Delanske starožitnosće widźeli
Nowe směrnicy a dotalna praksa
Spěchowanske směrnicy Załožby za serbski lud buchu loni w aprylu přiměrjene. Zo su z wida Maśicy Serbskeje móžnosće podpěry nastupajo serbske kulturne pomniki w jednym dypku nětko nimale wuzamknjene, běše tema na njedawnej hłownej zhromadźiznje.
Wo wuwiće wohnjowych woborow so njesebičnje starał
Poslednju njedźelu jutrownika docpě Róžeńčanow njewočakowana a chětro zrudna powěsć, zo je bywši nawoda dobrowólneje wohnjoweje wobory, něhdyši wjesnjan a wjelelětny křižer Frank Pjech na prawdu Božu wotešoł.
Po dopołdnišej Božej mši bě sej Frank z motorskim hišće kusk wujěł a chcyše wot připołdnja na beneficnym koncerće we Łazku pomhać. We wsy nad Klóšterskej wodu njeboćički mjenujcy hižo dlěje bydleše, dokelž buštaj wobaj Pjechec swójbnej domaj w Róžeńće – tón Pjechec staršeju a Frankowy – předatej. Tola do Łazka so Frank hižo njenawróći. Mjez Póckowami a Biskopicami prasny ze swojim motorskim z dotal njeznateje přičiny do bóčneje planki a hišće na městnje njezboža wudycha.
Łušćanski: „Što je potom naša župa?“
Namjet Křesćana Korjeńka na hłownej wólbnej zhromadźiznje Kamjenskeje župy „Michał Hórnik“ 9. měrca, hač njeměli regionalny zwjazk na „Serbski kraj“ přemjenować, zbudźi w serbskej zjawnosći diskusiju. Tež na wuradźowanju zwjazkoweho předsydstwa bě to tema.
Budyšin (SN/JaW). Pisomnu rozprawu wo skutkowanju Budyskeje župy „Jan Arnošt Smoler“ předstajištaj minjeny pjatk čłonam zwjazkoweho předsydstwa w Budyšinje regionalna rěčnica za Budyski region Katja Liznarjec a čłon župneho předsydstwa Jurij Łušćanski. Při tej składnosći witaše předsyda Domowiny Katju Liznarjec z maćerneho dowola wróćo do zarjada. Ju bě zašłej lěće Sonja Hrjehorjowa derje zastupowała.
Zajimawa přehladka wo Maśicy Serbskej
Choćebuz (SN/at). Maśica Serbska wobohaća 25. róčnicu swojeho nowozałoženja z přehladku „Maśica Serbska mjez tradiciju a modernu“. Zajimowany wopytowar zhoni wo załoženju delnjoserbskeho wotrjada Maćicy Serbskeje w lěće 1880 runje tak kaž wo jeje skutkowanju w štwórćlětstotku 1993–2018. Třinaće taflow je tematisce rozrjadowane. Mjez druhim su wšitcy předsydźa Maśicy naličeni a wuznam towarstwa za kubłanje wjesneje ludnosće derje předstajeny. Teksty su hłownje w němskej rěči, dokelž chcedźa z njej tež mnohich němskich zajimcow docpěć, kaž předsyda Maśicy Serbskeje dr. Pětš Šurman rjekny.
Štož wupada kaž rozestajenje
Do wozjewjenja wólbneje namołwy iniciatiwa kritikarja wotwołała
Njebjelčicy/Choćebuz (SN/at). Demokratisce wolene serbske ludowe zastupnistwo ma z listowymi wólbami w nowembrje nastać. Hižo jutře chcedźa na Krabatowym swjedźenju w Čornym Chołmcu wólbnu namołwu wozjewić. Hač do 13. awgusta je móžno wólbne namjety podać, hač do 27. oktobra so jako woler abo wolerka registrować, to zhonichu Serbske Nowiny z kruha iniciatiwy.
Tele postupowanje kritizuja delnjoserbscy čłonojo rady starostow. Po njedawnym zetkanju w Choćebuzu potwjerdźichu Renej Kochan, Hartmut Leipner, dr. Fryco Libo, Maxmilian Hasacki, Till Vogt a Měto Cerna wonu poziciju, kotruž je rěčnik rady dr. Hartmut Leipner hižo w měrcu zjawnje wuprajił. Woni paruja wothłosowanje ze Zwjazkom kaž tež z krajomaj Sakskej a Braniborskej runje tak kaž přihotowacu zjawnu diskusiju. Delnjołužiscy starosća boja so, zo „so wokomiknje jeničce z čłonow iniciatiwy wobstejace zastupnistwo wuzwoli“.
Wěsty přizynk
Změnu mjena tematizować
Předsydstwo Kamjenskeje župy „Michał Hórnik“ je so wčera wječor w Chróšćanskej gmejnskej sydarni skonstituowało. Jemu přisłuša po rozsudźe zašłeje hłowneje zhromadźizny jědnaće čłonow.
Chrósćicy (SN/JaW). Minjenu hłownu a wólbnu zhromadźiznu hódnoćachu wšitcy přitomni za dobru. „Bě to najlěpša zhromadźizna minjenych lět“, zwurazni županka Zala Cyžowa. Nimo toho chwaleše sej wona, zo je dale wjac młodźiny zwólniwe, na dobro serbstwa skutkować. „Mam to za dobry trend. Wšako před 15 do 20 lětami njebě za tym wupadało, tuž sym ćim zbožowniša“, wona rjekny.
Na programje wčerawšeje prěnjeje zhromadźizny předsydstwa po wólbach 9. měrca steješe tohorunja, wuzwolić sej z rjadow gremija městožupana abo městožupanku. Jednohłósnje rozsudźichu so přitomni čłonojo – jedyn bě chorosće dla zamołwjeny – za Katharinu Jurkowu, kotraž twori nětko zhromadnje ze Zalu Cyžowej čoło župy.
Połojca čłonstwa Maśicy Serbskeje nětko žony
Choćebuz (SN/at). Z čestnym zarjadowanjom su čłonojo Maśicy Serbskeje wčera w Choćebuskim Serbskim domje na 25. jubilej znowazałoženja delnjoserbskeho wotdźěla wědomostneho towarstwa Maćicy Serbskeje zhladowali. Z tym zwjazane bě hłowna wólbna zhromadźizna, na kotrejž su wo tym rozsudźili, štó cyłk do noweho štwórćlětstotka powjedźe.
Z wulkim wjeselom přiwzachu přitomni, mjez nimi předsyda Maćicy Serbskeje Jurij Łušćanski, zo spožči Maśica připóznawanske myto Bogumiła Šwjele Marice Šöcojc z Choćebuza-Strobic za pojednanje wo wuwiću krajneho šulstwa w Pruskej. Te bě loni jako abiturientka Delnjoserbskeho gymnazija spisała. Nětko wona studuje a njemóžeše myto wčera bohužel wosobinsce přiwzać. Kaž ze stron předsydstwa podšmórnychu, chcedźa wosobinske zwiski runje tak do Ewangelskeho gymnazija w Choćebuzu rozšěrić, wšako wuknu tež tam šulerjo z dwurěčnych wsow Delnjeje Łužicy.
