Stadion Heinza Steyera w Drježdźanach su dźensa po wobšěrnym ...
Lětadło po puću do Afghanistana
Harris za politiski nowozapočatk
Washington (dpa/SN). W swojej prěnjej telewizijnej rozmołwje po wuzwolenju za prezidentsku kandidatku demokratow USA je so Kamala Harris za politiski nowozapočatk wuprajiła. „Ameriski lud zasłuži sej nowy puć do přichoda a kónc minjeneho lětstotka“, rjekny wiceprezidentka sćelakej CNN.
Interview běchu z wulkej napjatosću wočakowali, wšako je wustupowanje w medijach za politikarjow USA rozsudne. Po měnjenju wobkedźbowarjow je Harris pruwowanje dosć derje wobstała. W někotrych dypkach pak je 59lětna składnosć skomdźiła, so wot swojeho kontrahenta Donalda Trumpa wotmjezować. Tón reagowaše na swojej internetnej platformje z wulkimi pismikami: „Wostudłe“.
W rozmołwje dyrbješe Harris mjez druhim rozkłasć, čehodla je swoje měnjenje w někotrych wobłukach zasadnje změniła. Tak bě so wona stajnje přećiwo wudobywanju zemskeho płuna z pomocu metody frackinga wuprajiła, nětko pak tole wita. Tež migraciju nastupajo rěči wona dźensa hinak.
To a tamne (30.08.24)
Štóž njewoli, woli wopačneho
Serbskim młodostnym je samozrozumliwe, swój hłós wotedać
Budyšin (SN/MG/lmc). Hdyž wothłosuje při simulowanych wólbach sakskeho kruha za dźěći a młodźinu w Budyskim wokrjesu 57 procentow młodostnych za AfD, potom je to sylne znamjo. Namaj bě wone nastork so mjez serbskimi młodostnymi naprašować, hač póńdu woni wolić, a što jich při tym zaběra. Napadnje, zo sej nichtó njezwěri, swoje politiske měnjenje zjawnje zastupować. Druhdy maja samo strach, naprašowanje w kruhu sobušulerjow dale sposrědkować, wšako je situacija politiskeje polarizacije dla hižo dosć napjata.
Nastajenje k serbšćinje mjez wobydlerjemi lěpše
Budyšin (SN/MiR). Prěnje wuslědki ewaluacije kampanje „Sorbisch? Na klar.“ su so wozjewili. Sakske statne ministerstwo za wědomosć, kulturu a turizm (SMWK) zdźěli, zo ludźo hódnotu serbskeje rěče a kultury kaž tež wužiwanje serbšćiny w zjawnosći w Hornjej Łužicy bóle připóznawaja. W cyłku je 1 796 wosobow w Hornjej Łužicy resp. w serbskim sydlenskim rumje kaž tež we wokolnych gmejnach Budyskeho a Zhorjelskeho wokrjesa na naprašowanje wo serbšćinje a imagowej kampanje „Sorbisch? Na klar.“ wotmołwiło. 41 procentow naprašowanych w serbskim sydlenskim rumje a 28 procentow z wokolnych gmejnow měješe lětsa za pozitiwne, rěči-li so w jich přitomnosći serbsce. Při prěnim naprašowanju 2023 bě to hišće 37 resp. 25 proc.
Nawoda centruma wupokazany
Hamburg (dpa/SN). Pjeć tydźenjow po zakazu jako islamistiskeho zastopnjowaneho islamskeho centruma w Hamburgu chcedźa nětko tež toho nawodu z Němskeje wupokazać. 57lětny Mohammed Hadi Mofatteh je wukaz Hamburgskeho nutřkowneho zarjada dóstał. W lisće jeho namołwjeja, Němsku w běhu 14 dnjow wopušćić. Hewak hrozy jemu wotsunjenje. Jemu je nimo toho zakazane, so do Němskeje nawróćić.
Dlěše dźěło mytować
Berlin (dpa/SN). Zwjazkowe knježerstwo chce ludźi pohnuć, dlěje dźěłać. Štóž tež po docpěću rentnarskeje staroby ze 66 lětami dale dźěła, měł přidatnu premiju dóstać. Tu chcedźa hač do třoch lět nalutować a po tym wupłaćić. Nimo toho chcedźa ludźom, kotřiž dlěje dźěłaja, čas žiwjenja wyšu rentu płaćić. Nowe namjety chcedźa na posedźenju zwjazkoweho knježerstwa 4. septembra wobzamknyć, medije rozprawjeja.
Trump prowokuje Harris
