Wěstotaa kubłanje temje w sejmje
Drježdźany (dpa/SN). Po nadpadomaj islamistow w Bayerskej a Badensko-Württembergskej je so dźensa Sakski krajny sejm z nutřkownej wěstotu w swobodnym staće zaběrał. Debatu wo temje „wobydlerjow škitać a nutřkownu wěstotu zaručić“ běštej frakciji CDU a SPD nastorčiłoj. Tak chcetej stronje w časach terorizma pokazać, zo stej z přidatnymi zastojnikami a wjace přistajenymi młodymi policistami kaž tež ze škitnej stražu na napjate wěstotne połoženje reagowałoj. Tež přidatne wěstotne naprawy na zarjadowanjach, kaž na přikład na centralnym swjedźenju k Dnjej němskeje jednoty 3. oktobra w Drježdźanach, su dźensa rozjimali.
Frakcija Lěwicy w krajnym sejmje wumjetuje předewšěm CDU, zo je wěstoće w kraju zadźěwała, wotstronjejo mnohe dźěłowe městna policije. Knježaca strona CDU pak měni, zo je so wěstotne połoženje w kraju nětko změniło.
To a tamne (31.08.16)
Warnowanski signal ze zeleniny je sej wodźer awta spaslił. Jeho jězdźidło bě škody motora dla blisko awtodróhoweho pozastanišća stejo wostało. Tak prawje wón njewědźeše, kak ma tamnych šoferow warnować, dokelž njeměješe warnowanski třiróžk sobu. Staji tuž połnu šklu čerwjenych paprikow za awtom na jězdnju. Policija njeje sej wot muža žanu pokutu žadała, ale počesći jeho kreatiwitu a staji podawk do interneta.
Planowanskeho zmylka dla njehodźa so durje na Bad-Bentheimskim dwórnišću, kotrež wjedu na nastupnišća, wjace wočinjeć. Pasažěrojo maja tuž přez wokno lězć abo wokołopuć hić. W běhu modernizacije běchu tam nastupnišća wo 40 centimetrow powyšili, kotrež nětko durje zaraćeja. Štož skutkuje kaž „trysk Salowčanow“, njemóžachu po słowach měšćanosty kupjele zadźěwać.
Muslimojo na Božich mšach
Frankfurt n. M. (B/SN). Po zamordowanju francoskeho měšnika su so w Francoskej a Italskej tysacy muslimow na njedźelnych Božich mšach wobdźělili, zo bychu so z křesćanami solidarni wopokazali a islamistiski terorizm zasudźili. Jeničce w Rouenskej katedrali bě po nowinje Le Monde něhdźe sto muslimow na wopomnjensku Božu mšu za 26. julija morjeneho měšnika Jacquesa Hamela přišło. Francoska islamska rada CFCM bě na zamołwitych mošejow, imamow a dalšich muslimskich wěriwych apelowała, zo bychu swoju „solidaritu a swoje sobučuće“ z wopytom křesćanskeje Božeje mšě zwuraznili.
Cyrkej wótrišo škitać?
Ličba ćěkancow přiběra
Athen (dpa/SN). W Grjekskej je ličba ilegalnje přichadźacych ćěkancow razantnje rozrostła. W minjenych 24 hodźinach přińdźe 462 ludźi z turkowskeho přibrjoha na grjekske Egejske kupy, kaž kruh zamołwitych za ćěkancow w Athenje zdźěla. Wot apryla, po tym zo bě Europska unija zrěčenje z Turkowskej nastupajo migrantow dojednała, je to najwjetša ličba na dźeń. Minjene sydom dnjow bě to přerěznje 74 ćěkancow.
Dźeń a wjac rentnarjow dźěła
Berlin (dpa/SN). Dale a wjac wuměnkarjow sej swoju rentu z přidatnym minijobom polěpša. To je porno lětu 2010 22 procentow wjace. Z cyłkownje 17 milionow rentnarjow Němskeje 943 000 ludźi nad 65 lětami na dźěło chodźi a sej tak měsačnje hač do 450 eurow přizasłuža. Tole wuchadźa z ličbow zwjazkoweho ministerstwa za dźěło. Wosebje wulki rozrost wobkedźbuja pola rentnarjow, kotřiž su 75 lět a starši.
Woheń w milinarni
Wobydlerjo regiona Lionrock na sewjerowuchodźe Japanskeje zawěsćeja ...
Znački z domizny derje přiwzate
Lipsk (dpa/SN). Zo su před třomi lětami tak mjenowane domizniske awtowe znački w Sakskej zaso zawjedli, wujewja so jako wuspěch. Tak je so na přikład w Mišnjanskim wokrjesu ličba awtowych tafličkow z pismikami RIE na 14 000 podwojiła. Zdobom zwěsćeja rěčnicy krajnoradnych zarjadow, zo wupytaja sej wobsedźerjo awtow jara kreatiwne znački. Na přikład nastupa tole wokrjes Torgau z TO. Tam wobkedźbuje rěčnik krajnoradneho zarjada Rayk Bergner, zo přeja sej tež wobydlerjo Delitzscha značku z Torgauwa, dokelž maja snano předmjeno Tobias. Tak steji na awtowej tafličce potom skrótšenka TO-BI.
W Budyskim wokrjesu skići so rozdźělny wobraz. Tak je sej wot nowembra 2013 hač do oktobra 2014 cyłkownje 10 108 Kamjenčanow značku KM přało, štož wučinješe 27,6 procentow w Budyskim wokrjesu. Loni bě to 25,7 proc., mjeztym je podźěl zaso na 26,5 proc. postupił. W Zhorjelskim wokrjesu wobkedźbuja zjaw předewšěm w Lubijskej a Žitawskej kónčinje, hdźež so wobsedźerjo awtow zaso bóle za domiznisku značku rozsudźeja.
