Drježdźany (SN). Lěwica w Sakskim krajnym sejmje je hladajo na najnowšu rozprawu fachowcow w padźe terorizma podhladneho Al-Bakra sakskeho nutřkowneho ministra Markusa Ulbiga (CDU) namołwjała wotstupić. Nimo toho dyrbjało knježerstwo šefa krajneho kriminalneho zarjada Jörga Michaelisa pušćić. Lěwica ma za dopokazane, zo je šef kriminalneho zarjada hłownje za misnjenja w zwisku ze spočatnje zwrěšćenym zajećom Al-Bakra a jeho pozdźišim sebjemordarstwom w jastwje zamołwity. Ulbig jako zamołwity minister pak měł politisku zamołwitosć přewzać a ze swojim wotstupom naslědnikej puć runać, rjekny nutřkopolitiski rěčnik frakcije Lěwicy Enrico Stange na dźensnišim posedźenju krajneho sejma.

Awdijiwka (dpa/K/SN). Na wuchodnej Ukrainje su tuchwilu tak ćežke wojowanja mjez wójskom knježerstwa a proruskimi bojownikami kaž dołho wjace nic. Třěleńcy njedaloko města Awdijiwka su sej hižo tójšto woporow žadali. Z wojakow knježerstwa su třo padnyli a 24 dalšich poćerpi zranjenja. Na stronje separatistow maja štyrjoch mortwych bojownikow a sydom zranjenych. Boje maja tež za wuskutk, zo naspomnjene industrijne město z 35 000 wobydlerjemi při zmjerzkach minus 20 stopnjow w mnohich dźělach nima miliny ani tepjenja. Ruske nawodnistwo w Moskwje je so chětro starosćiwje wo eskalěrowacych bojach z wjele mortwymi wuprajiło. Berlin, Paris­ a Moskwa měli so zhromadnje za to zasadźić, zo spjelni Kijew wšitke do­jednanja z Minska k rozrisanju konflikta.

Do paslow zalězł je sej paduch w Germeringu pola Mnichowa, jako chcyše drasty z kontejnera za staru drastu kradnyć. Při tym zhubi runowahu a suny so přez škałbu do kontejnera, policija zdźěli. 35lětny podarmo spytaše so ze sudobja zaso wudrapać. Hakle jako pěšk spodźiwne zwuki z kontejnera słyšeše a nuzowe čisło zawoła, přińdźe pomoc. Wohnjowi wobornicy zamk při kontejneru přerězachu a jateho wuswobodźichu.

Wjace hač tysac ludźi je so wčera w kostimach něhdyšich wikingow w šotiskim Lerwicku na kóždolětnym festiwalu „Up Helly Aa“ wobdźěliło. Z rjećazowymi košlemi, nahłownikami a brónjemi wuhotowani ćehnjechu wobdźělnicy po městačku hłowneje ze Shetlandskich kupow. Festiwal zarjaduja tam wot lěta 1880 w tradiciji historiskich nowolětnych a swětłowych swjedźenjow.

Washington (B/SN). Narodna cyrkwinska rada USA je wažne personelne rozsudy noweho prezidenta Donalda Trumpa kritizowała. Zastupjerjo 38 protestantskich a ortodoksnych cyrkwjow wumjetuja pomjenowanym wosobam Jeffej Sessioej (minister justicy), Stephenej Bannonej (šefstratega) a Michaelej Flynnej (poradźowar wěstoty), zo podpěruja woni „rasizm, antisemitizm, běłe předprawo, hidu cuzym napřećo a antimuslimske ideologije“. Trump bě Bannona za swojeho wosobinskeho poradźowarja powołał a za to druhich wažnych zamołwitych z najwušeho kruha wuzamknył.

Woblubowane předmjeno

Vatikan (B/SN). Wot spočatka pontifikata bamža Franciskusa je předmjeno Francesco na prěnim městnje najwoblubowanišich italskich hólčich mjenow, wězo tež we Vatikanje. Před tydźenjomaj, na swjatym dnju křćeńcy Knjeza, wukřći bamž 28 dźěći vatikanskich přistajenych. Mjez nimi běchu hnydom štyrjo mali Francesco, štož je italska wersija za Franciskusa.

Tež křesćanow wuswobodźili