Stawizny, serbske korjenje a křesćansku wěru zwjazać
Miłoraz (AK/SN). Wobydlerjo Miłoraza, kotryž je wot wudobywanja brunicy hórko potrjecheny, spominaja na to zwjazowace. „Wažne su zhromadne stawizny, serbske korjenje a křesćanska wěra“, rjekny farar Jörg Michel, kiž je hač do julija 2022 zastupjer za wakancu w ewangelskej wosadźe Slepo, njedźelu na nyšporje k přepodaću swětła měra z Betlehema w Miłorazu. Při spěwach, mjez kotrymiž bě slepjanski „To jo ta rjana gałuzka“ a modlitwje zetkachu so wěriwi w towarstwowym domje. Konfirmand Till Kowalik bě swětło ze Slepoho přinjesł. Dalši dowjezechu je do Trjebina, Rownoho, Mułkec, Brězowki, Dźěwina, Lěska a samo do Cerska.
Policija (20.12.21)
Woheń w hali hašeli
Lětoń. 63 kameradow Budyskeje powołanskeje a dalšich wohnjowych woborow je sobotu popołdnju přećiwo płomjenjam wojowało, kotrež w priwatnej hali w Lětonju zachadźachu. Tam steješe wotzjewjeny Chevrolet, kotryž chcyše wobsedźer restawrować. Techniski defekt w awće bě woheń zawinował. Na zbožo njebě w tym času nichtó w hali. Wobydlerjo běchu kur wuhladali a woboru informowali. Cyłkowna škoda wučinja něhdźe 12 000 eurow.
Wutworja testowanski centrum
Pančicy-Kukow. Wot dźensnišeho móža so wobydlerjo w Pančicach-Kukowje na koronawirus testować dać. Kaž gmejnske zarjadnistwo zdźěli, wutworja testowy centrum w tak mjenowanym lěkarskim domje nad praksu dźěćaceje lěkarki. Wotewrjeny budźe wón póndźelu wot 14 do 17 hodź. a srjedu wot 7 do 11 hodź. Hač do hód poskićeja na wjacorych městnach přidatne móžnosće šćěpjenja. W Kamjenskej wotnožce ludoweje uniwersity móžeš so jutře wot 11 do 17 hodź. šćěpić dać. We Wojerowskej zarjadowanskej rumnosći „Vis-à-Vis“ budźe šćěpjenski centrum zajutřišim a štwórtk wot 11 do 17 hodź. wočinjeny. W Budyskej sportowni na Třělnišću poskićeja šćěpjenje hač do štwórtka wšědnje wot 9 do 17 hodź. Termin dojednać móžeće sej internetnje pod https://sachsen.impfterminvergabe.de. Patoržicu, hodowne swjate dny kaž tež wot 31. decembra hač do 2. januara žane šćěpjenja móžne njebudu.
Předawaja namakane kolesa
Po jutrach chcedźa twarić
W Chrósćicach hotuja so na wjacore projekty
Chrósćicy (SN/MWj). Do přetwara rumnosćow Chróšćanskeje zakładneje šule a tamnišeho horta chce gmejna klětu něhdźe 35 000 eurow inwestować. Nimo spěchowanja nałoži něhdźe 10 000 eurow swójskich srědkow. Na swojim zašłym posedźenju su gmejnscy radźićeljo wjesnjanostu Marka Klimana (CDU) społnomócnili, wotpowědne twarske nadawki firmam přepodać. Tak ma za šulskeho nawodu přidatna rumnosć nastać, štož běchu sej hižo dawno přeli, dokelž su tuchwilne rumnostne wuměnjenja chětro wobmjezowane. Dale ma w horće nowy nuznik nastać. Nětko móže architekt Marko Dźisławk wšitko planować, zo móhli předewzaće w zymskich prózdninach zwoprawdźić.
Wozjewjenje přećiwo wobornikam
We wjelelětnym rozestajenju mjez Trjebinskej gmejnu a tamnišim sportowym towarstwom Trjebinskeho towarstwoweho domu dla so nětko dalši wjeršk připowědźa. Hač hodźi so wón hišće wotwobarać?
Trjebin (CK/SN). Wohnjoškitneje kontrole w Trjebinskim towarstwowym domje dla ma so přećiwo čłonam tamnišeje wohnjoweje wobory chłostanske přizjewjenje mylenja domjaceho měra dla zapodać. Wjesnjanosta Waldemar Locke (CDU) bu spočatk nowembra informowany, zo běchu w objekće pječa wohnjoškitne durje manipulowane. Dokelž jedna so wo zjawne twarjenje, za kotrež je gmejna zamołwita, dyrbješe wón jednać. Kaž Locke na zašłym posedźenju gmejnskeje rady informowaše, je wón wobornikam nadawk dał tam za prawym hladać. Kaž so při kontroli 8. nowembra wukopa, běchu mjez druhim wohnjoškitne durje z klinami wuzběhnjene a jedyn zamk zalěpjeny. „Takle njesmě so ze strowotu ludźi wobchadźeć“, praji wjesnjanosta a skedźbni na zakonske předpisy. Mjeztym wón wobžaruje, zo njeje naležnosć hnydom wozjewił.
Při wupyšenju domu abo bydlenja ma kóždy swójske zasady. Jedyn so ...
Krótkopowěsće (20.12.21)
Dale tójšto smjertnych padow
Budyšin. Na spočatku dohodowneho tydźenja je incidenca po Roberta Kochowym instituće dźensa w Budyskim wokrjesu 838,9 a w Zhorjelskim 661,7. Minjeny pjatk registrowaše wokrjes Budyšin wo 399 natyknjenjow z koronawirusom a dźewjeć smjertnych padow. Samsny dźeń mjenowaše wokrjes Zhorjelc 288 infekcijow a 18, hižo w prěnjej połojcy decembra zemrětych pacientow.
Serbske Nowiny sobu najlěpše
Budyšin/Berlin. Serbske Nowiny su jedne z třoch nowin po cyłej Němskej, kotrež su w akciji Zwjazka žurnalistow Němskeje (DJV) „Fotografojo maja mjeno“ najlěpje wotrěznyli. W redakciji serbskeho wječornika runje tak kaž pola Main-Post a Straubinger Tageblatt wosebje swědomiće z podaćom mjenow fotowych žurnalistkow/žurnalistow wobchadźeja, kaž DJV minjeny pjatk zdźěli.
Zalutuja ludźom dołhe puće
Policija (17.12.21)
„Namrěwstwo“ ze sćěhami
Ralbicy-Róžant. Z woporom internetnych wobšudnikow je so minjene dny młodostny z gmejny Ralbicy-Róžant stał. Kaž Zhorjelska policajska direkcija rozprawja, je njeznata a pječa 68 lět stara žona jeho přez Facebook narěčała a wudawała, zo je na smjerć chora. Tuž chcyše wona swoje zamóženje we wobjimje 550 000 eurow někomu darić. Zo móhł tele pjenjezy dóstać, přepokaza 19lětny w času wot 24. nowembra do 10. decembra wjacore razy něšto tysac eurow na wjacore konta. Z pjenjezami mějachu so pječa wšelake wudawki za přepokazanje wulkeje sumy zapłaćić. Přilubjene namrěwstwo pak młodostny w Delanach ženje dóstał njeje. Decernat za wobšudnistwa kriminalneje policije pad nětko dokładnje přepytuje.
Gmejna podpěruje Miłočanow
Njebjelčanscy radźićeljo koło lětušich posedźenjow zakónčili
Njebjelčicy (JK/SN). K swojemu poslednjemu lětušemu posedźenju je so Njebjelčanska gmejnska rada wčera znowa pod krutymi postajenjemi hygieny schadźowała. Zo njetrjebali předołho wuradźować, su woni wjacore planowane dypki dnjoweho porjada na prěnje klětuše posedźenje přestorčili. Tak budu spočatk lěta wo wustawkach wjesnych radow kaž tež wo jednanskim porjedźe gmejnskeje rady rěčeć.
Dalše inwesticije wobzamkli
Radwor (SN/MkWj). Tež klětu chce Radworska gmejna dale inwestować. Wotpowědny hospodarski plan 2022 su gmejnscy radźićeljo na swojim posedźenju předwčerawšim, srjedu, jednohłósnje wobzamknyli. Do toho rysowaše komornica Melanie Mihan tuchwilne połoženje gmejny, kotrež je so po ćežkim lěće 2020 poněčim zaso polěpšiło, wosebje přemysłowy dawk nastupajo.
Nimale 1,3 miliony eurow su za inwesticiske wudawki zaplanowali, nimale 800 000 eurow z toho dóstanje gmejna jako spěchowanske srědki a připokazanki kraja. Wudać chcedźa pjenjezy mjez druhim za Chelnjanski towarstwowy dom, za nowe jězdźidło za twarski zawod, za twarske naprawy w šuli a za jeje wuhotowanje z digitalnej techniku. W tym wobłuku su srjedu hnydom prěnje kročele zahajili a Halštrowskej firmje nadawk dali, 25 notebookow za šulu wobstarać. Kaž komornica rjekny, je zadołženje gmejny na wobydlerja na 524 eurow woteběrało, w lěće 2014 bě to hišće 668 eurow.
