Seibert starosća so pomocy dla
Braniborska SPD zakituje dojednanje
Podstupim (dpa/SN). Generalny sekretar braniborskeje SPD David Kolesnyk je kompromis swojeje strony ze Zwjazkom Sahry Wagenknecht w prašenju prócowanjow wo měr w Ukrainje zakitował. Prezidij SPD je w awgusće w prašenju wěstotneje architektury w Němskeje a Europje dokument wobzamknył. Tam namakaja so tež formulacije k wotbrónjenju a k diplomatiji. „To kryje so z tym, štož smy zhromadnje z BSW wujednali“, Kolesnyk rozhłosowemu sćelakej rbb rjekny. Wón njewidźi w tymle prašenju žadyn problem. Rozhłosownica bě so jeho prašała, hač njespřećiwja so wotrězk dojednanja z BSW k wonkownej a zakitowanskej politice zasadnej poziciji zwjazkoweje SPD w Berlinje.
W Braniborskej chcetej SPD a BSW oficialnje koaliciske jednanja k wutworjenju zhromadneho knježerstwa zahajić. Krajnej předsydstwje wobeju stron běštej tomu po sonděrowanskich rozmołwach přihłosowałoj. Zasadźenje za měr w Ukrainje a wotpokazanje nowych raketow USA běštej centralnej temje.
Söder žada sej razne naprawy
Kriza awtotwarca Volkswagen zbudźa reakcije politisce zamołwitych
Mnichow/Wolfsburg (dpa/SN). Jako reakciju na hrožace zawrjenje wjacorych twornjow awtotwarca Volkswagen žada sej bayerski ministerski prezident a předsyda CSU Markus Söder radikalny přewrót hospodarskeje politiki Němskeje. „Trjebamy Marshallowy plan za awtowu industriju“, rjekny Söder powěsćerni dpa w Mnichowje. „Wuwiće pola VW je brutalne za awtowu industriju Němskeje, byrnjež zmylki managementa wočiwidne byli.“
Kriza VW je Söderej „wuslědk přilubjeneho zeleneho hospodarskeho dźiwa: kriza a negatiwne wuwiće“. EU a Němska awtowu industriju hižo wjele lět z wopačnymi rozsudami wosłabjatej. „Green Deal EU a rozsudy amploweje koalicije rubja Europje a Němskej kmanosć wubědźowanja.“
Što je z transparencu?
Žada sej kónc rentoweje reformy
Berlin (dpa/SN). Prezident zwjazka dźěłodawarjow metaloweje branše Stefan Wolf namołwja amplowu koaliciju, zakonski rentowy paket zadźeržeć. „Rentowy paket je blamaža za amplu. Je to jedna z najwjetšich njesprawnosćow tuteje koalicije, kotraž budźe nam hišće jara na škodu“, rjekny Wolf nowinarjam. Přichodne generacije změja pod tym jara ćerpjeć. Wón před tym warnowaše, młodych ludźi z wysokimi dawkami a popłatkami do wukraja ćěrić. „Młodźi ludźo rozmysluja, čehodla dyrbjeli poprawom hišće w Němskej wostać, hdyž jich tule přejara poćežuja“, Wolf rjekny. „Mój apel ampli rěka: Zadźeržće rentowy paket II, prjedy hač je přepozdźe!“
Z nowym rentowym paketom II, kotryž su hižo w zwjazkowym sejmje wobjednawali, chcedźa jadro rentoweho niwowa stabilne dźeržeć. Renty maja zwyšenym mzdam wotpowědować, štož pak je dale a dróše. Koalicija chce wotwidźomnym wyšim přinoškam zadźěwać a kapitalny zakład na akcijnych wikach wutworić. Fachowcy dwěluja na skutkownosći a liča z raznje zwyšenymi přinoškami za přichodne generacije.
Policija hotuje so zaso na halloween
To a tamne (29.10.24)
Na wšěch 2,46 promilow alkohola w kreji měješe šofer nakładneho awta, jako ze swojim wozydłom na awtodróze A 14 do směra na Halle znjezboži. Njedaloko Schkeuditza zajědźe won do nabóčneho wobhrodźenja. Na to so awto powali a jězdnju blokowaše. Policiji alkoholowa wón napadny, na čož njezranjeneho 46lětneho šofera kontrolowachu. Wěcna škoda wučinja 100 000 eurow. Awtodróha bě wjacore hodźiny zawrjena.
Hłódni paduši su sej w młodźinskim centrumje w Darmstadće najprjedy raz něšto k jědźi činili. Kaž policija zdźěli, su so skućićeljo kónc tydźenja namócnje do objekta zadobyli. W kuchni centruma so na to posłužowachu a zhotowichu sej pizzu, kotruž su wočiwidnje zhromadnje zjědli. Po wječeri so skućićeljo zminychu, bjez toho, zo by jich nichtó widźał. Policija prosy móžnych swědkow wo pomoc.
Volkswagen zawěra twornje
Wolfsburg (dpa/SN). Awtotwarc Volkswagen chce po informacijach zawodneje rady w Němskej znajmjeńša tři twornje zawrěć a dźesaćitysacy dźěłowych městnow wottwarić. Wo tym je nawodnistwo koncerna zastupnistwo dźěławych informowało, předsydka zawodneje rady koncerna Daniala Cavallo dźensa we Wolfsburgu rjekny. Wšitke druhe zawody chcedźa pomjeńšić. VW ma w Němskej 120 000 sobudźěłaćerjow.
Žada sej tuńšu energiju za wšěch
Berlin (dpa/SN). Hospodarstwo Němskeje žada sej wot zwjazkoweho knježerstwa zniženje kóštow energije za wšě předewzaća a nic jenož za industriju. „Politika ma centralny nadawk, trajne stabilne zastaranje z energiju za šěroki wobłuk předewzaćow zaručić“, rjekny prezident Němskeje industrijneje a wikowanskeje komory Peter Adrian nowinarjam. Jutře chce so zwjazkowy kancler Olaf Scholz (SPD)ze zastupjerjemi industrije a dźěłarnistwow zetkać.
Israel: Móžemy hišće wjace
Kandidat republikanow za zastojnstwo prezidenta USA Donald Trump je ...
Wjele namjetow za statne zrěčenje
Budyšin (SN/mb). Zapósłancy Serbskeho sejma su so sobotu na swoje poslednje regularne posedźenje do nowowólbow gremija w Budyskim dźiwadle na hrodźe zešli. Na spočatku wužištej zastupjerce Serbskeho muzeja a Němsko-serbskeho ludoweho dźiwadła (NSLDź), Andrea Pawlikowa a Hanka Jenčec, poskitk rozprawy wo swojej instituciji. W NSLDź pobrachuje serbski dorost, hač w dźiwadłowej pedagogice, technice abo w druhich wobłukach, tohodla je so prezenca serbšćiny jara pohubjeńšiła. W muzeju maja porno tomu cyle hinaši problem: Je dale a mjenje šulerjow, kotřiž serbskorěčne poskitki docyła rozumja, a ćežko, ze serbskimi dźěćimi konsekwentnje serbować, hdyž měšane rjadownje muzej wopytuja.
