Koncert wupadnje
Budyšin. Tradicionalny adwentny koncert 1. serbskeje kulturneje brigady tež lětsa njebudźe. Kaž předsydstwo brigady zdźěli, dyrbja bohužel na date wobstejnosće reagować a koncert wotprajić. Kaž w nowinskej zdźělence předsydstwa brigady dale rěka, so nadźijeja, zo so klětu poradźi tradiciju znowa dale wjesć. Hižo nětko přeje předsydstwo wšitkim swěrnym připosłucharjam a připosłucharkam woblubowaneho spěwneho ćělesa žohnowane hody a strowe nowe lěto.
Wotewru testowanski centrum
Łaz (AK/SN). Wot 50. kalendroweho tydźenja, potajkim póndźelu, 13. decembra, ma we Łazu testowanski centrum na koronu dźěłać započeć. To zdźěli wjesnjanosta Thomas Leberecht (CDU) tele dny na posedźenju tamnišeje gmejnskeje rady. Testowanske srjedźišćo zaměstnja w Domje Zejlerja a Smolerja. Po słowach Thomasa Leberechta maja za nje priwatneho wobhospodarjerja, kiž ma za to dowolnosć strowotniskeho zarjada Budyskeho krajnoradneho zarjada. Wo koho so dokładnje jedna, wjesnjanosta njezdźěli. Dokładne wotewrjenske časy chcedźa hišće zdźělić.
Dróhu jutře zaso wotewru
Přiwćicy (UM/SN). Wokrjesnu dróhu z Budyšinka do Přiwćic kaž tež hłownu dróhu přez Budyšink jutře za wobchad zaso wotewru. Po informacijach Malešanskeje gmejny potom tež busy po čaromaj 107 a 127 zaso normalnje pojědu.
Hižo wot meje 2020 su dróhu we wjacorych wotrězkach wutwarjeli. To bě trjeba, dokelž bě wona w twarsce špatnym stawje. Nimo toho bě přewuska. Runje za čas wusywa a žnjow často jara šěroke ratarske mašiny dróhu wužiwachu. Jim so wuwinyć bě ćežko, dokelž kromje prawje wuhotowanej njeběštej. Tež jězdnja sama bě chětro wobškodźena.
W zwisku z twarskimi dźěłami su w Budyšinku połdra metra šěroki chódnik twarili. Tež zaměrowy zwjazk za wopłóčki Mała Sprjewja je tam twarił a wopłóčkowe kanale kładł. Cyłkownje je Budyski wokrjes něhdźe tři miliony eurow za naprawy nałožił.
Runje tak wobzamknyć móhli
Mnozy radźićeljo pobrachowali – wyši měšćanosta rozhněwany
Běła Woda (CK/SN). Jako Běłowodźanski wyši měšćanosta Torsten Pötzsch (Klartext) zašłe posedźenje měšćanskeje rady zahaji, bě nimo njeho jenož wosom radźićelow přitomnych. Dokelž to ani połojca poprawnych 22 radźićelow njebě, wobsteješe strach, zo njebychu ničo wobzamknyć móhli. Jedyn z nich pak hišće w předrumnosći na wuslědk koronatesta čakaše. Dalši bě připowědźił, zo pozdźišo přińdźe. Tak běchu skónčnje tola hišće wobzamknjenjakmani. W jeho frakciji staj dwaj na koronawirus schorjełoj, praji Andreas Friebel (Klartext). „Zo pak nětko hižo druhi raz nimale połojca radźićelow pobrachuje, je njemóžne. Bojkot nikomu njepomha“, so wón rozhori.
Kobołk w mnohich wariantach
Rakecy (WL/SN). Hinak hač pola wampirow, kotrež kobołk scyła rady nimaja, je tale zelenina za čłowjeka wosebje strowa a jemu tyje. Tohodla njezadźiwa wobchodna ideja Andréja Gana a jeho mandźelskeje Antje z Rakec, załožić kobołkowy wobchod. Prěnju ideju měještaj wonaj hižo w lěće 2017. André Gano tykaše na přestrjeni 200 kwadratnych metrow prěni kobołk. Při swojim planowanju pak njewobkedźbowaše ekstremnu suchotu přichodneho lěta a z njej zwjazanu njenahladnu wulkosć cyblow. Tohodla so mandźelskaj rozsudźištaj, njepředawać cyblki kobołka, ale hotowe kobołkowe wudźěłki.
Swójbni, přećeljo a znaći jimaj při prěnimaj produktomaj pomhachu. Běštej to kobołkowy granulat a kobołkowa sól. Runočasnje nastachu ideje za dalše wudźěłki: wosebje wótra kobołkowa sól a wšelke měšeńcy za grilowane kołbaski, rybu, dźiwinu a dalše, a to wězo wšitko z kobołkom. Kupcy koncept rady přiwzachu, a tak je André Gano plahowansku płoninu na 3 000 kwadratnych metrow powjetšił. Přichodnje chce so na poł hektara zwažić.
Kaž wot wjedrarjow připowědźene, je so dźens dopołdnja w běhu ...
Šćěpjenski centrum wotewrjeny
Dróhotwarske projekty wuchowane
Spěchowanski hornc swobodneho stata za komunalny dróhotwar je nimale prózdny. Budyski wokrjes ma so tuž ze zwyšenymi swójskimi wudawkami za planowane naprawy bědźić.
Budyšin (SN/at). Ma so wokrjes z nastatym połoženjom wotnamakać a spokojić, zo hodźi so pjeć projektow komunalneho dróhotwara z bytostnje nišej sadźbu spěchowanja tola hišće zwoprawdźić? Abo dyrbi je cofnyć, dokelž wokrjesny budget za přidatne wudawki trěbne rezerwy nima? Wo tym měješe Budyski wokrjesny sejmik minjenu póndźelu rozsudźić.
Pozadk trěbneho wobzamknjenja je, zo je sakske hospodarske ministerstwo sadźbu spěchowanja za komunalny dróhotwar wot 90 na 50 procentow znižiło. Hornc je prosće prózdny. Wokrjesne zarjadnistwo pak chcyše wone pjeć projektow wuchować. Wšako chcyše ministerstwo ze swojim rozsudom zmóžnić, zo bychu so wšitke jemu dotal w běhu lěta zapodate twarske naprawy zeskutkownić hodźeli. Mjez nimi su wutwar wokrjesneje dróhi Ptačecy–Lejno (Tätzschwitz-Geierswalde) w druhim twarskim wotrězku z kolesowanskej šćežku kaž tež mostaj w Sowrjecach (Soritz) a w Brězni (Wiesa).
Krótkopowěsće (09.12.21)
Zaso wjac natyknjenjow
Budyšin. Po 960 natyknjenjach z koronawirusom a dalšim smjertnym padom, wo kotrychž je Budyski krajnoradny zarjad wčera informował, je incidencna hódnota po Roberta Kochowym instituće w Budyskim wokrjesu dźensa z 1 225,5 zaso wyša. Za wokrjes Zhorjelc mjenuje RKI indicencu 822,6. Tam su wčera 697 dalšich infekcijow zwěsćili.
Załožba wuměłske twórby kupiła
Budyšin. Załožba za serbski lud je wjacore twórby štyrjoch wuměłcow kupiła, kotrež běchu eksponaty wosebiteje wustajeńcy „Wobrazy krajiny – Přechod 03“. Mólba Michaela Kruscheho „Sinfonija Łužicy“ pyši přichodnje běrow direktora załožby Jana Budarja, instalaciju Frauke Rahr „Wopyt w domiznje“, rjad fotow „Agon“ Jošta Franka a wuběr Helle Stoleckojc dóstanje Choćebuski Serbski muzej jako trajne požčonki.
Spěchowanje kiwa
Policija (08.12.21)
W hladarni woheń wudyrił
Budyšin. Rozpjeršenosć knježeše dźensa w nocy w Albertowym wustawje na Budyskej Schäfferowej. Krótko do połnocy je so z woknom na prěnim poschodźe kur walał. W bydlenju bě z njejasnych přičin woheń wudyrił, tak zo wołachu wohnjowu woboru, policiju a wuchowanske mocy. Objekt je bydlenska připrawa seniorow z 41 bydlenjemi. Tuž so wuchowarjo hižo na wulku ewakuaciju nastajichu. Spěšneho zasadźenja dla pak móžachu wobornicy zadźěwać, zo so płomjenja z bydlenja 80lětneje na dalše wobłuki twarjenja rozpřestrěchu. Jeno tři susodne bydlenja z třomi wobydlerjemi dyrbjachu ewakuować. Potrjechenu wobydlerku dowjezechu do chorownje, tamnych třoch su na městnje zastarali. Po aktualnych informacijach so w bydlenju najprjedy raz bydlić njehodźi. Přičinu wohenja přepytuje nětko fachowc wohnjoweje wobory.
Konop namakali
Financowanje hišće njejasne
Wokoło bywšeje Swinjarčanskeje starownje póčnje so hibać
Swinjarnja (SN/MWj). Předwidźane nowowužiwanje bywšeje Swinjarčanskeje starownje najskerje cyle pomału konkretniše formy nabywa. Minjene tydźenje je tam Klukšanska recyclingowa firma stare garaže spotorhała a twarske wotpadki wotwjezła. W tym zwisku pak hižo wo spočatku někajkich twarskich dźěłow rěčeć ma abatisa klóštra Marijineje hwězdy Gabriela Hesse za přezahe. „Garaže dyrbjachu tak a tak preč, dokelž njebychmy je na žanežkuli wašnje wužiwać móhli. Wone běchu prosće dodźeržane“, abatisa na naprašowanje zdźěli.
