Župa „Jan Arnošt Smoler“ organizuje w běhu lěta wjacore swójbne popoł­dnja, zo by předewšěm w nakromnych kónčinach Budyskeho wokrjesa składnosć skićiła, tam serbować.

Rakecy (kl/SN). Serbske swójbne popoł­dnjo wotmě so minjenu sobotu w Rakečanskej Pawołskej šuli. Na popołdnjo přeprosyli běštej župa Budyska „Jan Arnošt Smoler“ a Pawołska šula. Hosći witałoj staj šulski nawoda Markus Henninger a čłon župneho předsydstwa Günter Holder. Wón dźakowaše so wšitkim, kotřiž k serbskemu žiwjenju w Rakecach přinošuja, a zwurazni nadźiju, zo by serbske słowo tež w přichodźe tu dale słyšeć było. Jako zazběh do programa zaspěwachu wšitcy na žurli zhromadnje „Wjesele dźensa“.

Wojerowska župa „Handrij Zejler“ ma za­so župana. Po mnohich lětach bjez tajkeho su delegaća minjeny pjatk Marcela Braumana z Łuha za noweho nawodu župy wuzwolili.

Wojerecy (SN/MkWj). Wolóženje bě runjewon widźomne: Domowinska župa „Handrij Zejler“ ma po mnohich lěta bjez nawody zaso župana. Delegaća pjat­kow­neje hłowneje zhromadźizny župy wu­zwolichu Marcela Braumana do zastojnstwa. 55lětny je z Wojerowskej župu, kotrejž­­ přisłuša sydom skupin a třinaće towarstwow, wusko zwjazany, wšako sedźi­ z mandatom župy w Zwjazkowym předsydstwje Domowiny a wobdźěla so jako tajki prawidłownje na jeje zarjadowanjach. Powołansce skutkuje wón jako nowin­ski rěčnik frakcije Lěwicy w Sakskim krajnym sejmje.

Choćebuz (HA/SN). Předsyda Rady za naležnosće Serbow w Braniborskej Torsten Mak je na njedawnym posedźenju Zwjazkoweho předsydstwa Domowiny w Choćebuzu wo dźěle gremija rozprawjał. Dokelž móžeše ludnosć w Braniborskej lěta 2014 po nowym zakonju jara demokratisce wuzwolić čłonow serbskeje rady, mamy nětko mjez wobydlerstwom, našimi partnerami a wosebje w krajnym sejmje a w knježerstwje wjetšu naslědnosć a připóznaće. „Tam nětko cyle hinak na nas hladaja, dokelž mamy wjetšu legitima­ciju“, rjekny předsyda, „a tak čujemy so hižo jako tajki serbski parlament.“ Wón je Sakskej radźił, tohorunja wo tajkim wólbnym modusu za serbsku radu rozmyslować.

Za sobu najwažniši nadawk w tuchwilnej wólbnej periodźe 2014–2019 mjenowaše Torsten Mak nowe postajenje serbskeho sydlenskeho ruma w Braniborskej. Wone je sej w komunach tójšto konkretneho dźěła a diskusijow pominało. „Domowina je nas při tym sylnje podpěrała.“ Wón podšmórny, zo přisłuša nětko 43 komunow a wjesnych dźělow serbskemu sydlenskemu rumej w susodnym zwjazkowym kraju.

Na wopyće pola Měrki Kozeloweje w Stróži pola Hućiny

Měrka Kozelowa ze Stróže pola Hućiny je zbožowna, zo je zaso strowa a zo móžeše 22. oktobra w kruhu swojich lubych a přećelow 75. narodniny swjećić. Bjesaduju z jubilarku a jeje mandźelskim Sieghardom při šalce kofeja a skibce tykanca. Krasny mamy wid z terasy na wulku zahrodu a za njej na zybolacu wodu Olba­skeho jězora.

Wobaj staj wot lěta 1966 zmandźe­lenaj. Woženjenaj synaj, Hajko a Bolko z mandźelskimaj a synami Kitom Mě­rosławom, Aljošu a Kolju, su so maćeri, přichodnej maćeri a wowce k narodninam za wšu prócu wosebje dźakowali.

Prócu a dźěło jubilarka hižo wot dźěćatstwa sem znaje. Doma w Narću je tehdyša Měrka Hajnkec hižo jako dźěćo w domjacym ratarstwje na polu a w hródźi dźěłać dyrbjała. Staršej sej přeještaj, zo wona jako najmłódša z třoch dźowkow jónu swójbne małoratarstwo přewozmje. „Mój nan bě wjelelětny předsyda Do­mowinskeje skupiny w Narću. Mać chodźeše we Wojerowskej drasće, a doma smy serbsce rěčeli“, jubilarka powěda.