Jutře zahaji so kongres FUEN we Wrócławju ze serbskej delegaciju

Wrócław/Budyšin (SN/MkWj). Z dosć sylnej delegaciju chce so Domowina na lětušim­ kongresu Federalistiskeje unije europskich narodnych mjeńšin (FUEN) wobdźělić, kotryž wotměje so wot jutřišeho hač do njedźele we Wrócławju. Město je lětsa kulturna stolica Europy. Domowina je wot lěta 1990 z čłonom FUEN, kotraž naležnosće europskich narodnych mjeńšin na politiskej runinje zastupuje. Hižo dwójce bě Domowina hosćićelka kongresa FUEN, jónu w Bu­dyšinje a jónu w Choćebuzu. Delegaciji Domowiny přisłušeja jeje předsyda Dawid Statnik, jednaćel Bjarnat Cyž, nawodnica mjeńšinoweho sekretariata Judith Wałdźic a předsydka młodźinskeho towarstwa Pawk Franciska Grajcarekec. Z Delnjeje Łužicy pojědu do Wrócławja Silvia Oehlertojc a zastupowacy jednaćel Domowiny Marcus Kóńcaŕ, kaž z nowinskeje zdźělenki Domowiny wuchadźa.

Ze železnej žerdźu w ruce je muž w durinskim měsće Gotha swoju ekspřećelku prosył, so na njeho wudać. Spočatnje bě 36lětny pola staršeju žony­ wokno w chěžinych durjach rozbił. Na to direktnje pola njeje randalěrowaše a do duri kopaše. Na to ju wo mandźelstwo prošeše, štož žona wotpokaza, kaž policija „ze zadźiwanjom“ w swojej rozprawje zwěsći. Přećiwo­ mužej přepytuja nětko wobškodźenja dla.

Z konjaceho wubědźowanišća runjewon do města smalił je sportowy kóń w Bremenje. Do toho bě jěcharja wot­ćisnył a galopěrowaše do směra na nutřkowne město. Pjeć policajskich awtow konja přewodźeše. Tola tež spěšnje natwarjena zawěra njezamó jeho zadźeržeć. Skónčnje so policistce­ poradźi, brunača dosahnyć a změrować. Jěchar a kóń wostaštaj na zbožo­ njezranjenaj.

Wjace hač dwaceći zajimcam je historikar delnjołužiskeje wotnožki Serbskeho instituta dr. Pětš Šurman wčera wječor w Budyskej Smolerjec kniharni swoju nowu knihu „Sorbische Interessen und staatliche Minderheitenpolitik in der DDR – Quellenedition (1947–1961)“ předstajił.

Budyšin (SN/CoR). Serbske stawizny w NDR su ćežka maćizna. 1 200 gramow přinjese nowe rozestajenje ze zažnej fazu zašłeho socialistiskeho stata a z jeho wuznamom za Serbow na wahu. Přičina je jednora: Nimale 200 wuzwolenych aktow a dokumentow wo wuwiću a nadawkach statneje mjeńšinoweje politiki nastupajo Serbow je Choćebuski wědomostnik zezběrał, do tołsteho zwjazka zestajał a tak zjawnosći spřistupnił. Swój hłowny wotpohlad formulowaše dr. Šurman wčera tak: „Chcu čitarjej zmóžnić, zo sam wo maćiznje rozmysluje a ju na swoje wašnje interpretuje. Mamy na dokumenty bjez někajkich ideologiskich šablonow hladać.“ Jemu je wo to šło, telko žórłow kaž móžno zapřijeć. Zo je so přiwšěm wobmjezował na lěta do 1970, zaleži sprěnja na tym, „zo njeje čas po tym hižo tak napjaty“; a zdruha je ćežko wotpowědne akty namakać.