Redakcija našeho wječornika: Bosćan Nawka
Do redakcije je přišoł „připadnje jako wupomhacy lajski stilizator“, kaž sam praji. Druhdźe bychu jeho „wuběrne pjero“ mjenowali. Tola naš w Stralsundźe rodźeny a dźensa w Budyšinje bydlacy kolega Bosćan Nawka radšo druhich do swětła zjawnosće staja hač sebje samoho. Přiwšěm je hižo jako šuler Serbskeho gymnazija w Budyšinje na jewišću młodźinskeho dźiwadła při Němsko-Serbskim ludowym dźiwadle stał, hdźež wón tež do kruha elewow činohrajneho studija słušeše. Tež hudźbje běše wot časa młodosće wusko zwjazany, najprjedy jako redaktor a moderator formata „Hudźba wot młodych – hudźba za młodych“ w tehdom rano wusyłanym předchadniku Radija Satkule Serbskeho rozhłosa. Pozdźišo jako hudźbnik na bijadle abo ze sequencerom (elektroniska připrawa abo software za tworjenje hudźby ze zdźěłanjom datow) mjez druhim w skupinomaj stoned hajtzer a PŠŠ („Pjeć šibali štyrjo“). Rady měšeše žanry wot death metala přez jazz a „klasisku hudźbu“ hač k eksperimentalnym elektroniskim zynkam.
Cyły spektrum techna, spokenword a wjace při skale
Miłoćicy (SN/bn). Dohromady 15 hudźbnych cyłkow resp. DJjow je minjeny kónc tydźenja 5. festiwal Meta Solis při Miłočanskej skale z přewažnje elektroniskimi zynkami wobrubiło. Na dwěmaj hrajnišćomaj zahorichu mjez druhim serbskej akterce Ida Bux a 666SMWA, ALLG z Gdańska, Jess z Kaira a Drježdźanjan John Bass 303 cyłkownje něhdźe 300 wopytowarjow ze swojimi setami, wotbłyšćowacymi bjezmała dospołny spektrum powšitkownje jako techno znateho žanra. Wo kontrast postaraštej so Paul Geigerzähler z akustiskim folk punkom a překwapjacy wustupowacy Kolektiw Klanki ze serbskim hiphopom. Alina Petrowa z ruskeje skupiny Pussy Riot bě swój planowany gig chorosće dla krótkodobnje wotprajiła.
Lubowarka cuzych rěčow a kulturow
22lětna Sophie Hejduškec, bydlaca a studowaca w Drježdźanach, njeje w Serbach runjewon njeznata. Młodostnu, kotraž wusměri so ze studijom na psychologiju, znajemy ze serbskeho programa, rozhłosoweho sćelaka MDR, ale tež w nowinje hdys a hdys přinoški z jeje pjera čitamy.
Po puću lubosće do parka přišła
Barbara Iwlew: 25 lět na čole pólskeho dźěla herbstwa wjercha Pücklera
Barbara Iwlew ma lětsa powołanski „slěborny kwas“: 25 lět dźěła jako direktorka pólskeho dźěla Wjercha Pückleroweho parka. Z njej je so Jost Schmidtchen rozmołwjał.Su Wam Wjercha Pücklerowy park takrjec do kolebki połožili?
B. Iwlew: Wězo nic. Sym so w Krakowje narodźiła a tam wotrostła. Studij štomowědy a lěsnistwa z masterom jako inženjerka zakónčiwši dźěłach lěto na lěsnym zarjedźe Lipinki. Tam bych pak jenož w běrowje dźěłać móhła, štož so mi nochcyše. Připadnje zhonich, zo narodny institut za hladanje pomnikow nawodnicu za Pücklerowy park we Łęknicy pytaše. Sym so wuspěšnje požadała.
Kak sće do Łužicy přišła, wšako słušeja Lipinki a Łęknica do tutoho regiona?
B. Iwlew: To běchu puće lubosće. Kóždy z nas něhdy jónu něhdźe dóńdźe.
Što sće w lěće 1998 na nowym dźěłowym městnje nadešła a kak sće započała?
Redakcija našeho wječornika: Bettina Młynkowa
Njeby wona sčasom na prawy kneflk tłóčiła, njebyšće Serbske Nowiny čitać móhli: Bettina Młynkowa, rodźena Lukasec z Chrósćic, je jako „layouterka“ knjeni nad poslednjej staciju do wotedaća datajow ćišćerni resp. po tym woteběraćelam pdf-abonementa. Zdobom pak je hižo cyle na spočatku redakciji poboku, hdyž wo to dźe „strony zapołožić“, ramik za přinoški. A potom nimo wobdźěłanja fotow cyły proces produkcije přewodźa – ze sylnymi čuwami a njepowalnej dobrej naladu. Za čas dowola druhich ma dalše dźěławosće na starosći, na přikład w sekretariaće.
„Plus a zdobom minus“
Nadal w kóždymžkuli zmysle přewšo hibićiwy a k najproduktiwnišim serbskim spisowaćelam słušacy awtor Křesćan Krawc je wčera 85. narodniny swjećił. „Tónle dźeń ja za mnje zdobom plus a minus. Štož tež přeco to woznamjenja, njemóžu dźensa rjec“, w Hrubjelčicach bydlacy rodźeny Lemišowčan ze za njeho typiskim šibałym humorom jubilej zjimajcy podšmórny. Mjez tójšto gratulantami – telefon a/abo klinkačk chěžinych duri so takrjec w pjećminutowym takće přizjewištej – běchu nimo swójbnych a přiwuznych, z kotrymiž chce Krawc za tydźeń „woměrje woswjećić“, přećeljo, susodźa a kolegojo. Přeću Ludoweho nakładnistwa Domowina, kotrež je dotal wjace hač 20 publikacijow z pjera Krawca wudało, z „njesprócniwym, lětdźesatki trajacym skutkowanjom jako awtor za čitarjow wšěch generacijow a jako mostotwarc k němskim a słowjanskim susodam“ pokročować, chce spisowaćel wotpowědować.
Retrospektiwa z hudźbnymi raritami
We wobłuku rjadu „Wuměłstwo na chódbje“ bu wčera dalša ...
Architektura abo rěčny studij
Matej Meškank ze swojej dobrej naladu ludźom wjeselo wobradźa
Hdyž Mateja Meškanka wuhladaš, dóstanješ bjezdwěla dobru naladu, jeli ju hižo měł njejsy. Tak znajmjeńša jeho přećeljo wo nim praja. Tež dźěći Chróšćanskeje wosady, kotrymž bě wón na lětušim nabožnym tydźenju poboku, su to zwěsćili. Wokoło njeho knježeše stajnje čiłe žiwjenje. W hnadownej cyrkwi w Róžeńće, na putnikowanju dźěći, hižo najmjeńši po jeho přikładźe sobu kleskachu a sobu spěwachu, runje tak pak kaž wón woměrje připoskachu a hladachu, što so we wołtarnišću stawa.
Matej Meškank, pochadźacy z Lipska, je loni na Budyskim Serbskim gymnaziju maturu złožił. Mjeztym so wón na studij hotuje. Aktualnje wón w gastronomiji dźěła, zo by sej pjenjezy zasłužił. Lětsa nazymu chce studować započeć a měri so na předmjet architekturu. „Njejsym pak sej cyle wěsty. Móžu sej tež předstajić rěče studować. Wšako nimo serbšćiny, němčiny a jendźelšćiny tež španisce rěču. A trochu čěsce tež móžu“, tak 19lětny powěda.
Puigdemont dale faktor mocy
Z katalanskeho wida na wuslědki wólbow španiskeho parlamenta
Do njedawneje wólby parlamenta w Španiskej je ministerski prezident Pedro Sánchez (PSOE, socialistiska dźěłaćerska strona) warnował, zo móhł PP, konserwatiwna resp. křesćansko-demokratiska strona, hromadźe z „Vox“ (hłós, prawicarskopopulistiska strona) knježerstwo přewzać. „Vox“ je skeptisce napřećo EU nastajeny a wotpokazuje prawa awtonomije regionow. Dotalny nawoda opozicije Alberto Núñez Feijóo (PP) je drje wólby dobył, ale 136 mandatow PP plus 33 zapósłancow VOX plus zastupjerjej regionalneju stron su wšo dohromady 171. Za wjetšinu a z tym tworjenje noweho knježerstwa by Feijóo 176 městnow w parlamenće trjebał, połojcu dotal 350 zapósłancow plus jedyn mandat. Tola tež „lěwy“ blok ma jenož 172 zapósłancow, mjez nimi 122 zastupjerjow PSOE.
