Na wulkich „němskich“ politiskich zarjadowanjach wo Serbach rěčeć njeje samo- zrozumliwe. Kóždolětnu politisku popjelnu srjedu sakskeje CDU tomu hišće tak je. Serbski zapósłanc strony w Sakskim krajnym sejmje Marko Šiman njeje sej jako hłowny organizator wzać dał, přitomnych serbskich čłonow strony w hali na Budyskim Třělnišću tež w swojej maćeršćinje powitać. Wčerawši statement něhdyšeje předsydki Centralneje rady Židow w Němskej Charlotty Knobloch, kotraž bě z Mnichowa přijěła, směmy bjezdwěla jako wjeršk wobhladować. Knjeni Knobloch bě runjewon zahorjena wo serbskej kulturje runje tak kaž wo měrniwym zhromadnym žiwjenju Serbow a Němcow, štož ma wona hladajo na konflikty našeho časa za přikład. Serbscy wobdźělnicy w hali znajmjeńša běchu dźakowni, byrnjež jich ličba po mojim wobkedźbowanju minjene lěta dale woteběrała. Marko Wjeńka

Podstupim (SN). Delegacija Iniciatiwy za demokratisce legitimowane ludowe zastupnistwo – Serbski sejm bě zawčerawšim, wutoru, z hosćom frakcijow CDU, Lěwicy, Zwjazka 90/Zelenych a SPD w Podstupimskim krajnym sejmje.

Čłonojo iniciatiwy Hanzo Wylem-Kell (delnjołužiski rěčnik), dr. Andreas Kluge (Drježdźany) a dr. Měrćin Krawc (Budyšin) podachu hosćićelam přehlad k pozadkej, zo ma kóždy lud zasadne prawo na swójski parlament. Tomu wšitke frakcije přihłosowachu, skedźbnjejo tež na wólby Rady za serbske naležnosće w Braniborskej lěta 2015, kaž ze zdźělenki iniciatiwy wuchadźa. Runje tak mějachu wulke zrozumjenje za žadanje, zo měł parlament serbskeho ludu sam rozsudźić, kak so wot Zwjazka a krajneju sejmow Załožbje za serbski lud přewostajene srědki zasadźa.

Dale wuradźowachu wutoru wo kompetencach Serbskeho sejma w kulturnych, kubłanskich a politiskich naležnosćach.

Pokład slěbornakow su při twarskich dźěłach w pincy w Jenje namakali. Po informacijach krajneho zarjada za pomnikoškit a archeologiju jedna so wo 75 twjerdych pjenjez, kotrež běchu w keramiskim sudobju w špundowanju pincy składowane. Najstarši z nich ma wobraz španiskeho krala Philipa II. z lěta 1563. Najmłódši pjenjez pochadźa z Hannoverskeho wulkowójwodstwa z lěta 1710. Prawdźepodobnje jedna so wo zabyty schow z časa, jako bankow hišće njebě. Sudobjo su namakali, jako w pincy domu betonowe špundowanje kidachu.

Ottifant – znate wabjenske logo sewjeroněmskeho komikarja Otta Walkesa, debi wot wčerawšeho wosebitu 70centowsku listowu znamku. „To bě přeco hižo mój són, so raz na listowej znamce zwěčnić móc. Nětko měješe Němski póst skónčnje samsnu mysličku. To wšak bu tež čas“, rjekny Walkes nowinarjam. Comicowy elefant je dlěje hač 40 lět markowe znamjo mjeztym 68lětneho Walkesa.

Passau (dpa/SN). Ze zaćahom stronskeho nawody Horsta Seehofera a jeho mandźelskeje Karin w Passauwje je CSU dźensa swoju politisku popjelnu srjedu zahajiła. Wopytowarjo w połnje wobsadźenej Třikrajowej hali su bayerskeho ministerskeho prezidenta zahoriće witali. Prěni króć běchu sej za dźensa štyrjoch rěčnikow skazali: nimo Seehofera zwjazkoweho ministra za wobchad Alexandera Dobrindta, bayerskeho nutřkowneho ministra Joachima Herrmanna a městopředsydu CSU Manfreda Webera.

... a socialdemokratow

Vilshofen (dpa/SN). Pod wyskom wjacorych tysac wopytowarjow je tež SPD dźensa swoje zarjadowanje na popjelnu srjedu we Vilshofenje zahajiła. Kanclerski kan­didat Martin Schulz zaćahny zhromadnje z awstriskim zwjazkowym kanclerom Christianom Kernom do swjedźenskeho stana. Bjezposrědnje do zahajenja bě hišće zwada wo tym wudyriła, hač ma CSU wjace wopytowarjow hač SPD abo nic: W Passauskej hali CSU ma 4 000 ludźi městno, w stanje SPD pak 5 000.

Gabriel solidaritu přilubił