Zhromadnje z NATO přećiwo terorej
Trump chce wjace atomowych bróni
We Waršawje za sejm wabili
Aktiwni tež w Pólskej
Wjele mortwych
To a tamne (24.02.17)
Podružnicy njesmědźa na balkonach swojich bydlenjow štomy sadźeć. Tole potwjerdźa Mnichowske hamtske sudnistwo w dźensa wozjewjenym wusudźe. Podružnik bě na balkonje swojeho bydlenja wosrjedź Mnichowa před 15 lětami hórski klon do hornca sadźił. Mjeztym je štom chětro narostł a je daloko widźeć. Wšitke namołwy wobsedźerki domu, jón wotstronić, muž dotal ignorowaše. Nětko je wona skoržiła.
Do wonjaceho mjasa zapakowane staj pašowarjo z Awstralskeje pjenjezy bjez cła do wukraja dowjezć chcyłoj. Z mjasom chcyštaj policajske psy na lětanišću w Adelaide za nós wodźić. Jedyn z nich pak reagowaše. Zastojnicy namakachu 375 000 eurow we wačokach muži. Wobeju pašowarjow zajachu.
Jako Martin Luther předrasćeny Jürgen Donde a jako Katharina von ...
Lěpšiny za Opel
Paris (dpa/K/SN). Zwjazkowa hospodarska ministerka Brigitte Zypries (SPD) ma za to, zo změje Opel ze splećenja z wulkim francoskim konkurentom PSA lěpšiny. „Partnerstwo z PSA wutwori sylne europske předewzaće“, wona rjekny. Dźensa je ministerka w Parisu ze swojim francoskim kolegu Michelom Sapinom jednała, dokelž je francoski stat na PSA wobdźěleny. Dźěše wo zdźerženje wšěch twornjow Opela w Němskej.
Jednaja znowa wo Syriskej
Genf (dpa/K/SN). W Genfje započachu so dźensa nowe jednanja wo měrje w Syriskej. Posrědnik UNO Staffan de Mistura bě so najprjedy ze zastupnikami Assadoweho knježerstwa a opozicije separatnje zetkał. Přećiwnicy knježerstwa chcedźa pak spěšnje direktne jednanja. Je trjeba, lutować čas, dokelž w Syriskej wšědnje mnozy ludźo wuměraja, zwurazni rěčnik opozicije Salim Muslit. Posrědnik UNO wšak njeje přeoptimistiski. Ze spěšnym wuspěchom wón njeliči.
Wotsunjency dolećeli
Čurkin po smjerći počesćeny
Moskwa (dpa/K/SN). Ruski prezident Wladimir Putin je zemrěteho wulkopósłanca pola UNO Witalija Čurkina po jeho smjerći z Rjadom zmužitosće wuznamjenił. Počesćeny bu za swój angažement, swoju wutrajnosć a profesionalnosć w skutkowanju pola Zjednoćenych narodow, rěka k tomu z Krjemla.
Čurkin bě póndźelu w New Yorku njenadźicy zemrěł. Dźeń pozdźišo by 65ćiny swjećił. Što je k smjerći dowjedło, njeje najprjedy jónu znate było. Medije rozprawjachu, zo je problemy z wutrobu měł. Swój kraj je wón wot lěta 2006 w UNO zastupował. Bjezstrašnostna rada UNO je wutoru na wurjadnym zeńdźenju z mjeńšinu mjelčenja njeboh diplomata wopominała. Němske zastupnistwo pola UNO wupraji swójbje a přećelam Čurkina tohorunja swoju sobuželnosć. Peter Wittig, něhdyši wulkopósłanc pola UNO a nětko we Washingtonje, mjenowaše Čurkina „brilantneho diplomata, rady polemizowaceho, žortniweho, z darom přećelstwa“.
To a tamne (23.02.17)
Pytajo za nowymi wobsedźerjemi swojich kóčkow kroči jedna ze zwěrjatownjow w Islandskej njezwučene puće. Wona prezentuje kóčki w internetnym livestreamje. Z třomi kamerami wšitko zapopaduje, štož kóčki w swojim dwuposchodowym klankowym domje činja. Cyły dźeń wusyłana dokusoap je iniciatiwa islandskeje towaršnosće za škit kóčkow, kotraž zwěrjatownju Kattholt w stolicy Reykjavíku wobhospodarja. Namaka-li so nowy wobsedźer, přińdźe druha bjezdomna kóčka na městno dotalneje.
Slědy kopytow a konjace zawostajenki wjedźechu policiju w Delnjej Frankskej k pohončej, kiž bě so po njezbožu zminył. 78lětny bě so z kuču parkowaceho awta šmórnył a 2 000 eurow škody zawostajił. Jeho šofer pak zawoła policiju, kotraž slědam sćěhowaše. Tak dojědźe runjewon do konjenca pohonča.
