Trjebin (SN). Přirada wuwićoweho koncepta za gmejny Trjebin, Slepo a Dźěwin pod wuměnjenjom dołhodobneho brunicoweho hórnistwa je so tele dny na swoje 37. posedźenje w Trjebinje zešła. Ćežišćo wuradźowanja bě přesydlenje Miłoraza a tamne infrastrukturne předewzaća. Zaměr je, we wšěch wjesnych dźělach samsne žiwjenske wuměnjenja njewotwisnje wot mjeztym redukowanych přesydlenjow wutworić, kaž regionalny planowanski zwjazk Hornja Łužica-Delnja Šleska zdźěla.

Přirada diskutowaše wo tuchwilnym stawje noweho stejnišća za Miłoraz. Nimo indiwiduelnych móžnosćow móža potrjecheni mjez alternatiwami w Trjebinje abo Slepom wolić. Při tym je wažne, zo so Miłoraženjo po móžnosći zhromadnje přesydla. Runje tak rěčachu wo přichodnym wuwiću sydlišća.

Reakcija po wólbach: Łužica njeje w Berlinje hižo skutkownje zastupjena

Budyšin (SN/BŠe). „Wólbny wuslědk Lěwicy njespokoja“, praji kandidatka strony za wólby zwjazkoweho sejma Caren Lay, kotraž budźe znowa w opoziciji zwjazkoweho sejma skutkować. „Po wšej Sakskej, wosebje na wuchodźe swobodneho stata smy wjele hłosow zhubili. Zo je direktny kandidat AfD Karsten Hilse w Budyskim wólbnym wokrjesu wjetšinu hłosow wolerjow dóstał a jeho prawicarskopopulistiska strona hladajo na druhi hłós prědku leži, je dramatiske. Přesadźiła je so strona, kotraž nima žane rozrisanja za realne socialne problemy.“ Caren Lay je sej wěsta, zo so AfD zaso wotkuzła.

Předsydka AfD Frauke Petry je so wčera rano, něhdźe dwanaće hodźin po wozjewjenju wólbnych wuslědkow za přichodny Němski zwjazkowy sejm wo dalše rženje w Berlinje postarała. Na nowinarskej konferency wona zdźěli, zo nochce frakciji swojeje strony w zwjazkowym sejmje hižo přisłušeć. Chce nowy konserwatiwny spočatk.­ Jeje krok je konsekwenca dale a napjećišeje rozkory z načolnymaj kandidatomaj strony Alice Weidel a Alexanderom Gaulandom. Woli Petry nowy puć – a to runje dźeń po wólbach? Jeje rozsud wšak pokazuje na njedorozumjenja, wulke rozestajenja a njepřezjednosć w stronje. Pačena AfD je so tuž nětko hižo wo prěni eklat postarała. Mjeztym zo tamne strony jednotu demonstruja, ma AfD hižo wulki problem. Hač drje so dalši woleni kandidaća wot frakcije wotwobroća a so Petry přizamknu? Politiske rženje w Ber­linje drje budźe nas hišće chwilku zaběrać. Bianka Šeferowa

Oranžowe awto z morcheju zaměnił bě wóslik w hessenskim městačku Schlitz. Gießenska ciwilna komora ma nětko rozsudźić, hač dyrbi mějićel skoćeća 5 000 eurow škody na blisko pastwy parkowacym awće zapłaćić. Dwójce bě wóslik do njeho kusnył. Policija trochowaše škodu samo na 30 000 eurow. Naddimensionalnu „morchej“ zwuporjedźeć pak potom tola tak drohe njebě.

Plěsniwa pomazka je wulkozasadźenje policije w badensko-württembergskim Mutlangenje wuskutkowała. Muž bě tyzku z pomazku na swojej zahrodźe našoł. Jako ju wočini, rozpřestrěwaše so mróčel kura. Bórze na to koža muža spodźiwnje reagowaše, a wón alarmowaše policiju a wuchowansku słužbu. 54 muži z dychanskim škitom přijědźe tuž na pomoc. Fachowcy pak jenož plěsniwu pomazku jako winika wuslědźichu.