Steinmeier w Egyptowskej
Berlin (dpa/SN). Z tři dny trajacym wopytom w Egyptowskej chce zwjazkowy prezident Frank-Walter Steinmeier wažnosć sewjeroafriskeho kraja za Němsku podšmórnyć. Je to prěnja jězba zwjazkoweho prezidenta do Kaira po 25 lětach. Steinmeiera chce egyptowski prezident Fattah al-Sisi jutře w stolicy Kairu witać. W rozmołwach póńdźe tež wo konflikt na Bliskim wuchodźe. Steinmeier chce poziciju Němskeje rozłožić. Swojeho zwjazkarstwa z Israelom dla je Němska wjele sympatije w regionje přisadźiła.
Trump a Harris w duelu
Washington (dpa/SN). Prěni króć we wólbnym boju scyła chcetaj so přichodnu nóc kandidatka demokratow za zastojnstwo prezidenta USA Kamala Harris a bywši republikanski prezident Donald Trump w telewizijnym duelu rozestajeć. Direktna konfrontacija wobeju je medialny wjeršk prezidentskeho boja do wólbow 5. nowembra. Wosebje za Harris je duel chutne pruwowanje. 59lětna bě hakle před tydźenjemi kandidatstwo wot Joewa Bidena přewzała.
Bamž we Wuchodnym Timoru
Wohnjowy wobornik Nolan Graham pryska wodu na palace so twarjenja w ...
Wjele mortwych při nalětach
Truty po puću do Moskwy zničene
Moskwa (dpa/SN). Ruski powětrowy škit je minjenu nóc po oficialnych informacijach tójšto trutow wottřělił, kotrež měrjachu so na stolicu Moskwu. Nad Moskwu a we wokolinje stolicy su dwanaće objektow zničili, zdźělištaj měšćanosta Sergej Sobjanin a guwerner Moskowskeho wobwoda Andrej Worobjow.
W městačku Ramenskoje njedaloko stolicy je 46lětna žona žiwjenje přisadźiła, jako w jeje domje po nadpadźe trutow woheń wudyri. Dźesatki ludźi dyrbjachu ewakuować. Na třoch Moskowskich lětanišćach dóńdźe k zapozdźenjam a wupadam. Tež w druhich kónčinach Ruskeje rozprawjachu wo nadpadach trutow. W Brjansku su 59 trutow wottřělili, guwerner Alexander Bogomas zdźěli.
Zeleni kritizuja pomjezne kontrole
Berlin (dpa/SN). Wot zwjazkoweje nutřkowneje ministerki Nancy Faeser (SPD) připowědźene pomjezne kontrole po měnjenju Berlinskich Zelenych swój zaměr njedocpěwaja. „Pomjezne kontrole wěstotu Němskeje njezwyša, ale policiju přidatnje wobćežuja“, rjekny krajny předsyda Philmon Ghirmai. Kontrole poćežuja dojězdźowarjow kaž tež transport tworow a změja drastiske wuskutki za hospodarstwo, je sej wón wěsty.
Po njedawnych bolostnych přiwótřenjach prawa na azyl nětko tež mjezy zawrěć, „je jenož w zajimje prawicarsko-ekstremistiskich stron“, Ghirmai rjekny. Wón sej žada, nawróćić so k wěcownej politice. Naprawy ranja nimo toho europske prawo a Schengenske zrěčenje.
Faeser bě nachwilne kontrole při wšitkich mjezach Němskeje wukazała. Přidatne kontrole maja so 16. septembra zahajić a najprjedy raz šěsć měsacow trać. Jako přičiny mjenowaše wona nimo njeregularneje migracije tež škit nutřkowneje wěstoty a wohroženje přez islamski terorizm a kriminalitu.
Sakska CDU a BSW so zetkałoj
Jednanja wo nowym knježerstwje w swobodnym staće zahajene
Drježdźany (dpa/SN). Sakski ministerski prezident Michael Kretschmer (CDU) je so z předsydku BSW Sahru Wagenknecht zetkał. Rozmołwa je so wčera popołdnju w Berlinje wotměła, CDU zdźěla. Zaměr zetkanja bě „pruwować móžnosće konstruktiwneho zhromadneho politiskeho dźěła“. Přichodne dny chcedźa nětko rozmołwy mjez CDU a BSW w Sakskej zahajić, w Drježdźanach rěkaše.
Kretschmer a Wagenknecht staj so po informacijach CDU wo politiskim połoženju w swobodnym staće, wo nowych móžnosćach direktneje demokratije a wo předźěłanju koronapandemije rozmołwjałoj. Tež temy krajneje politiki kaž kubłanje, wěstota a socialna politika hrajachu rólu. Nimo toho staj sej swoje pozicije wo wonkopolitiskich temach wuměniłoj.
Za čas wólbneho boja bě Kretschmer kritisce na pospyty Wagenknecht reagował, sakskej a durinskej CDU wuměnjenja zhromadneho dźěła nadiktować. „Časy politběrowa su nimo, jako móžeše něchtó w Berlinje postajić, što so tule na městnje stawa“, rjekny wón hišće před třomi tydźenjemi.
„Wupokazy, prošu!“
To a tamne (10.09.24)
Přepjelnjene jastwa zdźěla wuprózdnić chcedźa we Wulkej Britaniskej. Cyłkownje 1 700 jatych po tutym puću dočasnje pušća, knježerstwo w Londonje zdźěla. Hewak hrozy „kriminalita bjez mjezow“, dokelž njemóža połnych jastwow dla nikoho wjace zajeć. Rjadowanje předwidźi, zo móža jatych hižo po 40 procentach wotsedźaneho chłostanja pušćić. Hewak je to hakle po połojcy časa móžne.
Wočakowaneho wulkeho nawala na znowanatwarjenu katedralu Notre Dame w Parisu dla su tam internetne rezerwowanje zarjadowali. Kaž biskopstwo zdźěla, je zastup do Božeho domu dale darmotny. Rezerwowanja měsacy do toho njejsu móžne, ale hakle dny do wopyta sławneje cyrkwje, kotraž bu při wulkim wohenju w aprylu 2019 zničena. Po wotewrjenju 8. decembra wočakuja tam kóžde lěto 15 milionow wopytowarjow.
Dwurěčnosć dale wulke wužadanje
Slepo (JK/SN). Na pjatu fachowu konferencu měšćanostow a wjesnjanostow serbskeho sydlenskeho ruma witaše Kati Struckowa, społnomócnjena Zhorjelskeho wokrjesa za serbske naležnosće, nahladnu ličbu zastupjerjow gmejnow Budyskeho a Zhorjelskeho wokrjesa. Fachowa konferenca wotmě so prěni raz w Zhorjelskim wokrjesu a tak běchu postrowne słowa tamnišeho krajneho rady, dr. Stephana Meyera (CDU) jara wutrobite. Wón zwurazni wažnosć dwurěčnosće wosebje za swój wokrjes, hdźež so jenož hišće w někotrych regionach kaž wokoło Slepoho dwurěčnosć a serbšćina pěstuje. W fachowej konferency widźi wón wažny instrument, komunalnych politikarjow skedźbnjeć móžnosće, pokazać na dwurěčnosć w zjawnosći.
