tiket płaći jenož dźewjeć eurow a płaći za dweju dorosćeneju a hač do štyri dźěći w starobje do štyrnaće lět. „Přidatnje móža swójby wuskokolijowu železnicu, Drježdźansku hórsku železnicu abo Mišnjansku měšćansku kołojězbu za potuńšenu płaćiznu wužiwać, pokazaja-li tiket wobchadneho wotkrywanskeho dnja“, Gabriele Claus wuswětla. Za hač do štyri dźěći je jězba z wosebitej železnicu darmotna. Teritorij VVO wupřestrěwa so wot Altenberga hač do Wojerec a wot Schöny hač do Riesy.
W kopatej połnej Róžeńčanskej cyrkwi swjećeše Chróšćanski ...
Krótkopowěsće (30.03.16)
Kozel šwika Bombardier
Drježdźany. Zapósłanc Lěwicy w Sakskim krajnym sejmje Hajko Kozel plany koncerna Bombardier, w Budyšinje a Zhorjelcu wjele dźěłowych městnow šmórnyć, raznje šwika. W medijowej zdźělence skedźbnja Kozel na to, zo „je koncern minjene lěta pjeć milionow eurow spěchowanskich srědkow dóstał a nětko ludźi pušća. To je nahrabne a šamałe.“
W Praze bjez čěšćiny
Praha. W „jendźelskorěčnej wjesce Angloville“ w štwórći Hlubočepy čěskeje stolicy su zajimcy za wučbu jendźelšćiny intensiwnemu imersnemu kubłanju w tutej rěči wustajeni; čěšćina je tule zakazana. W běhu šěsć dnjow absolwuja kursisća 70 hodźin aktiwneje rěčneje komunikacije. Wulku wažnosć kładu zamołwići při tym na metodu „1 wobdźělnik na 1 maćernorěčneho“.
Wočakowanja rozdźělne
Dom za ćěkan- cow njebudźe
Budyšin (SN/at). Kompleks Husarenhof na Naměsće Käthy Kollwitz w Budyšinje njebudźe dom za ćěkancow. Wo tym je Budyski krajnoradny zarjad minjeny štwórtk po kóncu redakciskeho dźěła za jutrowne wudaće Serbskich Nowin informował.
Po wupalenju kózłow w nocy na 21. februar njehodźi so wjetši dźěl twarjenja hižo wužiwać. Tohodla je Budyski wokrjes minjeny štwórtk podružne zrěčenje z mějićelom kompleksa Husarenhof cofnył a wobhospodarjenske zrěčenje wupowědźił.
Na posedźenju Budyskeho wokrjesneho sejmika minjenu póndźelu bě 1. přirjadnik krajneho rady Udo Wićaz (CDU) hišće wo tym rěčał, zo chcył wokrjes w mało wobškodźenym domje C 80 ćěkancow zaměstnić. Na wupalenymaj domomaj A a B pak njebě krajnoradny zarjad hižo zajimowany. Po rozmołwje z mějićelom, kiž bě na to wusměrjeny předźěłany podružny poskitk do jutrow předpołožił, ma wokrjesne zarjadnistwo dźělne wužiwanje za njehospodarske.
Krótkopowěsće (29.03.16)
Serbskaj literataj počesćenaj
Budyšin. Serbskeju literatow Bena Budarja a Dorotheju Šołćinu počesći Mjezynarodna akademija literatury a wuměłstwa Ukrainy z Medalju Nikolaja Gogola „Triumf“ za wuběrne literarne skutkowanje. Kaž prezident akademije Sergej Dźjuba Zwjazkej serbskich wuměłcow tele dny zdźěli, bu wuznamjenjenje jednohłósnje schwalene.
Internet ewangelskich Serbow
Choćebuz. Wotnětka maja Serbja ewangelskeje cyrkwje Berlinsko-braniborsko-šleskeje Hornjeje Łužicy swójski portal w interneće, kaž Choćebuski ewangelski cyrkwinski kruh pisa. Pod www.serby-ekbo.de namakaš tam informacije wo dźěle skupiny Serbska namša, Spěchowanskeho towarstwa za serbsku rěč w cyrkwi a planowaneho Zwjazka serbskich křesćanow w EKBO.
Strategiske partnerstwo
Policija (29.03.16)
Při zražce zwróćiła
Bošecy. Njekedźbliwosće dla je jutrowničku wječor w Bošecach w Kubšiskej gmejnje k wobchadnemu njezbožu dóšło. 79lětna wodźerka VWja njeje tam předjězbu Daihatsuwa wobkedźbowała a zrazy do njeho. Při tym so Daihatsu zwróći a wosta na boku ležo. Dokelž njebě zwoprědka wotwidźomne, hač bě jeho 56lětna wodźerka zranjena a hač móže so z awta wuchować, alarmowachu najprjedy wohnjowu woboru. Přijěć pak kameradojo na zbožo njetrjebachu, dokelž žona skónčnje tola sama z awta wulěze.
Durje běrowa wobškodźili
Běła Woda. Po wšěm zdaću ze silwesterskimi praskotakami běchu njeznaći zawčerawšim durje Běłowodźanskeho běrowa Lěwicy wobškodźili. Kelko škody je při tym nastało, njeje znate. Za skućićelemi drje w bliskosći pytachu, namakali pak jich bohužel njejsu.
Zajim za dwurěčnu nutrnosć dale wulki
Hory (SN/JaW). Wulka syła ewangelskich wěriwych Wojerowskeje Janskeje wosady, mnozy dalši křesćenjo a wěriwi kaž tež hosćo su minjeny štwórtk mjeztym 17. zelenoštwórtkownu nutrnosć w Horjanskej Patokec kładźitej bróžni dožiwili. Hosćićelka, wuměłča Birgit Patokowa, kaž tež superintendent na wuměnku Friedhart Vogel so jara wjeseleštaj, zo je tež po telko lětach zajim na tymle serbsko-němskim zarjadowanju dale wulki.
Birgit Patokowa předčita postrowny list fararja Joachima Nagela, kiž bě tule zelenoštwórtkownu nutrnosć iniciěrował. Superintendent Vogel wěnowaše so w swojim prědowanju – a to bě jenički ryzy němski dźěl nutrnosće – stawiznje, kak je japoštoł Pětr Jězusa trójce zaprěł. „Njeměli swoje přeswědčenje po wětřiku, kotryž runje duje, wusměrjeć“, Vogel wuzběhny a pokaza na aktualne podawki, kaž na přesćěhanje křesćanow a tuchwilnu krizu ćěkancow dla. Wšitke kěrluše a čitanja spěwachu a słyšachu přitomni serbsce kaž němsce. Serbskorěčne čitanja přewza Měrćin Hermann. Překwapjace bě, kelko ludźi je serbske teksty kěrlušow sobu spěwało.
Wětr do chorhoje přimał
Njebjelčicy (SN/MiR). 116 křižerjow, štyri mjenje hač loni, je so jutrońčku dopołdnja na puć do Wotrowa nastajiło a so strowych zaso domoj nawróćiło. W lětušim Njebjelčanskim procesionje wuhladachu wěriwi wobeju wosadow a mnozy hosćo třoch nowačkow, Tristana Mjechelu ze Serbskich Pazlic kaž tež Jonasa Lehmanna a Floriana Hähnela z Njebjelčic. Blidarski mišter Tobias Cyž, kiž je prěni króć Božu matru njesł, a Bosćij Kokla z Njebjelčic jěchaštaj ze slěbornym wěnčkom.
