To a tamne (19.08.16)
Wopačneho kupca wupytali su sej paduši paketow. Woni poskićichu wjacore antikske pjenjezy runje tomu wikowarjej w Tübingenje, kiž bě twjerde pjenjezy dny do toho z póštu wotpósłał. Tón pjenjezy hnydom spózna a zawoła policiju. Ta je třoch muži w starobje dwaceći, 31 a 37 lět hnydom sobu wzała. Jako sub-předewzaćeljo transportowachu woni pakety pósta, při čimž stajnje zaso drohotne wěcy z nich kradnychu.
Jastwowemu stražnikej žiwjenje wuchowali su jeći jastwa w Texasu: Ze swojeje cele běchu woni wobkedźbowali, kak so stražnik infarkta wutroby dla zwjeze. Na to z pjasćemi wo durje bijachu, zo bychu tamnych stražnikow na so skedźbnili. Jako so to njeporadźi, zhromadnje durje cele přełamachu a pomoc přiwołachu. Widejokamera je dobry skutk dokumentowała.
Ze Serbami wusko zwjazany był
Bywši zapósłanc Sakskeho krajneho sejma Wolfgang Marcus (SPD) je 9. awgusta 88lětny w badensko-württembergskim Weingartenje zemrěł. Narodźił bě so wón 15. oktobra 1927 w Zhorjelcu. Po Druhej swětowej wójnje bě sobuzałožer CDU a Młodeje unije w Sakskej. Lěta 1946 dyrbješe katolik do zapadneje Němskeje ćeknyć, hdźež dźěłaše jako wysokošulski wučer. Wot 1970tych lět angažowaše so jako čłon SPD w komunalnej politice.
Po towaršnostnym přewróće w NDR přisłušeše wot 1990 do 1994 Sakskemu krajnemu sejmej. Hač do smjerće bě wón w kubłanskej, medijowej, cyrkwinskej a mjeńšinowej politice Sakskeje a Badensko-Württembergskeje mnohostronsce aktiwny.
Mortweho našli
Zhorjelc (dpa/SN). Policija je w starej Zhorjelskej fabrice, kotraž bě so před měsacami wotpaliła, ćěło našła. Spalene čłowječe powostanki nańdźechu w dotal njepřistupnym dźělu pod třěchu, kaž Zhorjelska policajska direkcija zdźěla. Dotal njemóžachu ćěło wućahnyć, dokelž hrozy so twarjenje sypnyć. Techniski pomocny skutk dyrbi najprjedy zawěsćić. Identitu mortweho dotal njeznaja. Policija bě wčera na ležownosći po puću, zo by z pomocu wukubłaneho psa za zhubjenym 51lětnym bjezdomnym pytała.
Dalše přepytowanja
Frankfurt n. M. (dpa/SN). Wčera zajaty 31lětny wikowar bróni dotal mjelči. Kaž policija informuje, koncentruja so dalše přepytowanja nětko na wuhódnoćenje dotal namakaneho materiala. Tuchwilu hišće njewě, hač je muž, kiž bě Mnichowskemu amokowemu třělcej pistolu a municiju předał, tež za dalše njeskutki sobu zamołwity. 31lětneho je policija wutoru zajała, po tym zo bě jemu pasle stajiła. Při tym namakachu dalše brónje.
Wjele mortwych w jastwach
Wo wěstoće jednali
Wšo so z prawom stało
„Woboru“ zakazać
Woheń na łódźi
To a tamne (18.08.16)
Awtogramy wjacorych prominentnych sportowcow w domje bayerskeho koparskeho ligista Weiden je rjedźerka wotstroniła. Prawdźepodobnje měješe wona podpisma na škleńčanej witrinje za móranja młodostnych, kotřiž běchu tam dźeń do toho swjećili, koparski klub na swojej internetnej stronje zdźěla. Podpisali běchu tam mjez druhim Manuel Neuer, Jürgen Klopp a Pep Guardiola.
Na dźěćacym kolesu je policist w Bambergu ćěkaceho přesćěhał. 27lětny bě so z mopedom policajskej kontroli wuwinył. Jako zastojnicy w zahrodnišću z awtom dale njepřińdźechu, hrabny sej policist njepřizamknjene koło a 27lětneho dosahny. Tón njeměješe jězbnu dowolnosć, za to pak dosć alkohola a drogow w ćěle. Koleso je policist zaso wróćił.
Wobara so kritice
Saarbrücken (dpa/SN). Prezident Zwjazka němskich industrijnych a wikowanskich komorow Eric Schweitzer wobara so wumjetowanjam, zo so hospodarstwo přemało za integraciju ćěkancow angažuje. Migrantow do towaršnosće zarjadować je dołhi proces, rjekny Schweitzer. Jich najwjetši problem su pobrachowace rěčne znajomosće. Přerěznje po dwěmaj lětomaj su ćěkancy kmani, wukubłanje zahajić, wón rjekny.
Racije w turkowskich firmach
Istanbul (dpa/SN). Po zwrěšćenym puču w Turkowskej je policija dźensa w předewzaćach Istanbula racije přewjedła. We wjacorych štwórćach přepyta cyłkownje 44 předewzaćow, zdźěla statna powěsćernja Anadolu. Zamołwići firmow su podhladni, zo maja styki k prědarjej Fethullahej Gülenej w USA. Turkowska ma Gülena za hłowneho winika wojerskeho puča z 15. julija. W zwisku z racijemi pytaja nětko za 120 ludźimi po wšěm kraju.
Wikowar bróni do jastwa?
