Amplowa koalicija před wažnymi wuradźowanjemi wo dalšim dźěle

Berlin (dpa/SN). W sprostnjenej zwadźe amploweje koalicije chcedźa tutón tydźeń wjele wuradźować. Terminowy zapisnik je pjelnjeny a lisćina temow, ­kotrež chce koalicija SPD, Zelenych a FDP wobjednawać, je dołha. Mjez druhim póńdźe wo přichod amploweho zwjazka, wo wusměrjenje hospodarskeje politiki a wo wuslědk wólbow w USA. Hižo ­wčera wječor běštaj so financny minister Christian Lindner (FDP) a zwjazkowy kancler Olaf Scholz (SPD) w kanclerskim zarjedźe zetkałoj. Wo wuslědkach zetkanja njebě spočatnje ničo znate.

Zajutřišim, srjedu, dźeń po prezidentskich wólbach USA, zeńdźe so koaliciski wuběrk, kotremuž přisłušeja tež před­sydźa stron a frakcijow. Rěčeć chcedźa wosebje wo pobrachowacych miliardach w zwjazkowym etaće a wo planach, hospodarsku krizu Němskeje přewinyć. Scholz, hospodarski minister Robert ­Habeck (Zeleni) a Lindner chcedźa so do posedźenja koaliciskeho wuběrka wo­spjet sami zetkać, zo bychu za wupućemi z krizy knježerstwa pytali.

Zo dyrbja hižo něšto lět adwentne wiki w Němskej z betonowymi zawěrami škitać, je „zasłužba“ islamistiskich teroristow. Přećiwo njejapkim atakam z nožom to wězo njepomha. Tohodla mamy wulki zajim, zo politika přichadej tajkich ludźi do našeho kraja zadźěwa. Dźesać tysac jatych teroristow „Islamiskeho stata“ wobstražuja hižo lěta dołho kurdojo w nadawku admi­nistracije samozarjadnistwa w sewjero­wuchodnej Syriskej. Nažel pak turkowski NATO-partner Erdoğan ludnosć regiona stajnje z bombardementami terorizuje, dokelž ma ze sebjewědomymi kurdami w susodstwje wjac problemow hač z islamistami, z kotrymiž faktisce hižo wo­spjet kooperowaše. Snadź móže naša wonkowna ministerka Annalena Baerbock (Zeleni) swoju „feministisku wonkownu politiku“, ke kotrejž so wuznawa, tule jónu zwoprawdźeć. Złóstnistwa Erdoğana w Syriskej jeničce justicy přewostajić by wohańbjace było, wšako stej měr a wěstota z nadawkom politiki. Marcel Brauman

Prěni króć k swojej alkoholowej jězbje wuprajił je so bywši narodny wrotar Jens Lehmann. „To njebě derje wot mnje. Wobžaruju to jara. Sym pak so sam wopak posudźował“, rjekny Lehmann nowinarjam. W septembru bu znate, zo je policija Lehmanna zadźeržała, jako tón pod wilwom alkohola z awtom jědźeše. Naměrili so pola njeho 0,7 promilow. 54lětny dyrbi drje jězbnu dowolnosć měsac wotedać. Lehman wobara pak so rozprawam, zo bě pječa „dospołnje wopity“.

Zabyteho nachribjetnika dla je muž w Maisachu pola Mnichowa měšćansku železnicu zadźeržał. Wodźerka ćaha dyrbješe nuzowe borzdźidło wužiwać, jako wón naraz před njej na kolijach steješe. Na to wzachu muža w ćahu sobu, zo bychu jeho na přichodnym dwórnišću policiji přepodali. 29lětny pak twochny. Policija nětko za zawinowarjom haćenja pyta.

Hišće w Sakskej wo móžnej koaliciji jenož sonděruja, ale hižo je Domowina žadanje za koaliciske jednanja wozjewiła. Štož je zastupjerka zajimow serbskeho ludu stronam CDU, BSW a SPD sposrědkowała, tule dokumentujemy.

1. kubłanje: Polěpšenje serbskeje kubłanskeje infrastruktury

Pozadk: Dotalne krajne knježerstwa su problem spóznali, ale zeskutkownjenje wuwostanje. Wosebje akutny njedostatk wučerjow je wulke wužadanje.

Žadanja: – wosebity status za serbske šule: Serbske šule trjebaja wosebity status, wosebje hladajo na personalny kluč a rjadownje. Rěčne a kulturne naroki serbskeje ludnosće žadaja sej wosebite zakonske rjadowanje. Šulske družiny pře­sahowacy koncept 2plus wopisuje ra­mikowe wuměnjenja, kotrež měli so zakonsce zakótwić, runje tak kaž priorita zasadźenja maćernorěčnych wučerjow na serbskich – město druhich – šulach resp. rjadownjach.