USA wumjetuja Ruskej
SPD ke klawsurje so zešła
Nauen (dpa/SN). Štyri dny po wólbnej poražce SPD w Durinskej a Sakskej je so frakcija socialdemokratow w zwjazkowym sejmje dźensa na swojej tradicionalnej klawsurje po dowolowej přestawce zešła. K zahajenju dwaj dnjej trajaceho zarjadowanja w braniborskim Nauenje wočakowachu tež zwjazkoweho kanclera Olafa Scholza (SPD). Zapósłancy najwjetšeje frakcije parlamenta chcychu wjacore poziciske papjery wobzamknyć, mjez druhim wo prašenju nutřkowneje wěstoty a borzdźenju zadołženja.
SPD bě při wólbach w Durinskej a Sakskej ze 6,1 a 7,3 procentami swój dotal najšpatniši wólbny wuslědk docpěła. Wuslědk w Durinskej bě samo najšpatniši we wólbach krajneho sejma scyła. Ćim wažniše su wólby w Braniborskej 22. septembra, dokelž staja SPD tu wot lěta 1990 bjez přestawki ministerskeho prezidenta. Po aktualnych woprašowanjach je tam AfD tuchwilu najsylniša strona. Wólbne wuspěchi AfD w Sakskej a Durinskej zwjazkoweho kanclera Scholza „jara pochmurja“, wón rjekny.
CDU po wólbach we wuskosćach
Wutworjenje noweju knježerstwow w Sakskej a Durinskej wužadace
Erfurt/Berlin (dpa/SN). Połoženje je za CDU po wólbach w Sakskej a Braniborskej wobćežne. Hdyž pak wona wuspěšnje postupuje, móhł Michael Kretschmer w Drježdźanach dale ministerski prezident wostać. A z Mariom Voigtom w Erfurće by so samo dalši ministerski prezident CDU přidružił. Wo tym je powěsćernja dpa w posudku přeswědčena.
Hłowne prašenje wostanje, z kim chcedźa křesćanscy demokraća knježić. Hrozy stronje łamk, hdyž něhdyša komunistka Sahra Wagenknecht ze swojej stronu BSW hladajo na móžnu koaliciju Kretschmerej a Voigtej diktuje, kak mataj so w prašenju nastajenja raketow USA w Němskej a wójny w Ukrainje dla zadźeržeć?
Lěto do přichodnych wólbow zwjazkoweho sejma su wólbne wuslědki w Sakskej a Durinskej zasadne prašenje načeli: Hdźe steji CDU a wot čeho so wona wotmjezuje? Kak stabilna je palna murja a kak dźěrata je wona na lěwej stronje? Tež před tutym pozadkom chcetaj předsyda CDU Friedrich Merz a šef CSU Markus Söder w pózdnim lěću prašenje kanclerskeho kandidata rozrisać.
Palne murje kaž jastwo
Połoženje w Sakskej a Durinskej po wólbach krajneju sejmow zbudźa dopomnjenki na lěto 2020. Tehdy bě w Berlinje nastupajo wobchadźenje z AfD wšitko jasne. Na bazy w Erfurće pak pokaza so woprawdźitosć, jako tam z pomocu AfD na runjewon kuriozne wašnje Thomasa Kemmericha za ministerskeho prezidenta wuzwolichu. Zwjazkowa kanclerka Angela Merkel (CDU) sej žadaše, wólbny wuslědk „zběhnyć“. Tehdyša předsydka CDU Kramp-Karrenbauer zastojnstwo ćisny.
Dźensa so znowa zdawa, zo nochcedźa w Berlinje woprawdźitosć spóznać. Ze swojimi palnymi murjemi přećiwo Lěwicy a AfD je so CDU zamurjowała. Nětko chcedźa tež BSW wuzamknyć, dokelž su to pječa wotročcy Krjemla. Kak matej nowej knježerstwje w Sakskej a Durinskej wupadać, nichtó njewě. Palne murje CDU su mjeztym jastwowe murje. W nich móhł so tež předsyda Friedrich Merz zabłudźić. Klětu k wólbam zwjazkoweho sejma pak trjeba wón orientaciju. Marko Wjeńka
To a tamne (05.09.24)
Bywšu cyrkej předali su w saksko-anhaltskim Hettstedće. Boži dom je zhromadnje z faru při přesadźowanju 163 000 eurow wunjesł, sakska ležownostna awkcija zdźěla. Wo wobłuku nazymskeje awkcije wot 30. awgusta hač do 3. septembra su 97 imobilijow w cyłkownej hódnoće 4,3 miliony eurow přesadźowali. Za pod škitom pomnikow stejacu nowogotisku cyrkej z kónca 19. lětstotka běchu sej spočatnje 149 000 eurow žadali.
Po 47 lětach identifikowali su w USA ćěło muža, kotrehož běchu 1977 zmjerznjeneho w hórskej prózdnjeńcy namakali. Tehdy wuchadźachu ze sebjemordarstwa pod wliwom drogow stejaceho muža. Najebać wšě prócowanja pak njemóžachu jeho mjeno zwěsćić. Nětko je so pod starymi aktami zhubjena karta z wotćišćom porsta muža wukuliła. Slědźerjo trjebachu jenož hišće do datajow pohladać.
Dnjej Drjewjanow w kulowcu woswjećili
Mała delegacija Serbow so na wuměłskim dworje we Wendlandźe na zarjadowanju wobdźěliła
Třeći raz hižo organizowaše asociěrowane towarstwo Domowiny we Wendlandźe – Drjewjanopołobski přećelski a dźěłowy kruh ze sydłom we Łuchowje (Lüchow) tak mjenowane Dny Drjewjanow (němsce: Wendentage). Po lońšim wobšěrnym třidnjowskim projekće z wulkim serbskim podźělom běštej lětsa jenož dnjej, 23. a 24. žnjenc, zaplanowanej. Z podpěru tamnišeje wjesneje zhromadnosće, města Wustrow a wosebje Wuměłskeho dwora Schreyahn bu kompaktny a naročny program zestajeny. Prěni króć přewjedźechu so wšitke zarjadowanja na nowym městnje, w kulowcu Schreyahn.
Społnomócnjena zastojnstwo złožiła
Budyšin (SN/MG). Anna Pięntak-Malinowska njeje hižo dlěje społnomócnjena za wukrajnikow w Budyskim wokrjesu. Po rozsudźe wokrjesneho sejmika, městno šmórnyć, je wona wot spočatka noweho měsaca jeničce hišće přistajena w hamće za migrantow, wo tym informuje nowinska rěčnica krajnoradneho zarjada Sabine Rötschke. Poprawom běchmy so knjenje Pięntak-Malinowskeje naprašowali, hač nochcyła nam wo pozadkach swojeje dźěławosće rozprawjeć – to bě před něhdźe tydźenjom. Slubiła, zo wotmołwi, drje wona telefonisce bě, ale prašenja wostanu njewotmołwjene. W hamće za migraciju přewza něhdyša społnomócnjena nětko wobdźěłanje „temy integracija a móže wšelakore integratiwne projekty kaž interkulturelne tydźenje abo styki z towarstwami a institucijemi pěstować“, rěka w zdźělence dale. Wokrjes zepěra so dale na to, zo njepředleži „wukaz přesadźenja sakskeho zakonja wo integraciji a wobdźělenju. Hakle hdyž tutón předleži, móžemy so snano wo dalšim postupowanju wuprajić.“
Přistajeni VW so zešli
Wolfsburg (dpa/SN). Po wozjewjenju lutowanskich planow awtotwarca Volkswagen su so přistajeni předewzaća dźensa dopołdnja na zawodnu zhromadźiznu zešli. W běhu popołdnja chcyštaj předsydka zawodneje rady koncerna Daniela Cavallo a nawoda wobwodneje wotnožki dźěłarnistwa IG metal Thorsten Gröger zjawnosć wo tym informować. Wčera bu znate, zo dyrbi VW hospodarskeho wuwića w zawodźe dla lutować. W tym zwisku planuja pušćenja a zawrjenje twornjow.
Zelenskyj žada sej lěpši škit
Kijew (dpa/SN). Po krawnych raketowych nadpadach Ruskeje na wulkoměsto Poltawa je sej ukrainski prezident Wolodymyr Zelenskyj wot zapada znowa lětadła wotwobaraceho systema a daloko sahace rakety žadał. Z nimi chcedźa wojerske zepěranišća w Ruskej nadběhować, z kotrychž rakety do směra na Ukrainu wotleća. Wčera běchu ruske rakety w Poltawje znajmjeńša 51 wobydlerjow morili a wjace hač 270 ludźi zranili.
Merz za wotpokazanja při mjezy
Bamž Franciskus je dźensa w Jakarće, stolicy Indoneziskeje, swój ...
Kuleba wotstup připowědźił
Kijew (dpa/SN). We wobłuku wjetšeho přerjadowanja ukrainskeho knježerstwa je tež wonkowny minister Dmytro Kuleba swój wotstup připowědźił. Tole je wón dźensa medijam zdźělił. Hižo wčera bu znate, zo su wjacori ministrojo swój wotstup zapodali. Na přichodnym posedźenju parlamenta chcedźa wotpowědne próstwy pruwować.
Po informacijach medijow su za brónjensku industriju zamołwity minister Olexander Kamyšin, justicny minister Denys Maljuška a wobswětowy minister Ruslan Strilec wo wuwjazanje ze zastojnstwa prosyli. Pozdźišo bu znate, zo stej tež zastupowacej ministerskej prezidentce Olha Stefanišyna a Iryna Werešćuk demisiju zapodałoj. Werešćuk bě za prašenja ćěkancow zamołwita, Stefanyšina za europsku integraciju Ukrainy. Pječa dyrbja połojcu knježerstwa wuměnić.
