Oslo (dpa/SN). Japansku měrowu organizaciju Nihon Hidankyo wuznamjenjeja lětsa z Měrowym Nobelowym mytom. Organizaciju počesća z tym tež za jeje zasadźenje na dobro swěta bjez atomowych brónjow a za to, zo z pomocu swědkow časa stajnje zaso demonstruje, zo njesmědźa so tajke brónje nihdy wjace zasadźić. Tole je norwegski Nobelowy komitej dźensa w Oslu zdźělił. Dotal njejsu organizaciju hišće docpěli, zo móhli ju wo wuznamjenjenju informować, komitej při wozjewjenju lětušeho lawreata zdźěli.

W času konflikta na Bliskim wuchodźe, wójny w Ukrainje a dźesatkow dalšich ­namócnych konfliktow na swěće njebě so lětsa jasny faworit za Měrowe Nobelowe myto wotbłyšćował. Nominowali běchu 286 kandidatow, mjez nimi 197 wosobinow a 89 organizacijow. To bě jasnje mjenje hač minjene lěta. Mjena nomino­wanych Nobelowy komitej hižo 50 lět tradicionalnje jako potajnstwo chowa.

Loni bě w Iranje zajata wojowarka ­za prawa a runoprawosć žonow Narges ­Mohammadi myto dóstała.

Zwjazkowy zličbowanski zarjad starosća so wyšich wudawkow stata dla

Berlin (dpa/SN). Zwjazkowy zličbowanski zarjad rentowe plany zwjazkoweho knježerstwa raznje kritizuje. Wosebje postorkuje so zarjad na trěbnych připłatkach ze zwjazkoweho etata. „Tutón wulki přidatny engagement Zwjazka chowa w sebi wulke strachi. Zwjazkowy zličbowanski zarjad warnuje w tym zwisku znowa před pjenježnym přećeženjom Zwjazka wulkeje financneje potrjeby rentoweho zawěsćenja dla“, pisaja pruwowarjo zličbowankow w stejišću za słyšenje fachowcow w zwjazkowym sejmje přichodny tydźeń, kiž nowinarjam předleži.

Plany zwjazkoweho knježerstwa su w prěnim rjedźe na dobro nětčišich rentnarjow a lětnikow, kotrež bórze na wuměnk woteńdu. Młodźi ludźo maja widźomne njelěpšiny. Sprawnosć mjez generacijemi njeje tak hižo data“, zarjad kritizuje.

Podstupim/Drježdźany (dpa/SN). Wuchodoněmski zwjazk twarskeje industrije žada sej spěšny rozsud hladajo na wu­tworjenje knježerstwa w Sakskej a wobkrući to z ćežkej situaciju twarskeje branše. ,,Je trjeba spěšnje jednać. Twarska branša w Sakskej měješe lětsa w prěnich sydom měsacach mjenje nadawkow hač lěto do toho“, zwurazni jednaćel zwjazka Robert Momberg. Skóncowane dróhi a mosty so na wubědźowanje negatiwnje wuskutkuja, njeměli so dlěje igno­rować. Hladajo na wulke wužadanja je trěbne, politisku zamołwitosć přewzać a stabilne kompromisy hladajo na wu­tworjenje knježerstwa namakać. Trěbny je etat, zo móhli so srědki spěšnje wužiwać. ,,Kraj trjeba zapłaćomne bydlenja, stabilnu infrastrukturu a perspektiwu za přistajenych twarskeje branše. Tohorunja njeměli so předewzaća z telko běrokratiju bědźić. ,,To so jenož poradźi, jelizo je knježerstwo chutnje zwólniwe, běro­kratiju a njetrjebawše rjadowanja wotstronić“, Momberg rozkładźe. Jednoriše postupowanja rozdawanja nadawkow, wjace transparency a spěšniše płaćenje móhli twarstwu w Sakskej tyć.

Sypnjeny Caroliny móst přichodne dny dale rumuja, po tym zo je so staw Łobja normalizował. Z ćežkej techniku chcedźa we wodźe ležace dźěle rozkuskować a wotwjesć. Dźěła traja drje hišće hač do kónca lěta. Wot póndźele natwarja na susodnym Augustusowym mosće nimo toho prowizorisku syć k zastaranju ludźi z ćopłotu. Roła bě so při sypnjenju mosta 11. septembra wotłamała. Fachowcy mjeztym dale za přičinami njezboža pytaja. Nimale wěste je, zo su zerzawe železne elementy w mosće sobu wina. Hač móža zbytny dźěl mosta zaso wužiwać abo hač dyrbja jón wottorhać, njeje hišće znate. Foto: dpa/Robert Michael