Zo bychu nadal pjenjezy Europskeje unije za projekty na wsach łužiskeje jězoriny dochadźeli, dyrbja towarstwo załožić. Na te wašnje móhli žiwjensku kwalitu we wjesnej kónčinje přisporjeć.

Slepo/Dźěwin/Trjebin (CK/SN). Tři gmejny Slepjanskeho regiona přistupja towarstwu za wjesne wuwiće. Te ma so hišće oficialnje załožić. To su gmejnscy radźićeljo w Slepom, Dźěwinje a Trjebinje na swojich zašłych posedźenjach jednohłósnje wobzamknyli. Towarstwo załožić je trjeba, dokelž su po předpisu sakskeho ministerstwa za regionalne wuwiće za připóznaće jako Leaderowa kónčina w spěchowanskej dobje 2023 do 2027 jenož hišće samostatne juristiske wosoby dowolene. Dotal su to lokalne akciske skupiny (LAG). Tohodla chce LAG Łužiska jězorina towarstwo załožić. Přistupić ma jemu dotalnych jědnaće komunow. Sobu činić chcedźa nimo toho Mužakow a dalše tři komuny, kotrež přisłušachu dotal skupinje „Wuchodna Hornja Łužica“.

Měrne městno k pozastaću a wodychnjenju w adwenće nastało

Pančicy-Kukow (SN/MWj). Napadnje wjele ludźi je so prěnju adwentnu njedźelu w popołdnišich a nawječornych hodźinach po wsy wuchodźowało a tak prěni raz zajimawu nowosć widźało. Hdźež su před lětomaj stary hosćenc zwottorhali, njesteji nětko jenož wysoki wobswětleny hodowny štom, ale je takrjec tež hródźička, w kotrejž nětko krok po kroku boži narodk nastawa.

Zawěrno njejsym wjac w starobje, zo bych na dźěćace kemše chodźił. Ale přichodne tydźenje w Pančicach-Kukowje najskerje tola raz na tajke póńdu. Chcu mjenujcy sobu dožiwić, kak dźěći nowe figury do božeho narodka stajeja, jón tak krok po kroku wuhotuja a móhłrjec ze žiwjenjom pjelnja. Hižo nětko skići mała prózdnjeńca rjany wobraz, hdyž tam nimo jědźeš. Ideju, tam narodk natwarić, kotruž starši ze swójbneho kružka hižo loni mějachu a nětko zwoprawdźeja, móžeš jenož wulkotnu mjenować. Na te wašnje wobradźeja woni swojim a runje tak druhim dźěćom rjane dožiwjenje, kak boži narodk poněčim rosće. Wobydlerjo pak maja kóždy tydźeń znowa přičinu, sej raz ke kamjentnej hródźičce pod Glawšec kapałku dóńć a so předewšěm we wječornych hodźinach wot spodobneho napohlada wobswětleneho narodka wobkuzłać dać. Je to rjany dopokaz, što zamóža někotři angažowani jednotliwcy na dobro cyłeje wsy docpěć. Marian Wjeńka

Štóž nochce so tež při zymskich temperaturach lodowych słódnosćow wzdać, dóstanje tajke w Budyskej lodarni „Eisdealer“ napřećo Němsko-Serbskemu ludowemu dźiwadłu. Jako wosebitostku w adwentnym času poskićeja tam nimo swójsce produkowanych lodow tež hodowne kreacije, kaž na přikład „jednorohačowy punš“ abo „kanděrowane jabłuko z mandlemi“. Štóž chce radšo słódny tykančk na ruku – tež tajki maja w poskitku. Mały Friedrich (nalěwo) wjeseli so nad swojej karamelizowanej wutrobu, kotruž znaje wot Wjacławskich wikow. Tež adwentne njedźele je woknješko lodarnje wotewrjene. Foto: Carmen Schumann