Přiměr mjez Israelom a Hisbolluh
Beirut/Tel Aviv (dpa/SN). Po dlěje hač lěto trajacej wójnje mjez Israelom a libanonskej milicu Hisbollah brónje wot dźensnišeho ranja mjelča. Přiměr běchu posrědnicy USA a Francoskeje wujednali. Israelski ministerski prezident Benjamin Netanjahu je minjenu nóc wot znjepřećeleneho Irana podpěranu milicu warnował: „Kak dołho přiměr dźerži, wotwisuje wot toho, što so w Libanonje stawa.“ Zrěčenje předwidźi, zo wojowanja najprjedy raz dwaj měsacaj wotpočuja. Hisbollah ma kónčinu při juho-libanonskej mjezy k Israelej wopušćić. Runočasnje so tež israelske wójsko z tuteje kónčiny wróći. Kontrolu w tutym pasmje ma libanonska armeja přewzać, kotraž njebě na wojowanjach wobdźělena.
Krótko do přiměra bombardowachu israelske lětadła hišće raz objekty w libanonskej stolicy Beirut. Při tym je znajmjeńša dźesać ludźi swoje žiwjenje přisadźiło. Bjezposrědnje po zahajenju přiměra podachu so prěni wobydlerjow z awtami na puć do swojich wsow, kotrež běchu wojowanjow dla wopušćili. W Beiruće woswjećichu ludźo wolóženi na dróhach kónc wojowanjow.
Spěšnje pomhać!
Porjedźenka
Zawěsćenja za e-awta dróše
Heidelberg (dpa/SN). Elektroawta su po wobličenju portala Verivox hladajo na kóšty zawěsćenja Kasko dróše hač awta z bencinowym motorom. Zawěsćernje su płaćizny swojich zrěčenjow za ryzy elektroawta kaž tež a hybridne jězdźidła raznišo podróšili hač pola přirunajomnych dotalnych motorow. Kompletne zawěsćenja Kasko su za wobě družinje elektrojězdźidłow přerěznje wo 30 procentow dróše hač loni. Runočasnje su so zawěsćenja za bencinowe awta jenož wo 25 procentow podróšili.
Kasko-zawěsćenje naruna hinak hač winowatostne zawěsćenje tež škody na swójskim awće. Te pak su pola elektroawtow wo wjele dróše hač pola bencinowych. Po ličbach zwjazka zawěsćernjow wučinja tutón rozdźěl přerěznje 25 procentow. „Wysoke kóšty a dokładniše posudźowanje rizika wotbłyšćuja so w tarifach zawěsćernjow“, zdźěla Wolfgang Günther, jednaćel přirunowanskeho portala Verivox. Zdobom wón na to pokaza, zo njedyrbja elektroawta tak husto do porjedźernjow, abo snadź su šoferojo tutych awtow jednorje kedźbliwiši: Elektroawta trjebaja 20 procentow mjenje reparaturow.
Ochranowsku hwězdu přepodali
Woteběracy zajim za Black Friday
Berlin/Köln (dpa/SN). Zajim ludźi za rabatne akciske dny kaž Black Friday kupowanskich portalow kaž Temu a Shein dla widźomnje woteběra. Wjace hač 40 procentow ludźi rabatowe akcije po zwěsćenju instituta za přirunowanje płaćiznow Idealo hižo njetrjeba. Wšako wabja poskićowarjo z Aziskeje cyłe lěto z tajkimi hrabnjenčkami. Reprezentatiwne naprašowanje mjez 2 000 ludźimi bě slědźenski institut Kantar w septembru přewjedł. Podobny bě wuslědk naprašowanja Kölnskeho wikowanskeho slědźenskeho instituta IFH. Kóždy štwórty mjez zajimcami za Black Friday měni, zo nochce so lětsa na akciji wobdźělić – runje aziskich portalow dla.
Na dnju Black Friday, kotryž wotměje so zajutřišim, pjatk, poskićuje tójšto wikowarjow twory wo wjele tuńšo. Minjene lěta bě so zadomiło, zo hižo dny a tydźenje do toho z wurjadnymi poskitkami ludźi přiwabja. Zajim ludźi za tajke rabatowe akcije je w Němskej wulki.
Nimo adwentnych sobotow su dny wokoło Black Friday wobchodnikam w Němskej sobu najwažniše cyłeho lěta.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Wyša redaktorka: Bianca Šeferowa 577 230
tel.: 03591 577 232 faks: 03591 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Serwis za abonentow: 577 263
Předań nawěškow: Jadwiga Šołćic 577 266 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (27.11.24)
Paduši na adwentnych wikach móhli ludźom wjeselo dohodowneje zabawy skazyć. Před tym warnuje sakske nutřkowne ministerstwo. Runje tołkańcy na wjetšich zarjadowanjach su paducham witana składnosć za njeskutki. Policija radźi, zo wopytowarjo wikow swoje pjenjezy a kreditne karty stajnje w zamknjenych nutřkownych faškach kabatow chowaja.
Na wšěch 400 000 ilegalnych e-cigaretow, 600 kilogramow tobaka a 200 000 eurow su policisća při raciji přećiwo cwólbam w Berlinje sćazali. Zastojnicy wobkedźbuja přiběracu aktiwitu kriminelnych wikowarjow, kotřiž měrja so wosebje na njepołnolětnych kurjerjow e-cigaretow.
Stawiznarka z ćěłom a dušu była
Zrudna powěsć je k nam dóšła, zo je něhdyša županka našeje župy „Michał Hórnik“ Trudla Kuringowa 84lětna na prawdu Božu wotešła. Narodźiła bě so 28. januara 1940 do serbskeje swójby w Kanecach. Wuchodźiwši šulu we Wotrowje a susodnych Pančicach kaž tež po wopyće wyšeje šule w Budyšinje nawukny powołanje tekstilneje chemikarki. Přemóžaca pak bě jeje žadosć, stać so z wučerku. Tuž nawróći so po dwěmaj lětomaj z Limbacha-Oberfrohny do Łužicy, zo by na Budyskim Pedagogiskim instituće serbšćinu a němčinu studowała. Wot 1968 do 1991 běše wona wučerka w Šuli Ćišinskeho w Pančicach-Kukowje. Mjeztym zabsolwowa dalokostudij chemije. Dalši puć powołanskeho žiwjenja wjedźeše ju jako wučerku na Budyski Serbski gymnazij hač do lěta 2000.
Zmandźeliwši so z Janom Pohončom, narodźi so mandźelskimaj w přichodnych lětach pjeć dźěći. Ćežke horjo je swójbu trjechiło, jako mandźelski a nan 1991 zemrě.
Trudla Kuringowa bě hižo z časa swojeje młodosće aktiwna čłonka Domowiny. Nimale 50 lět skutkowaše w předsydstwje Domowinskeje skupiny w Kanecach, wjacore lěta z toho jako předsydka.
Znowa nadźija na přiměr
Tel Aviv (dpa/SN). Po dlěje hač lěto trajacej wójnje w Libanonje maja pokazki na bližacy so přiměr mjez Israelom a pro iranskej milicu Hisbollah. Israelski ministerski prezident Benjamin Netanjahu je za dźensa wječor wěstotny kabinet zwołał, zo by 60 dnjow trajacy přiměr z Hisbolluh potwjerdźił. To zdźěli rěčnik knježerstwa israelskim nowinarjam. Powěsćernje rozprawjeja, zo chce kabinet dojednanju, kotrež běchu USA sposrědkowali, přihłosować.
Pytaja za přičinami zražki
Vilnius (dpa/SN). Po zražce nakładneho lětadła w Litawskej pytaja dale za přičinami njezboža. Za konkretne wotmołwy je po informacijach zamołwitych hišće přezahe. Dotal nimaja žanych pokiwow na sabotažu abo teroristiski nadpad na mašinu předewzaća Swift-Air, kotraž bě w nadawku DHL po puću z Lipska do Vilniusa. Zwjazkowy kancler Olaf Scholz (SPD) wčera rjekny, zo je to móžny teroristiski nadpad Ruskeje.
Tež Němcy mjez zhubjenymi
