Bratislava (dpa/SN). Kak ma w Europskej uniji bjez Wulkeje Britaniskeje dale hić? Zbywacych 27 statow unije pyta w słowakskej stolicy Bratislavje zhromadnu wotmołwu a za pućemi, tajke a hinaše rozkory přewinyć. Němska kanclerka Angela­ Merkel (CDU) wočakuje, zo w krizy tčaca Europska unija konkretne postupy docpěje a sej zaso dowěru woby­dlerjow zdobudźe. „Smy w kritiskim połoženju. Dźe wo to, ze skutkami pokazać, zo móžemy so polěpšić“, rjekny wona dźensa na zazběhu wjerškoweho zetkanja čłonskich statow EU bjez Wulkeje Britaniskeje­ w Bratislavje.

Zaměr zetkanja ma „Bratislavska agenda“ być, kotraž definuje ćežišća přichodneho połlěta. K tomu chcedźa knježerstwowi šefojo hłownje wo lěpšim zawěsćenju mjezow, wotwobaranju terora a přewinjenju hospodarskeje flawty wuradźować. Merkel mjenowaše dale zhromadne dźěło statow EU w zakitowanju. Dźe-li wo to, nowe dźěłowe městna wu­tworić, sadźa wona předewšěm na nutřkoeuropske wiki. Jako cil kanclerka mjenuje, dać młodym ludźom w krajach zhromadźenstwa nadźiju a šansy.

Němska Zwjazkowa kanclerka Angela Merkel (CDU) rěči nastupajo Europsku uniju wo kritiskim połoženju. Mnohim knježerstwowym šefam čłonskich statow EU so zda, kaž by zhromadźenstwo před wu­znamnej cezuru stało. To wšo su słowa, kotrež smy dźensa z wjerškoweho zetkanja­ EU w Bratislavje słyšeli. Maš zaćišć, zo je nětko skónčnje posledni rozumił: Kaž dotal njemóže dale hić. Stary princip demokratije, słuchać a so wu­prajić, je tež za fungowace zhromadne žiwjenje pod třěchu Europskeje unije nje­wobeńdźomny. Přewobšěrna je lisćina njedostatkow, kotrež čłonske staty zhromadźenstwa skerje rozdwojeja hač jednoća. Pomina-li sej słowakski premier Robert Fico za wjeršk sprawnosć a přezjednosć, móhło to wuchadźišćo być za puć k nowej wiziji a ke konkretnej změnje. Wo tym Grjek Alexis Tsipras hižo dlěje za Europu rěči. Snano je to wupuć. Axel Arlt

Fota wo kóčkach njejsu jenož rjany přinošk za wobrazowe galerije w interneće, to znajmjeńša měnja aktiwisća w Londonje. Tak su staciju podzemskeje z wobrazami tychle zwěrjatow plakatowali. Nimale 700 podpěraćelow je we wobłuku crowdfundinga přeličene nimale 27 000 eurow darowało. Z pjenjezami je skupina z mjenom Glimpse wšitke wabjenske płoniny stacije Clapham Common na dwě njedźeli wotnajała.

Na přewšo zdwórliwe wašnje je njeznaty rubježnik w Poruhrskej dźesać discounterowych filialow nadpadnył. Mi­nje­nej­ dwě lěće bě wón maskěrowany dźesać króć rano při zachodźe na šofera łakał, kiž twory dodawaše. Sobudźěłaćerjow je z pistolu wohrozył a jich sputał. Kaž wo­pory měnjachu, je muž často měrnje, přećelnje a zdwórliwje postupował. Wo­spjet so je prašeše, hač „njejsu překruće spu­tane“.

Rozestajenja mjez ćěkancami a domoródnymi na Budyskich Žitnych wikach so dale přiwótřeja. Kaž policija dźensa zdźěla, je tam wčera znowa 80 k namocy zwólniwych ludźi 20 ćěkancam napřećo stało.