Buenos Aires (dpa/SN). Britiski spěwar Liam Payne je při njezbožu w hotelu w Buenosu Airesu na polytrawma a nutřkowne krawjenja zemrěł. Tole su lěkarjo při obdukciji ćěła zwěsćili. Payne bě z třećeho poschoda hotela padnył. Přepytować nětko chcedźa, hač steješe wón pod wliwom alkohola a drogow. Dotal wšitko na to pokazuje, zo bě spěwar sam w swojej stwě, jako z balkona padny. Statne ­rěčnistwo na to tuka, zo měješe 31lětny krizu drogow a alkohola dla.

Do Buenosa Airesa bě Payne jěł, zo by koncert swojeho bywšeho hudźbneho kolegi Nialla Horana wopytał.

Fanam swětosławneje britiskeje hudźbneje skupiny One Direction je powěsć wo smjerći spěwarja wulki šok. Band běchu lěta 2010 we wobłuku britiskeje castingshow „The X Factor“ załožili. Do skupiny słušachu znaći spěwarjo kaž Harry Styles a Zayn Malik.

Britiski premierminister Keir Starmer je přiwuznym a přećelam swoje sobužarowanje wuprajił. „One Direction bě jedna z najwuspěšnišich britiskich hólčich skupin. Jich hudźba měješe hoberski wliw na miliony fanow na swěće.“

James Blunt smě dale James Blunt rěkać a njedyrbi swoje mjeno na Blunty McBluntface změnić. Nowonakład swojeho hitoweho albuma „Back to Bedlam“ je mjenujcy sedme městno w britiskich chartach docpěło – a nic hnydom prěnje. Za tón pad bě znaty hudźbnik přilubił, swoje mjeno oficialnje tak změnić, kaž ludźo po namjetach w social media wothłosuja. Dobyło je tam mjeno „Blunty McBluntface“. 50lětny nětko wobkrući, zo by marketingowy gag chutnje zwoprawdźił. K tomu je James Blunt w socialnych syćach nětko tež satiriski widejo wozjewił.

Njeznaći paduši su we vogtlandskim Elsterbergu 150 blešow wina pokradnyli. Cyłkowna hódnota alkoholiskich napojow wučinja 2 000 eurow, policija nětko zdźěli. Čas njeskutka njemóžachu zastojnicy dokładnje postajić. Hižo wot nalěća njejsu wobsedźerjo wina za swojimi napojemi w pincy hladali.

Njezwučene knježerstwo za Saksku? Kliman: Napinace, ale hinak njeńdźe

Drježdźany (SN/mb). Jednarjo stron CDU, BSW a SPD su „koaliciji ćernjowki“ w Sakskej puć rubali. Dotal běše z wašnjom, knježace politiske zwjazki na zakładźe barby wobdźělenych stronow pomjenować po chorhoji kraja z tutymi barbami. To pak w tutym padźe njeńdźe. Tohodla ma ćernjowka njezwučenej koaliciji mjeno spožčić: Hdyž ćernjowka zrawi, bywa najprjedy čerwjena (SPD), potom płód woćěmni do směra lila (BSW), doniž cyle njesčorni (CDU). Někotři prominentni sakscy čłonojo CDU drje su tute wuwiće wotwobarać spytali z namołwu, zo ma dobyćer wólbow tež z AfD rěčeć (SN su rozprawjeli). W prawym křidle sakskeje CDU lubuja ideju, wutworić mjeńšinowe knježerstwo a docpěwać wjetšinu w konkretnych temach jónu hromadźe z prawym, jónu z lěwym spektrumom parlamenta. To pak je ministerski prezident Michael Kretschmer raznje wotpokazał.

Berlin (dpa/SN). Nowy generalny sekretar SPD Mattias Miersch namjetuje hladajo na roztřěskanosć politiskeje krajiny w Němskej, wo fleksibelnišich knježerstwowych zwjazkach rozmyslować. „Najskerje dyrbimy swój strach před nowymi formami knježerstwoweho dźěła wotpołožić“, rjekny Miersch nowinarjam. „W druhich krajach maja mjeńšinowe knježerstwa a druhe formy kooperacije, kotrež njeměrja so na krute koalicije.“

Ruske truty wotwobarali

Kijew (dpa/SN). Ukraina je po swójskich informacijach minjenu nóc njewšědnje wulki nadpad Ruskeje z trutami wotwobarała. Wot wčera wječora su cyłkownje 135 ruskich bojowych trutow zličili, ukrainske wójsko zdźěla. Z nich su znajmjeńša 80 wottřělili, 44 powětrowych objektow je so z radarowych wobrazowkow zminyło. W stolicy Kijewje knježeše powětrowy alarm. Ruska přiběrajcy spyta, z trutami njeměr w kraju šěrić.

Njewjedra w Francoskej